«جۇلدىزدار الدا كەلە جاتقان سايلاۋ تۋرالى پىكىرلەرىن ءبىلدىردى» -دەپ حابارلايدى قازاقپارات ءتىلشىسى. الماتىدا وتكەن ورتالىق كوممۋنيكاتسيالار قىزمەتىندە «سەنىڭ داۋىسىڭ – سەنىڭ بولاشاعىڭ!» اتتى پوستەرلەر بايقاۋىنا تانىمال ءانشى، سپورتشى، قوعام قايراتكەرلەرى قاتىستى. جيىندا بولعان جۇلدىزدار سايلاۋعا قاتىستى وي-پىكىرلەرىن ءبىلدىردى.

ءانشى تولقىن زابيروۆا: «مۇنداي كونكۋرستى وتكىزۋ ءداستۇرلى شاراعا اينالىپ بارادى. بۇل بايقاۋ ءوز ەلىنىڭ تاعدىرىنا بەي-جاي قارامايتىن ازاماتتار ءۇشىن ماڭىزدى دودا. مەن ءۇشىن قازىلار القاسىندا بولىپ، قاتىسۋشىلاردىڭ جۇمىسىن باعالاۋ ۇلكەن ابىروي. بيىل ەل تاۋەلسىزدىگىنىڭ 25 جىلدىعى تويلانادى. سوندىقتان، بيىلعى سايلاۋدا ءبىزدىڭ جاۋاپكەرشىلىگىمىز بىرنەشە ەسە ارتادى. ادامنىڭ وتانسۇيگىشتىك سەزىمىن بىلدىرۋگە مۇمكىندىك بەرەتىن بىرنەشە ءتاسىل بار. بىراق، سونىڭ ەڭ وزىعى – سايلاۋعا كەلىپ، ءوز داۋسىڭدى بەرۋ».

بىلعارى قولعاپ شەبەرلەرى الەم چەمپيونى نازىم قىزايباي: «قازاقستان بولاشاعى – ول ءبىزدىڭ بولاشاعىمىز. سايلاۋعا ءار جاستىڭ قاتىسۋى وتە ماڭىزدى. سپورتشىلار جاتتىعۋدان وزگە وسىنداي شارالارعا دا قاتىسۋى ءتيىس. بىلتىردان بەرى ءوزىمنىڭ داۋىس بەرۋ قۇقىعىمدى جۇزەگە اسىرىپ ءجۇرمىن».

ءانشى ءالي وقاپوۆ: «ەل نازارىندا جۇرگەن ادام رەتىندە ۇلگى بولۋىمىز كەرەك. كەلىپ ءوز پىكىرىمدى ايتىپ، تىڭدارماندارىمدى (سايلاۋعا) شاقىرىپ ءجۇرمىن. ءبىزدىڭ بولاشاق  – ءبىزدىڭ قولىمىزدا. وسىنداي بايقاۋلار ارقىلى شىعارماشىلىق قابىلەتىڭدى كورسەتۋگە مۇمكىندىك بار. ەل بىزبەن بايلانىستا».

سونداي-اق، ءالي وقاپوۆ سايلاۋعا ۇمىتكەر رەتىندە تىركەلگەن قايرات نۇرتاس پەن جانار دوعالوۆاعا قاتىستى ءوز پىكىرىن ءبىلدىردى: «مەن قارسى ەمەسپىن. ەكەۋى دە تانىمال ادامدار. ونەر جاعىنان ماڭىزدى قۇجاتتاردى ازىرلەيتىن شىعار. سايلاۋعا پيار جاعىنان جارناما جاعىنان قولداۋ كورسەتۋ ءۇشىن قاتىستىرىپ جاتقان شىعار دەپ ويلايمىن. ءبىر جاعىنان، اركىم ءوز ىسىمەن اينالىسۋى كەرەك دەپ سانايمىن. مەن  – مۋزىكانتپىن. جان-جاقتى بولۋعا دايىن ەمەسپىن».

Abai.kz