سىرتقى ىستەر مينيسترلىگىنىڭ نازارىنا!

قازاقستانداعى شەت مەملەكەتتەر ەلشىلىكتەرىنىڭ كوپشىلىگىنىڭ رەسمي ۆەب-سايتتارى ورىس تىلىندە ەكەن. ماسەلەن، انگليا، رەسەي، قىتاي، گەرمانيا، قىرعىزستان، تۇركيا، بەلگيا قاتارلى ەلدەردىڭ قازاقستانداعى ەلشىلىكتەرىنىڭ ۆەب-سايتتارى ورىس تىلىندە سويلەپ تۇر. دەمەك، اتالعان ەلشىلىكتەرگە قازاقستاندا ءوز ەلدەرىنىڭ مۇددەسىن قورعاپ، ەكى ەلدىڭ ىنتىماعى مەن ءتۇرلى سالاداعى بايلانىستارىن ارتتىرۋ ءۇشىن قازاق ءتىلى – مەملەكەتتىك ءتىلدىڭ تۇككە دە كەرەگى جوق بولعانى. ەلشىلىكتەر ەڭ اۋەلى قازاقستاننىڭ مەملەكەتتىك تاۋەلسىزدىگى نىشاندارىنىڭ ءبىر بەلگىسى بولىپ تابىلاتىن مەملەكەتتىك تىلگە قۇرمەتپەن قاراپ، ەلدىڭ ءتىلىن ۆەب-سايتتارىنا ەنگىزۋى كەرەك ەدى. الىسقا بارماي-اق، ءوز ارىپەستەرى اقش، ليتۆا، فرانتسيا ەلدەرىنىڭ ەلشىلىكتەرىنەن ۇلگى الىپ، قازاق ءتىلىن ەنگىزگەنى قۇبا-قۇپ بولار ەدى.

البەتتە، قازاقستانداعى مەملەكەتتىك ءتىل ماسەلەسى 25 جىلدان بەرى شەشىلمەي كەلەدى. رەسمي بيلىك تاراپىنان دا مەملەكەتتىك تىلگە قاتىستى قيعاش پىكىرلەرگە تيىم بولماي  تۇر. دەسە دە، بۇل قازاقستاننىڭ ىشكى ماسەلەسى. بۇل وزگە مەملەكەتتەردىڭ ەلشىلىكتەرى قازاقستانداعى  مەملەكەتتىك ءتىلدى قۇرمەتتەمەسىن، ونى رەسمي ۆەب-سايتتارىندا ەنگىزبەسىن دەگەن ءسوز ەمەس. الدە ولار قازاقستاندى ءورىستىلدى مەملەكەت دەپ بىلە مە؟ ايتسە دە، ءبىز تىلگە قاتىستى كەمشىلىكتەر ەلشىلىكتەر تاراپىنان تەز ارادا جويىلادى دەپ ۇمىتتەنەمىز! ءوز تاراپىمىزدان بۇل ماسەلەنى تۇراقتى تۇردە قاداعالاپ وتىراتىنىمىزدى  جانە ايتقىمىز كەلەدى.

Abai.kz