اۋىلشارۋاشىلىق مينيسترلىگى وتاندىق اۋىلشارۋاشىلىق ونىمدەرىنىڭ ەو ەلدەرىنە ەكسپورتتاۋ كولەمىن ارتتىرۋدى قولدايدى.

اۋىلشارۋاشىلىق ءمينيسترى اسىلجان مامىتبەكوۆتىڭ استانادا اۋىلشارۋاشىلىق جانە اۋىلدى وڭىرلەردى دامىتۋ مالەلەلەرى جونىندەگى ەۋروپالىق كوميسسار فيل حوگانمەن كەزدەسۋىندە قازاقستان  مەن ەو-نىڭ اۋىلشارۋاشىلىق سالاسىنداعى ارىپتەستىگى ءسوز بولدى.

قر اۋىلشارۋاشىلىق مينيسترلىگى ءباسپاسوز قىزمەتىنىڭ مالىمەتىنشە، قازاقستان مەن ەو اراسىنداعى اۋىلشارۋاشىلىق ونىمدەرى مەن قايتا وڭدەلگەن ونىمدەر بويىنشا 2015 جىلى سىرتقى تاۋار اينالىم 635,9 ميلليون دوللار بولعان. 2015 جىلى قازاقستان ەو-عا 92 مىڭ توننا بيداي مەن ماي، 247,7 مىڭ توننا زىعىر ءدانىن، 15,9 مىڭ توننا ماقتا تالشىعىن جانە 5,9 مىڭ توننا بالىق ەتىن ەكسپورتتاعان.

اۋىل شارۋاشىلىعى ءمينيسترىنىڭ ايتۋىنشا، «قازاقستان ءداستۇرلى تۇردە ەو نارىعىنا استىق، ماي، داندەر جەتكىزەدى». «سونىمەن قاتار، ەو ەلدەرى قازاقستاندىق بيدايدى جەرگىلىكتى استىقتىڭ ساپاسىن كوتەرۋ ءۇشىن جوعارى پروتەيندى ءونىم رەتىندە ساتىپ الادى. قازاقستان جىل سايىن 100-200 مىڭ توننا ورگانيكالىق بيداي تاسىمالدايتىندىعىن ەرەكشە اتاپ ءوتۋ قاجەت. ونى ەو-دا ءتيىستى سەرتيفيكاتتارى بار شۆەيتساريالىق نەمەسە باسقا كومپانيالار سەرتيفيكاتتاۋدان وتكىزگەن جانە باعاسى كادۋىلگى استىقتان ەكى ەسەدەي قىمبات»، – دەدى مينيستر.

مينيستر قازاقستاننىڭ ءداستۇرلى ەكسپورتتاۋ سالاسىنان بولەك، «قازىرشە ازداپ جەتكىزىلەتىن وزگە ءونىم تۇرلەرىن ودان ارى قاراي ارتتىرۋدىڭ بولاشاعى بار» دەپ سانايدى.

وعان  وڭتۇستىك قازاقستان وبلىسىنان شىققان فەرمەردىڭ تاجىريبەسى ايقىن مىسال بولا الادى. «جاقىندا وقو فەرمەرى گەرمانياعا قيار تاسىمالدادى. ونىڭ ايتۋىنشا، سول جاقتىڭ كەدەنىندە ەسىرتكى اپارا جاتقان جوق پا ەكەن دەپ كۇدىكتەنىپتى. قاسىندا گوللانديا مەن وسى ءونىمدى تاسىمالداۋشى ەلدەر تۇرعاندا، قالايشا قازاقستاننان گەرمانياعا قيار اپارۋى مۇمكىن؟»، – دەيدى مينيستر. «مەنىڭ ويىمشا، ءونىم تۇرلەرىن كەڭەيتۋدىڭ الەۋەتى زور. ايتالىق، ءبىز جىل سايىن ەۋروپاعا 50-60 مىڭ توننا كوكسەركە (بالىقتىڭ ءتۇرى) تاسىمالدايمىز.  ءتىپتى ونى ەۋروپانىڭ ەڭ مىقتى مەيرامحانالارىندا پايدالانادى، ويتكەنى، ول تازا ورگانيكالىق ءونىم»، – دەپ اتاپ ءوتتى ا. مامىتبەكوۆ.

اۋىلشارۋاشىلىق جانە اۋىلدى جەرلەردى دامىتۋ ماسەلەلەلەرى جونىندەگى ەۋروپالىق كوميسسار فيل حوگاننىڭ پىكىرىنشە، كەلەشەكتە ەو ەلدەرىنەن قازاقستانعا ەكسپورتتالاتىن ءونىم كولەمى ارتۋى مۇمكىن. بۇگىندە قازاقستانعا ەۋروپالىق وداققا مۇشە ءار ءتۇرلى ەلدەردەن 600 ءتۇرلى سان الۋان ءونىم تاسىمالدانادى ەكەن.

«ەگەر كەدەندىك الىمدارعا، تاريفتەرگە، ترانسپورتتىق باعىتتارعا قاتىستى ماسەلەلەردى شەشە الساق، تاسىمال اعىنىن ارتتىرۋعا بولار ەدى.  رەسەيلىك ەمبارگومەن بايلانىستى جاعدايلار دا بۇل ىسكە كەدەرگى. بۇگىن ءبىز مينيسترمەن ەو-دان كەلەتىن تاۋارلاردى قازاقستاننىڭ نارىعىنا جەتكىزۋ باعىتتارىن تالقىلادىق. بۇل قازاقستاننان ەو ەلدەرىنە جەتكىزىلەتىن ونىمدەرگە دە قاتىستى»، – دەپ پىكىر ءبىلدىردى ف. حوگان.

Abai.kz