كوميتەت قۇرامىنا ء"ادىل ءسوز" حالىقارالىق قورىنىڭ جەتەكشىسى تامارا كالەەۆا، "ادام قۇقىقتارىنىڭ حارتياسى" قورىنىڭ اتقارۋشى رەداكتورى جەمىس تۇرماعامبەتوۆا، "اق جايىق" مەديا-حولدينگىنىڭ توراعاسى ءابدىلدا مۇقاشەۆ، ماتاەۆتىڭ ادۆوكاتتارى - اندرەي پەتروۆ پەن ءمادينا باكيەۆالار كىرەدى. كوميتەت وكىلدەرى تەرگەۋشىلەردىڭ جاۋاپ الۋعا شاقىرعان باق رەداكتورلارىنان ەشتەڭەنى جاريا ەتپەۋدى تالاپ ەتۋلەرىن جانە سەيىتقازى ماتاەۆتىڭ وتباسى مۇشەلەرىن تەرگەۋگە ارەكەتتەنگەندەرىن زاڭ بۇزۋشىلىق دەپ سانايدى.

ماتاەۆتىڭ ادۆوكاتتارى «قىلمىستىق ءىس ماتەريالدارىن ءباسپاسوز بەتىندە جاريا قىلعانى ءۇشىن» سىبايلاس جەمقورلىققا قارسى ۇلتتىق بيۋرو توراعاسىنىڭ ورىنباسارى تالعات تاتۋباەۆتى جاۋاپقا تارتۋدى سۇراپ پروكۋراتۋراعا شاعىمدانعان.

ادۆوكاتتار 13 ناۋرىزدا قىلمىستىق ءىستى تەرگەۋ مەرزىمىنىڭ اياقتالعانىن، جانە قورعاۋشىلار تارابىنا ءىستى تەرگەۋدى سوزۋ تۋرالى ەشقانداي قۇجاتتىڭ بەرىلمەگەنىن ايتتى. قورعاۋشىلاردىڭ دەرەگىنشە، وتكەن سەنبىدە تەرگەۋشىلەر قان قىسىمىنىڭ جوعارىلاپ، جاعدايىنىڭ ناشارلاعانىن ايتقان ماتاەۆتى تەرگەۋگە تىرىسقان.

كوميتەت سونىمەن بىرگە بۋندەستاگتىڭ بۇرىنعى دەپۋتاتى ۆيولا فون كراموننىڭ سەيىتقازى ماتاەۆقا قاتىستى قىلمىستىق ءىس توقتاتىلماسا ەۋروپالىق دەلەگاتسيانىڭ استانادا وتەتىن EXPO-2017 كورمەسىنە بارماۋى مۇمكىن ەكەنى تۋرالى مالىمدەمەسىمەن تانىستىردى. فون كرامون Deutche Welle ارناسىنا بەرگەن سۇحباتىندا وسىلاي دەگەن. سونىمەن بىرگە 10 ناۋرىزدا ەۋروپارلامەنتتىڭ 156 دەپۋتاتى مەن 7 فراكتسياسى قول قويعان قازاقستانداعى ءسوز بوستاندىعى تۋرالى قارارىن دا ەسكە سالدى. ەۋروپارلامەنت قازاقستان بيلىگىن جۋرناليستەردى قۋدالاۋدى توقتاتۋعا، ونىڭ ىشىندە سەيىتقازى ماتاەۆتىڭ ءىسى بويىنشا زاڭسىزدىقتاردى تىيۋعا شاقىردى. ماتاەۆتى بيلىك ورىندارى مەملەكەت قارجىسىن قىمقىردى جانە سالىق تولەۋدەن جالتاردى دەپ ايىپتاۋدا. 24 اقپاننان بەرى ول ءۇي قاماۋىندا وتىر.

اbai.kz