ارمياندار ەلدىڭ سولتۇستىگىندەگى گرۋزيامەن شەكارالاسىپ جاتقان  شيراك وبلىسىنا قاراستى اريچ ەلدى-مەكەنىندەگى قازاقستان پرەزيدەنتى نۇرسۇلتان نازارباەۆتىڭ اتىنا بەرىلگەن كوشەنىڭ اتاۋىن وزگەرتپەك، دەپ حابارلايدى novostink.ru سايتى.

14-ءساۋىر كۇنى اۋىل اقساقالدار القاسى ءبىر اۋىزدان وسىنداي كەلىسىمگە كەلگەن. اريچ سەلولىق اكىمشىلىگىنىڭ باسشىسى رولاند نازارتەرياننىڭ ايتۋىنشا،  اريچ اۋىلىنىڭ اقساقالدار كەڭەسى ءبىر اۋىزدان نازارباەۆ كوشەسىنىڭ اتاۋىن «ارتساح» دەپ وزگەرتۋدى ۇسىنعان. ال جەرگىلىكتى شىركەۋدەگى ءدىن قىزمەتكەرلەرى كوشەنىڭ اتىن – «گريگورا لۋساۆوريچ» دەپ اتاۋدى ۇسىنىپتى.

ارمەنيالىق «panorama.am» سايتىنىڭ حابارلاۋىنشا، نازارتەريان كوشە اتاۋىن وزگەرتۋ تۋرالى باستامانى  2014 جىلى قازاقستان پرەزيدەنتى ارمەنياعا قارسى مالىمدەمە جاساعان كەزدە كوتەرگەن ەكەن.

قازىر ارمەنيا حالقى قازاقستان پرەزيدەنتى نۇرسۇلتان نازارباەۆتىڭ  تىككەلەي پارمەنىمەن ەرەۆانداعى ەاەو ءسامميتىنىڭ وتپەي قالۋىنا نارازى-مىس. ونىڭ ۇستىنە، جاقىندا نۇرسۇلتان ءابىشۇلىنىڭ ىستامبۇلعا جاساعان رەسمي ءىس-ساپارى بارىسىندا تۇركيا پرەزيدەنتى تايىپ ەردوعانمەن قۇشاقتاسىپ تۇرعان سۋرەتى ارميانداردىڭ اشۋىن تۋعىزسا كەرەك. ولار كوشەدەگى نازارباەۆ ءسوزى جازىلعان تاقتايشالاردى قيراتىپ تاستاپتى.

ارمياندار قازاقستان پرەزيدەنتىنە وسىدان 10 جىل بۇرىن كوشە بەرىپ، ەسىمىن ۇلىقتاعان ەدى.

نازارباەۆ كوشەسىنىڭ اتاۋىن وزگەرتۋ تۋرالى باستامانى ارمەنيا ۇلتتىق كەڭەسىنىڭ دەپۋتاتى، نۇرسۇلتان نازارباەۆتىڭ ەكس-كەڭەسشىسى بولعان محيتار ۆاركيان كوتەرىپتى.

اتالعان اۋىل نازارباەۆتىڭ ەسىمىمەن شەكتەلمەيدى. اۋىلدىڭ كىتاپحاناسىندا نازارباەۆتىڭ ۇلكەن پورترەتى مەن ەلىمىزدىڭ ادەبي كىتاپتارى قويىلعان قازاقستان بۇرىشى بار. بۇل بۇرىشتى 2011 جىلى قازاقستان ەلشىلىگى قويعان.

نۇرگەلدى ابدىعانيۇلى
Abai.kz