بۇگىن ەلوردادا قازاقستاننىڭ پرەمەر-ءمينيسترى كارىم قاجىمقانۇلىنىڭ جەتەكشىلىك ەتۋىمەن ۇكىمەتتىڭ كەڭەيتىلگەن وتىرىسى وتۋدە.

ءماسىموۆ مىرزانىڭ كەزەكتى جينالىسىنا «كابميننىڭ» بارلىق مۇشەسى باۋ-باۋ بايانداما جازىپ كەلىپتى. مىسالى، قر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا حانىم ءوز بايانداماسىندا ەلىمىزدىڭ اۋىلدىق جەرلەرىندەگى جۇمىسسىزداردىڭ سانى 38 پايىزعا جەتكەنىن ايتتى.

«اۋىلدىق جەرلەردەگى جۇمىسسىز جاستاردى ەڭبەكپەن قامتۋ كۇن تارتىبىندەگى ماسەلەلەردىڭ ءبىرى بولىپ وتىر. اسىرەسە، ورتا ءبىلىم بەرۋ مەكەمەلەرىن (مەكتەپتەر. -رەد) اياقتاعان سوڭ، جوو تۇسە الماعان جاستاردىڭ 28 پايىزى جۇمىسسىزدار سانىن تولتىرۋدا. ال جوعارى وقۋ ورىندارىن بىتىرە الماعان اۋىلدىق جەرلەردەگى ديپلومسىز جاستاردىڭ 50 پايىزى ءتۇرلى نىسانداردا ءوزىن-ءوزى جۇمىسپەن قامتىپ وتىر»، - دەدى تامارا حانىم.

سونداي-اق، قر دەنساۋلىق ساقتاۋ جانە الەۋمەتتىك دامۋ ءمينيسترى بعم مەن بىرلەسە وتىرىپ، ورتا ءبىلىمى جوق جاستاردى كومپيۋتەرلىك ساۋاتتىلىق كۋرستتارىندا قايتا دايىنداۋ تۋرالى مەتوديكا ازىرلەپ جاتقانىن ايتتى.  

«الداعى ۋاقىتتا كاسىبي ماماندىعى جوق جۇمىسسىز جاستاردى ارنايى كومپيۋتەرلىك كۋرستاردا دايىنداپ، الەۋمەتتىك قىزمەت تۇرلەرىمەن قامتۋ تۋرالى مەتوديكانى ءبىز ءبىلىم جانە عىلىم مينيسترلىگىمەن بىرلەسە وتىرىپ ازىرلەۋدەمىز»، - دەدى تامارا دۇيسەنوۆا.

سونداي-اق، تامارا حانىم تىزگىنىن ۇستاپ وتىرعان مينيسترلىك جۇمىسسىزدىقپەن كۇرەستىڭ تاعى ءبىر ءتيىمدى جولى – قر قارۋلى كۇشتەرى قۇرىلىمىندا ەڭبەك باتالوندارىن قايتا قۇرۋ ەكەنىن جەتكىزدى.

ء«بىز قر ءىىم مەن الداعى ۋاقىتتا بۇل جوبانى قاراستىرماقپىز. جۇمىسسىزداردى، ورتا مەكتەپتەردى بىتىرگەن، بىراق، جوو-دا وقىمايتىن جاستاردى اسكەر قاتىرىنا مىندەتتەۋ جانە جۇمىسسىزداردى اسكەرگە قايتا شاقىرتۋ ارقىلى بۇرىنعى ەڭبەك باتالونىن قۇرۋدى ۇسىنامىز»، - دەدى دۇيسەنوۆا.

وتىرىس بارىسىندا پرەمەر-مينيستر كارىم ءماسىموۆ مەملەكەتتىك تىلدە بايانداما جاساپ، 15 شىلدەدە موڭعوليادا وتكەن ەۋروپا جانە ازيا ەلدەرى سامميتىنە ساپارىن قورىتىندىلادى.

كارىم ءماسىموۆ، قر ۇكىمەت باسشىسى:

- قۇرمەتتى ۇكىمەت مۇشەلەرى! مەن مەملەكەت باسشىسىنىڭ تاپسىرماسى بويىنشا موڭعوليادا وتكەن ەۋروپا جانە ازيا ەلدەرى سامميتىنە بارىپ قاتىستىم. بۇل ساپاردا مەن موڭعوليادا تۇرىپ جاتقان قانداستارىمىزدىڭ تىنىس-تىرشىلىگىمەن تانىسىپ، تابيعي اپاتتان زارداپ شەككەن بايان ولگەي جۇرتشىلىعىنا ماتەريالدىق كومەك كورسەتۋ تۋرالى شەشىم قابىلداپ، مەملەكەت باسشىسىمەن كەلىستىم. بايان ولگەيدەگى قانداستارىمىز ءبىزدىڭ بۇل باستامامىزعا ەرەكشە ىقىلاستارىن ءبىلدىردى. جەرگىلىكتى xالىق قازاقستاندىق دەلەگاتسيانى وتە جاقسى قارسى الدى. ولار گۋمانيتارلىق كومەك كورسەتكەن ەلباسىمىزعا ۇلكەن العىستارىن ايتتى. بۇل ساپار بارىسىندا ءبىز بىرقاتار ەكىجاقتى كەلىسىمدەرگە قول جەتكىزدىك. سوعان بايلانىستى مەن سىزدەرگە تومەندەگى تاپسىرمالاردى جۇكتەيمىن.

قر مادەنيەت جانە سپورت مينيسترىنە، موڭعوليا مەن قازاقستان اراسىندا مادەني ىسكەرلىك بايلانىستى ارتتىرۋ ماقساتىندا «قازاقستان-موڭعوليا» مادەني-گۋمانيتارلىق قورىن قۇرۋ تۋرالى جانە "التاي - ءبىزدىڭ ورتاق ءۇيىمىز" ەكونوميكالىق جانە مادەني-گۋمانيتارلىق جوباسىن قۇرۋ تۋرالى ۇسىنىس قارالسىن. اتالعان مينيسترلىككە بايان ولگەي قالاسىنداعى مادەنيەت ءۇيى مەن ورتالىق مۇراجايدى قايتا قالپىنا كەلتىرۋ (رەكونسترۋكتسيا) جۇمىستارىن قولعا الۋدى تاپسىرامىن.

قر ينۆەستيتسيا جانە دامۋ مينيسترىلىگى بايان ولگەي – وسكەمەن، بايان ولگەي – الماتى ارالىعىنا قاتىنايتىن اۋە رەيسىن اشۋ جۇمىستارىن رەتتەسىن.

قر اۋىلشارۋاشىلىق مينيسترىلىگى موڭعوليا تاراپىمەن سەمەي ەت كومبيناتىنا ەت تاسىمالداۋ جانە مال ونىمدەرىنىڭ كلاستەرىن قۇرۋ شارالارىن قاراستىرسىن.

قر ءبىلىم جانە عىلىم مينيسترىلىگىنە موڭعوليادان ەلمىزگە كەلىپ جوو-دا ءبىلىم الۋعا نيەتتى قانداستارىمىزعا بەرىلەتىن كۆوتا سانىن ارتتىرۋدى تاپسىرامىن.

قر سىرتقى ىستەر مينيسترلىگىنە موڭعوليانىڭ ۇلان باتىر قالاسىندا قر ەلشىلىگى عيماراتىنىڭ قۇرىلىسىن باستاۋدى جانە بايان ولگەي قالاسىندا قر كونسۋلدىعىن اشۋدى تاپسىرمىن!

ۇكىمەت وتىرسىن ونلاين-فورماتىندا وتكىزگەن پرەمەر-مينيستر مۇمكىندىگىنشە مەملەكەتتىك تىلدە سويلەۋگە تىرىستى (وكىنىشكە قاراي، ءبىزدىڭ ەلدە بۇل دا جاڭالىق بولىپ تۇر). بايانداماشىلار دا ادەتتەگىدەي قازاق تىلىندە سويلەپ، سودان سوڭ "وزدەرىنە تۇسىنىكتى" تىلگە كوشىپ وتىردى. جيىندى ءماسىموۆ كوڭىلدى لەپپەن وتكىزدى. توسىننان سۇراق قويىپ، توسىلىپ قالعانداردى بەتىنەن قاقپاي: "بايانداماڭىزدا ناقتى دەرەكتەر مەن سانداردى كورسەتىڭىز، ەگەر ونداي بولماي جاتسا، جانىڭىزعا ماسەلەنى بىلەتىن ادامداردى ەرتە ءجۇرىڭىز", - دەپ ازىلدەپ تە قويدى. قىسقاسى، ۇكىمەت وتىرىسىن ءماسىموۆ كوتەرىڭكى كوڭىل كۇيدە، ءماز-ءمايرام بولىپ وتىرىپ وتكىزدى.

نۇرزاتتوعجان

Abai.kz