اپتا ىشىندە  «6 جاسار بالا ۇرلىعى» تۋرالى اقپارات وقىرماندار اراسىندا قىزۋ پىكىر-تالاس تۋدىرعان بولاتىن. بەلگىلى بولعانداي، كىشكەنە بالالاردى ۇرلادى دەگەن كۇدىككە ىلىنگەن ايەل بارلىق ۇرلىعىن ءبىر ستسەناري بويىنشا جاساپ كەلگەن.

60 جاستاعى زەينەتكەر ميرا ءمۇسىلىم تەرگەۋ كەزىندە بارلىق كىناسىن تولىق مويىنداپ، 6 جاسار بالانى ءوزى ۇرلاعانىن ايتقان. قازىر قۇقىق قورعاۋ ورگاندارى بالا ۇرلاۋمەن اينالىسقان زەينەتكەردىڭ ۇستىنەن «ادام ۇرلاۋ» تۋرالى باپ بويىنشا قىلمىستىق ءىس قوزعاعان. ەندى بالا ۇرلاعىش – «بابا-ياگا» جاساعان قىلمىسى ءۇشىن 12 جىلعا تەمىر تورعا توعىتىلۋى مۇمكىن. تەرگەۋ جۇمىستارى بارىسىندا بەلگىلى بولعانداي، ايىپتالۋشى وسىعان دەيىن دە بالا ۇرلاۋمەن اينالىسقان. قۇقىق قورعاۋ ورگانىنا بەرگەن مالىمدەمەسىندە، ايىپتالۋشى بالا ۇرلاۋعا نە سەبەپ بولعانىن جانە قالاي ۇرلاعانىن تاپ-تۇيناقتاي ەتىپ ايتىپ بەرگەن. ايىپتالۋشىنىڭ ايتۋىنشا، بار بولعانى ول «بالالاردى جاقسى كورەدى» -مىس.

قازىر  ۇرلانعان بالا مۇحاممەد قامشىبەك ءدىن امان وتباسىنا قايتىپ ورالعان. وعان كۇدىكتى تاراپىنان ەشقانداي ءجابىر كورسەتۋ، كۇش قولدانۋ، زورلىق-زومبىلىق جاسالماعان. كەرىسىنشە، بالا ۇرلاۋشى زەينەتكەر ءوزى ۇرلاعان بالالارعا تەك انالىق جىلىلىق كورسەتكەن.

«بەيتانىس اجەي مەنى تەك ءۇيدىڭ ىشىندە عانا ۇستادى. ال دالاعا شىققاندا تەك ونىڭ قاسىنان الىسقا ۇزامادىم.  ول كىسى ماعان تاماق بەرىپ، كۇتىپ باقتى. كەي كەزدەرى تەلەديدار كورۋگە رۇقسات ەتتى. ۇيدە تاعى ءبىر بەيتانىس اتا دا بولاتىن. ول ماعان جاقىندامايتىن. ال اجەي تۇندە دە مەنىڭ جانىمدا جاتاتىن»، - دەيدى مۇحاممەد ەسىمدى بالا.

60 جاستاعى زەينەتكەر ۇرلاپ كەتكەن 6 جاسار مۇحاممەد، بەيتانىس اجەيدىڭ ءوزىن الداپ اكەتكەنىن ايتقان.

«مەنىڭ بالام – سونداي سەنگىش جانە ءتارتىپتى بالا. ول مەنىڭ بەس بالامنىڭ ىشىندەگى ەڭ ۇلكەنى. ءوزىنىڭ ءىنى-قارىنداستارىنا قاراپ جۇرەدى. سوندىقتان دا، بەيتانىس زەينەتكەر مەنىڭ اۋىرىپ قالعانىمدى ايتقاندا قاتتى قورقىپ كەتكەن. مەن ۇيدە اۋرىپ قالسام، ارقاشان مەن ءۇشىن ۋايىمداپ جۇرەدى. كۇندىز-ءتۇنى مەن قۇدايدان بالامنىڭ ۇيگە ورالۋىن سۇرادىم»،-دەيدى ۇرلانعان  6 جاسار بالانىڭ اناسى جاننا اعابەكوۆا.

مۇحاممەد قامشىبەكتىڭ اناسى وزدەرىنىڭ باسىنا تۇسكەن قايعىعا ەنجار قاراماعان حالىققا العىسىن ايتتى.

ءتۇيىن: قازىر 6 جاسار مۇحاممەد مەديتسينالىق ساراپتامادان ءوتتى. وسى تۇستا بۇلىڭعىرلانىپ تۇرعان ءبىر ماسەلە – 6 جاسار مۇحاممەدتتى ۇرلاپ كەتكەن زەينەتكەر وسىعان دەيىن دە بالا ۇرلاۋمەن اينالىسىپ كەلگەن. تەك بەلگىلى ۋاقىتتان كەيىن ۇرلاعان بالالار ءوز وتباسىلارىنا قايتارىلعانىمەن زەينەتكەردىڭ ۇستىنەن وسىعان دەيىن قىلمىستىق ءىس قوزعالماعان. بۇل تۋرالى كەشە سايتىمىزدا جاريالانعان جۋرناليست بيبىگۇل داۋلەتبەكقىزىنىڭ ماقالاسىندا دا (http://abai.kz/post/view?id=6876) ايتىلعان ەدى.

365info.kz cايتى وسىدان ءۇش جىل بۇرىن ون كۇن جوعالىپ تابىلعان نۇراي ومىربەكتىڭ دە مۇحاممەد قامشىبەك سياقتى ۇرلانعانىن جازىپ وتىر. نۇرايدى دا كەيۋانا كەيپىندەگى ايەل «اناڭ ناۋقاستانىپ قالدى. مەنىمەن ءجۇر، ەمحاناعا بارىپ ءدارى-دارمەك اكەلەمىز»، - دەپ ەرتىپ اكەتكەن كورىنەدى. نۇرايدىڭ اكەسى  اباي يساباي بالا ۇرلاعىش ايەلدىڭ ۇستالعانىنا قۋانىپ، ونىڭ بەت-ءجۇزىن كورگىسى كەلەتىنىن ايتىپتى. اباي يساباي بالا ۇرالايتىنداردى «ادام» دەپ اتاۋدىڭ ءوزى قيىن»، -  دەيدى.  

Abai.kz