"مال" بولىپ ءجۇرىپ، مال تاپتىق،
تاقىمدى قۇرتتى، "تالتاقتىق".
قازاقتىڭ داۋى - "گوسيازىك"
قازاقتىڭ جاۋى – جالتاقتىق.

پەيىلى ابدەن تارىلىپ،
شىرىگەن بايدىڭ ءبارى ۇلىق.
قازاقتىڭ داۋى - "پرەەمنيك",
قازاقتىڭ جاۋى – كارىلىك.

شەكپەندى جولى تەپ-تەگىس،
شەنسىزدىڭ جولى كەپتەلىس.
قازاقتىڭ داۋى – "رۋ تالاس"
قازاقتىڭ جاۋى – بەت تەبىس.

“تاس اتسا دۇشپان، اسپەن ۇر”،
وتباسىڭ ءۇشىن تاس كەمىر.
قازاقتىڭ داۋى- "رەسمي ءتىل",
قازاقتىڭ جاۋى - باسقا "مير".

تۇلعاعا سىرتتان تۇكىردىك،
تاباندا جاتىر، شۇكىرلىك.
قازاقتىڭ داۋى- شىڭعىس حان،
قازاقتىڭ جاۋى - بۇكىرلىك.

ءداستۇر مەن سالتتى تالاقتار،
قۇتىردى "قىسقا بالاقتار".
قازاقتىڭ داۋى- "پاراندجا”،
قازاقتىڭ جاۋى – “سالافتار”.

از ەمەس، الاش التاۋلىق،
التاۋدى قۇرتقان اڭقاۋلىق.
قازاقتىڭ داۋى - "اناندي",
قازاقتىڭ جاۋى - جالقاۋلىق.

دەنى ساۋ جاندى كەم، قور عىپ،
شەتتەسە، وعان ەڭ قورلىق.
قازاقتىڭ داۋى - "گوستەندەر",
قازاقتىڭ جاۋى- جەمقورلىق.

“مىنگىزەر اتىڭ اعاش پا؟”
ۇندەمە وندا، جاق اشپا.
قازاقتىڭ داۋى- جەرشىلدىك،
قازاقتىڭ جاۋى- “اعاشكا”.

كۇتىپ تۇر، تالاي الدا سىن،
قاناتىڭ حالقىم تالماسىن.
قازاقتىڭ داۋى تاۋسىلىپ،
قازاقتىڭ جاۋى قالماسىن!

سەرىك اباس-شاح

Facebook-تەگى پاراقشاسىنان