قازىرگى ۋاقىتتا  سالىق زاڭناماسىنا ءتيىستى وزگەرىستەر ەنگىزىلىپ، سالىق تولەۋشىلەردىڭ جۇمىسىن جەڭىلدەتۋ ماقساتىندا كوپتەگەن جەڭىلدىكتەر جاسالىپ جاتقانى بەلگىلى. سوعان قاراماستان، سالىق تولەۋدەن جالتارىپ، كولەڭكەلى ەكونوميكانىڭ  ىقپالىنان شىعا الماي جۇرگەن سۋبەكتىلەر سانى ءالى دە ازايار ەمەس. اتاپ ايتساق، جۋىردا الماتى قالالىق مەملەكەتتىك كىرىستەر دەپارتامەنتى ەكونوميكالىق قىلمىستاردى تەرگەۋ قىزمەتى قىزمەتكەرلەرىنىڭ  جۇرگىزگەن رەيد شارالارى بارىسىندا زاڭسىز كاسىپكەرلىكپەن اينالىسقان قۇپيا تسەحتىڭ جۇمىسى اشكەرە بولدى.

اتالمىش تسەح بىرنەشە جىل بويى جاسىرىن تۇردە ەسەپتىك باقىلاۋ ماركاسىن شىعارۋمەن اينالىسقان. بۇعان قوسا شەتەلدەردەن كونتراباندالىق جولمەن قىمبات ماركالى ۆيسكي مەن اراق («ماكاللان»، «چيۆاس»، «دجەيمەسون»، «دجەك دەنيەلس»، «ابسوليۋت»، «شۆەدكا»، «موەت»، «ۆدوۆا كليكو»، «دون پەرەنيون»، «ەلتسين») جانە  («مالبورو»، «پارلامەنت»، «مەۆيۋس، ت.ب.) سياقتى تەمەكى ونىمدەرىن اكتسيزدىك ماركاسىز اكەلىپ وتىرعان. سودان كەيىن  جالعان جولمەن اكەلگەن تاۋارلارعا وزدەرى شىعارعان اكتسيزدىك ماركالاردى جاپسىرۋ ارقىلى ساتۋمەن اينالىسقان. تاۋارلار الماتى قالاسى مەن الماتى وبلىسىنىڭ جانە ەلىمىزدىڭ باسقا دا وبلىس ورتالىقتارىنىڭ كوڭىل كوتەرەتىن تۇنگى كلۋبتارىندا، كازينولاردا، كاراوكي-بارلاردا جانە مەيرامحانالاردا تاراتىلعان.

قۇپيا تسەحتى اشكەرەلەۋ بارىسىندا الىنعان وپەراتيۆتى اقپاراتتار بويىنشا كۇدىكتى دەپ تانىلعان 4 فيگۋرانتتىڭ ءۇيىن ءتىنتۋ بارىسىندا 70 مىڭ دوللاردان اساتىن ءسپيرتتى ىشىمدىكتەر مەن 2000 دانادان اساتىن ەسەپتىك باقىلاۋ ماركاسى جانە جالعان ەسەپتىك باقىلاۋ ماركاسىن شىعاراتىن اپپارات تابىلدى. بۇل وقيعا بويىنشا ءسپيرتتى ىشىمدىكتەردىڭ ساپاسى مەن ەسەپتىك باقىلاۋ ماركاسىنىڭ جالعاندىعىن انىقتاۋ ماقساتىندا سوت-تاۋارلىق جانە تەحنيكالىق ساراپتاما تاعايىندالدى. سونىمەن قاتار قازاقستان رەسپۋبليكاسى قىلمىستىق كودەكسىنىڭ 233, 214   بابتارى بويىنشا №157500121001940 قىلمىستىق ءىس قوزعالدى.  تەرگەۋ بارىسىندا تاعىلعان ايعاقتار بۇلتارتپاستاي بولعاندىقتان، ۇستالعاندار ءوز كىنالارىن تولىقتاي مويىنداماۋعا امالدارى قالمادى. ءسويتىپ، تەرگەۋ امالدارىنىڭ دۇرىس جانە ۋاقىتىندا جۇرگىزىلۋى ءۇشىن اتسالىسۋعا  كەلىسىمدەرىن بەردى.  ياعني، قۇپيا تسەحتىڭ  قۇيتىرقى ارەكەتتەرى ءۇشىن سوت الدىندا جاۋاپ بەرەتىن كۇن دە الىس ەمەس.

الماتى قالالىق مەملەكەتتىك كىرىستەر دەپارتامەنتىنىڭ ءباسپاسوز قىزمەتى

Abai.kz