جاقىندا الماتى قالاسىنىڭ مىڭ جىلدىعىنا ارنالعان الامان ايتىس ءوتتى. حالىقارالىق دەپ ايدار تاعىلعان ايتىسقا موڭعوليا رەسپۋبليكاسىنان ءبىر اقىن، قىرعىزستاننان ءبىر اقىن جانە ءجۇرسىننىڭ جۇيرىكتەرى قاتىستى. شىندىعىندا وزگە ايتىستاردان ءبىر باس جوعارى تۇرعىن وسى ايتىستا نە ءتۇرلى قوعامدىق ماسەلەلەر ايتىلدى. اقىنداردىڭ ءبىرى قوعامنىڭ قوتىر جاراسىن استارلاپ ايتسا، ءبىرى حانعا دات ايتقانداي توتەلەتتى.  

ايتىسقا الماتى قالاسىنىڭ اكىمى باۋىرجان بايبەك مىرزا ارنايى كەلىپ قاتىستى. سونىمەن قاتار، بيلىك باسىنداعى "نۇر وتان" پارتياسى توراعاسىنىڭ ءبىرىنشى ورىنباسارىنىڭ ساياسي كەڭەسشىسى بەرىك ءۋالي مىرزا وسى ايتىستىڭ قازىلىعىندا بولدى.

بىلتىر عانا الماتىدا وتكەن "التىن دومبىرا" ايتىسىندا باس جۇلدەنى قانجىعاسىنا بايلاعان كەرەكۋلىك جاس پەرى  اسپانبەك شۇعاتاەۆ بابىندا ەكەن. ەلىمىزدىڭ ساياسي ومىرىندەگى وزەكتى ماسەلەلەردى وتكىر تىلمەن جەتكىزە بىلگەن اسپانبەكتىڭ ونەرى كورەرمەندەردىڭ كوڭىلىندەگىسىن ءدوپ باسقانداي بولدى. ايتىسقا كەلگەن اعايىن اقىندارعا ۇزاق ۋاقىت قول سوعىپ، قوشەمەتىن ءبىلدىردى. 

قازالاردىڭ باعالاۋى بويىنشا "مىڭجىلدىق ايتىستىڭ" باس بايگەسى رۇستەم قايىرتايۇلىنا بۇيىردى (2 000 000 تەڭگە). ءبىرىنشى جۇلدە مەيىربەك سۇلتانحانعا بەرىلدى (1 000 000 تەڭگە). ال جۇلدەلى ەكىنشى ورىندار استانالىق يرانعايىپ كۇزەمباەۆ پەن الماتىلىق بيبىگۇل تىلەبولدينانىڭ قانجىعاسىنا بايلاندى ء(ار اقىنعا 500 000 تەڭگەدەن). ايتىستىڭ ءۇشىنشى ورىندارىن اتىراۋلىق شالقارباي ءىزباساروۆ پەن قىرعىزستاننان كەلگەن ازامات بولعونباەۆ الدى (300 000 تەڭگەدەن).

وسى ايتىستا كەرەكۋلىك اقىن اسپانبەكتىڭ ايتقاندارىن وزگەرتپەي نازارلارىڭىزعا ۇسىنامىز. ويتكەنى اسپانبەك وسى ايتىستا بۇگىنگى ساياسي جاعداي تۋرالى وزىندىك پىكىرىن اشىق ءبىلدىردى:

زاپىران قۇسقان زامانا 
زارىمدى توكسەم بولا ما؟
ەرلەرىم جاتىر مولادا،
رۋxىم جاتىر «كومادا».
«پريمەر» بولعان ەلىنە 
پرەمەر كەتتى «زوناعا»!
تۇلپارعا تاعىپ تۇسامىس، 
جابۋ ساپ قويدىق تاناعا. 
تالعات تا وتىر تار ۇيدە 
جابىلىپ جالعان جالاعا. 
ەسىڭ بار بولسا جىگىتتەر 
ەكسپو-عا جولاما - 
كىرىپ كەتەسىڭ قوراعا! 
37-جىل سەكىلدى 
ۇكىمەتتىڭ باسىندا 
ءوتىپ جاتىر ءولى ارا.
ساياسات جايلى تولعانسام 
سايلاۋسىز كەلمەس جوباعا 
قايرات نۇرتاس توپ جارىپ 
قايراتكەرلەر ءجۇر دالادا 
سول ورىنداردىڭ بىرەۋى 
جاراساتىن ەدى عوي

ءجۇرسىن دەيىن اعاما 
تاتىمايدى بىرەۋى 
حاننىڭ ۇلى تورەگە 
ءبيدىڭ ۇلى شوراعا 
بۇگىنگى 100 دەپۋتات 
قامىن جەگەن ءۇش ءجۇزدىڭ 
ءۇش بيدەن كەتسىن ساداعا!
قويداي مومىن xالقىمدى 
يت پەنەن قۇسقا جەم قىلماي 
قولداي گور اللا تاعالا!

قازانات قازعان ورعا سۇرىنبەيدى 
ازامات توپقا كىرسە مۇدىرمەيدى. 
اعايىن كەشە عانا سايلاۋ ءوتتى 
«نۇر وتان» تاعى دا ىلعي نۇرىن قۇيدى. 
ەندى بەس جىل xالىقتىڭ مۇڭ زارىنا 
پارلامەنتتىڭ قۇلاعى تۇرىلمەيدى 
كارتا ويناعان سەكىلدى تەندر ويناپ 
بيۋدجەتتىڭ بۇيىرىنەن جۇلىپ جەيدى 
سالىقتىڭ دا باعاسىن شارىقتاتىپ 
حالىقتىڭ اۋىزىنان جىرىپ جەيدى 
كلانعا ءبولىنىپ اپ قىران قازاق 
ودان قالسا جۇزبەنەن رۋىم دەيدى. 
قازىنانىڭ جامباسىن شەتەل ءمۇجىپ 
قازاقتار سورپاسىندا سىمىرمەيدى 
قىزىڭدى قىسىق كوزدى قىتاي الىپ 
كۇنىم دەگەن ايىڭدى كۇڭىم دەيدى 
كەي جىگىتتەر اينالىپ گەي جىگىتكە 
ۇرپاعى ۇلتتىڭ قالاي بۇلىنبەيدى 
ەسترادادا قاپتاپ ءجۇر ەسۋاستار 
ەركەك ايەل ەكەنى بىلىنبەيدى 
ۇكىمىن شاريعاتتان الماسا دا 
ۇكىمەت نەگە وسىعان ۇڭىلمەيدى 
قادالعان تىكەندى الىپ تاستاماساڭ 
ىندەتتىڭ ورنى لەزدە ىرىڭدەيدى. 
كوشەڭنەن كۇنا كولدەي اعىلعاندا 
قارا جەر قورقىنىشتان دىرىلدەيدى 
ۇلتىم دەگەن ازايسا ۇلاندارىڭ 
نامىستىڭ قىزىل شوعىن كىم ۇرلەيدى. 
الاشتىڭ جىگىتتەرى ويانىڭدار 
ءاليxاندار قايتادان تىرىلمەيدى!

نۇرگەلدى ابدىعانيۇلى

Abai.kz