قۇمار ويىندار وتەتىن كازينولاردىڭ  بىرىندە اقشادان ۇتىلىپ، سونداعى قىزمەتكەرلەرىمەن توبەلەسكەن جىگىتتىڭ ۆيدەوسىنا قاتىستى بايان ەسەنتاەۆا تۇسىنىكتەمە بەردى. عالامتور قولدانۋشىلاردىڭ كوبى ۆيدەوداعى ازاماتتى پروديۋسەردىڭ كۇيەۋى باقىتبەك ەسەنتاەۆقا ۇقساستقان ەدى.

«بولعان جايدان حاباردارمىن. ۆيدەونى دا كوردىم. بىراق، وعان مەنىڭ كۇيەۋىمنىڭ ەشقانداي قاتىسى جوق. ولار اتتاس بولۋى نەمەسە بىرەۋلەردىڭ وسىلاي قاساقانا ىستەۋى مۇمكىن»، - دەيدى بايان ەسەنتاەۆا حانىم.

وسىدان كەيىن ىلە-شالا «كازينودا توبەلەس شىعارعان باياننىڭ ەرى باقىتبەك ەسەنتاەۆ ەمەس، اۋعان سوعىسىنىڭ ارداگەرى، ەكس-دەپۋتات، بۇگىندە 6-شاقىرىلىمداعى ءماجىلىس دەپۋتاتتىعىنان ۇمىتكەر، «نۇر وتان» پارتياسىنىڭ مۇشەسى باقىتبەك سماعۇلوۆ ەكەن»، - دەپ ءسوز تاراي باستاعان. الگىندەي ءسوزدىڭ شەتى شىعىسىمەن  Abai.kz پورتالىنىڭ رەداكتسياسىنا ارنايى قوڭىراۋ سوعىپ حابارلاسقان سماعۇلوۆ مىرزا ءوزىنىڭ بۇنداي ىسكە ەش قاتىسى جوقتىعىن جەتكىزىپ بىلاي دەدى:

- مەن – بايان ەسەنتاەۆا حانىمدى سىرتتاي ەستىگەنىم بولماسا، جۇزبە-ءجۇز كورىپ ارالاسقان، تانىس-ءبىلىس ادام ەمەسپىن. وعان تۇك تە قاتىسىم جوق. بۇل – بىرىنشىدەن. ەكىنشىدەن، مەن شىلىم شەكپەيمىن، ءسپيرتتى ىشىمدىكتەرگە جوقپىن. ۇشىنشىدەن، قۇمار ويىندارعا قۇمار ەمەسپىن، كازينولارعا بارمايمىن. بەينەباياندا قارىنى سالاقتاپ، ىرس-ىرس ەتىپ توبەلەسىپ جۇرگەننىڭ كىم ەكەندىگىن بىلمەيمىن، بىلگىم دە كەلمەيدى. اقتالعانىم ەمەس، الايدا، جۇرتتىڭ مەنى ايدالاداعى بىرەۋمەن شاتاستىرماعانى دۇرىس شىعار دەپ ويلاعاندىقتان سىزدەرگە حابارلاسىپ وتىرمىن.

باقىتبەك سماعۇلوۆ مىرزا وسىلاي دەيدى. ال، بايان بولسا، بەينەتاسپاداعى مەنىڭ «مۋجىم» ەمەس دەپ وتىر.

Abai.kz