بىردە ۇستازعا جاس جىگىت كەلىپ، بىلاي دەپتى: 
— ماعان ءسىزدىڭ كومەگىڭىز كەرەك. ءوزىمدى ومىردە ەشكىمگە كەرەكسىز، تۇككە تۇرعىسىز بەيشارا سەزىنەمىن. ءومىر سۇرگىم كەلمەيدى. اينالامداعى ادامنىڭ ءبارى مەنى قولىمنان ەشتەڭە كەلمەيتىن بەيباق، ىنجىق دەپ قۇلاق ميىمدى جەپ قويدى. ءسىز ۇستازسىز عوي، نە اقىل ايتاسىز؟! 
بىراق ۇستاز جاس جىگىتكە كوزىنىڭ قيىعىمەن عانا قارايدى دا، اسىعىس جاۋاپ بەرەدى: 
— كەشىر، اينالايىن. قولىم بوس ەمەس ەدى. ساعان ەش كومەگىم بولا قويماس. ءدال قازىر وتە ماڭىزدى ءبىر ءىستى ءبىتىرۋىم كەرەك، - از-كەم بوگەلىپ، - بىراق ەگەر سەن مەنىڭ ىسىمە قول ۇشىڭدى سوزساڭ، وندا مەن دە ساعان كومەكتەسەر ەدىم، -دەيدى. 
— قۇزىرىڭىزعا قۇلدىق، ۇستاز، بۇيىرىڭىز، — دەيدى جاس جىگىت مۇنى تاعى دا ەشكىم كوزگە ىلگىسى كەلمەگەنىنە ىشتەي قايعىرىپ تۇرىپ. 
— جاقسى، ەندەشە، — دەيدى ۇستاز، سول قولىنىڭ شىناشاعىنان اسىل تاسى بار ءبىر جۇزىكتى شەشەدى.
— كەرمەدە تۇرعان اتقا ءمىن دە، قالانىڭ ورتاسىنداعى بازارعا بار. قارىزىمدى قايتارۋ ءۇشىن مىنا گاۋھار جۇزىكتى دەرەۋ ساتۋىم كەرەك. تەزىرەك وتكىزۋگە تىرىس. بىراق التىن ءدىلدادان تومەن باعاعا كەلىسپە. ال، شاپ! جىلدام جەت! 
جىگىت جۇزىكتى الىپ شابا جونەلەدى. ساۋداگەرلەرگە جۇزىكتى ۇسىنادى. ءبارى ونى قىزىعىپ قاراي باستايدى. بىراق باعاسىن ەستىگەن سوڭ تەرىس اينالىپ كەتە بەرەدى. ءبىرى بەتىنە كۇلىپ كەتتى. اقىماق ەكەنسىڭ دەدى. تەك ەگدە جاستاعى ءبىر ساۋداگەر عانا مىناداي جۇزىك ءۇشىن التىن ءدىلدا تىم قىمبات ەكەنىن ۇعىندىردى. ارى كەتسە بىرنەشە كۇمىس تيىن بولار دەدى. 
قارت ساۋداگەردىڭ ءسوزىن ەستىگەن سوڭ جاس جىگىتتىڭ كادىمگىدەي ءجۇنى جىعىلىپ قالادى. ۇستازىنىڭ ءسوزىن جەرگە تاستاي الماي بازاردى ءبىراز اينالسوقتاپ جۇرەدى. التىن دىلداعا وتپەگەن سوڭ اتىنا ءمىنىپ قايتىپ كەلەدى. ۇستازدىڭ ءبىر ءىسىن تياناقتى بىتىرە الماعانىنا وكىنەدى. 
— ۇستاز، ءسىزدىڭ تاپسىرماڭىزدى ورىنداي المادىم، — دەپ كۇمىلجيدى جىگىت ونىڭ الدىنا كەلگەندە. — ساتسام تەك بىرنەشە كۇمىس تيىنعا عانا وتپەك، بىراق ءسىز التىن ءدىلدادان كەم باعاعا كەلىسپە دەدىڭىز عوي. ال، جۇزىك مۇنشالىقتى قىمبات تۇرمايدى ەكەن. 
— سەن قازىر وتە ماڭىزدى ءسوز ايتتىڭ، بالام! — دەيدى ۇستازى. — جۇزىكتى ساتپاس بۇرىن ونىڭ ناقتى قۇنىن ءبىلىپ العانىمىز ارتىق بولماس. ونى زەرگەر ايتپاسا، كىم ايتۋى مۇمكىن؟ زەرگەرگە بارىپ، جۇزىكتىڭ قۇنىن ءبىلىپ كەل. وسى جۇزىكتى قانشاعا باعالار ەكەن؟ بىراق ول قانشا دەسە دە، جۇزىكتى وعان قالدىرماي وزىمە قايتادان الىپ كەل، - دەيدى. 
جىگىت قايتادان اتقا وتىرىپ، شابا جونەلەدى. لەزدە زەرگەرگە كەلىپ، جۇزىكتى ۇسىنادى. زەرگەر جۇزىكتى ارى دا، بەرى دە قاراپ شىعادى. سوسىن ۇلكەيتكىش ايناسىن اكەپ تاعى ءبىراز ۋاقىت اينالدىرادى. الدەن ۋاقىتتان سوڭ عانا بارىپ جىگىتكە جاۋابىن ايتادى: 
— ۇستازىڭا ايتىپ بار، قازىر مىنا جۇزىك ءۇشىن وعان ەلۋ سەگىز التىن ءدىلدا بەرە الام. ال، ەگەر تاعى دا مۇرسات بەرسە، كۇتكەنىن ەسەپكە الىپ جەتپىس التىنعا باعالار ەدىم، - دەيدى. 
— جەتپىس ءدىلدا؟! — جاس جىگىتتىڭ قۋانىشى قوينىنا سىيماي، زەرگەرگە العىسىن ايتىپ، كەرى قايتادى. 
— مىندا وتىرشى، — دەيدى ۇستازى، جاس جىگىتتىڭ اكەلگەن جاقسى حابارىن تىڭداي وتىرىپ. – ءبىر نارسە ايتايىن، سەن سونى ۇمىتپا، بالام! گاۋھار جۇزىك دەگەن سەنسىڭ! اسىل تاس، جاقۇتسىڭ. سەنىڭ قۇنىڭدى تەك تانيتىن ادام عانا ايتار. ەندەشە، نەگە بازار جاعالاپ، قۇنىڭدى بىلمەيتىن، ءبىر كەزدەسكەن ادامنىڭ سوزىنە سەنەسىڭ؟ 

اۋدارعان شىنار ءابىلدا

Facebook-تەگى پاراقشاسىنان