توقاەۆ رەسەيدىڭ پوزيتسياسىنا وڭ باعا بەرىپ، پۋتين ارسەنالىنىڭ سيريادان شىعارىلۋى ەلدەگى جاعدايدى قالپىنا كەلتىرۋگە كومەكتەسەتىنە سەنىمدى.

قازاقستان پارلامەنتى سەناتىنىڭ توراعاسى قاسىم-جومارت توقاەۆ رەسەيلىك اۆياتسيانى سيريادان شىعارۋ تۋرالى شەشىمگە قولداۋ ءبىلدىردى.

سەنات سپيكەرى توقاەۆتىڭ بۇگىن Twitter الەۋمەتتىك جەلىسىندەگى پاراقشاسىندا: «كرەملدىڭ اۋە كۇشتەرىن شىعارۋ جانە سيرياداعى اسكەري قيمىلداردى توقتاتۋ تۋرالى شەشىمى شىنايى ءبىتىم مەن بەيبىت ۇدەرىسكە جاعداي جاسايدى»، — دەپ جازىلعان.

رەسەي پرەزيدەنتى ۆلاديمير پۋتين 15 ناۋرىزدان باستاپ سيرياداعى اسكەردى اكەتۋدى بۇيىرعان. بۇل بۇيرىققا جەنەۆادا سيرياداعى جاۋلاسقان تاراپتار اراسىنداعى كەلىسسوزدەر باستالعان دۇيسەنبى، 14 ناۋرىزدا قول قويعانى تۋلارى جازعان بولاتىنبىز.

پۋتين اسكەريلەردىڭ قويىلعان تاپسىرمانى ورىنداعانىن ايتىپ، اسكەردى شىعارۋ شيەلەنىستى ساياسي جولمەن شەشۋگە تۇرتكى بولاتىنىنا سەنىم ءبىلدىردى. ءپۋتيننىڭ ايتۋىنشا، رەسەي اسكەرى شوعىرلانعان تارتۋس جانە حمەيميمدەگى بازالار بۇرىنعى تارتىپپەن جۇمىس ىستەي بەرمەك. رەسەي پرەزيدەنتىنىڭ ءباسپاسوز حاتشىسى دميتري پەسكوۆ سيريا پرەزيدەنتى باشار اسادتىڭ ءپۋتيننىڭ شەشىمىمەن كەلىسكەنىن ايتتى.

رەسەي سيرياداعى اۋە سوققىلارىن 30 قىركۇيەكتە باستاعان ەدى.

ال قاسىم-جومارت توقاەەۆتىڭ رەسەيگە دەگەن ەرەكشە ماحاباتى بار ەكەنىن قازاقستاندىق باق از ايتىپ جۇرگەن جوق.

توقاەەۆ مىرزانىڭ رەسەي فەدەراتسياسى اۋماعىنداعى ۇلكەندى-كىشىلى ساياساتكەرلەردىڭ ىشىندە بەدەلى جوعارى ەكەنىن وسىعان دەيىنگى مالىمدەمەلەرىنەن كورىپ-ءبىلىپ ءجۇرمىز.

مىسالى، وتكەندە ەىقۇ جيىنىندا توقاەۆتىڭ سوزىنە رەسەيلىك ساياساتكەر سلۋتسكي سۇيسىنگەنى تۋرالى دا جازعان بولاتىنبىز (http://abai.kz/post/view?id=6916).

سلۋتسكيدىڭ سوزىنەن كەيىن قازاقستاندىق كەي باسىلىمدار مەن الەۋمەتتىك جەلىلەردە قاسىم-جومارت توقاەۆتى رەسەيشىل ساياساتكەر رەتىندە ايىپتاعان پىكىرلەر جازدى. ايتپاقشى، توقاەۆ  بۇعان دەيىن «تۇركيانىڭ رەسەي اسكەري ۇشاعىن اتىپ ءتۇسىرۋى – نەگىزسىز» دەپ، رەسەيدىڭ رەسمي پوزيتسياسىن قورعاعانى تاعى بار ەدى.

نۇرزات توعجان

Abai.kz