كەشە الماتى قالاسىندا شەتىن وقيعا بولدى. المالى اۋداندىق ءىىب مەن ۇقك عيماراتتارىنا شابۋىل جاسالىپ، سونىڭ سالدارىنان ءۇش  پوليتسيا وكىلى جانە بەيبىت تۇرعىندار قازا تاپتى. تاعى التى ادام اۋىر جاراقات الىپ، اۋرۋحاناعا جەتكىزىلدى.

بولعان وقيعاعا بايلانىستى قازاقستاننىڭ ىشكى ىستەر ءمينيسترى قالمۇحامبەت قاسىموۆ مىرزا الماتىعا ءتۇن اۋا كەلىپ، شۇعىل بريفينگ وتكىزدى. اسىعىس كەلىپ، اسىعىس كەتكەن مينيستر الماتىنىڭ بىرنەشە جەرىندە اتىس جاساعان جالعىز ادام ەكەنىن ايتتى. ءۇش باپ بويىنشا قىلمىستىق ءىس قوزعالىپ، تۇتقىندالعان ازامات كىناسىن تولىق مويىنداعانىن دا مينيستر مىرزا تۇندە باق وكىلدەرىنە ءتۇسىندىرىپ كەتتى.

الەمنىڭ ەڭ بەيبىت قالاسىندا، بەيۋاقتا قارۋلى قاقتىعىستىڭ كەسىرەنەن ازاماتتار وپات بولدى. پرەزيدەنتتىڭ ءوزى الماتىداعى اتىستى «تەراكتى» دەپ باعالادى.

جالعىز سودىردىڭ سويقانى 2 ميلليوندىق الماتىنى اياعىنان تىك تۇرعىزعانى تۋرالى الەمدىك باق-تا جازىلدى. الماتىداعى اتىس تۋرالى الەمدىك باق نە دەدى؟ نە باجايلادى؟ «Abai.kz» پورتالى شولۋ جاسادى.

BBC.COM: «قازاقستانداعى شابۋىل: ءتورت ادامدى يسلاميستەر ءولتىردى»

دۇيسەنبى كۇنى الماتىدا ءۇش پوليتسيا قىزمەتكەرى جانە تاعى ءبىر بەيبىت تۇرعىندى ولتىرگەن قىلمىسكەر يسلاميستىك توپتىڭ سودىرى بولۋى مۇمكىن. 

قازاقستاننىڭ كوممەرتسيالىق استاناسى – الماتىدا بولعان اتىستى پرەزيدەنت نۇرسۇلتان نازارباەۆ تەرروريستىك اكتى دەپ باعالادى.

وقيعا ورنىندا تۇتقىندالعان 26 جاستاعى رۋسلان كۇلىكباەۆ بۇرىن قىلمىستى بولعان. ول قازاقستان تۇرمەسىندە جازاسىن وتەۋ كەزىندە ۋلترا-كونسەرۆاتيۆتى يسلامي ۇيىم وكىلدەرىمەن بايلانىسقان.

قازاقستاننىڭ قاۋىپسىزدىك قىزمەتى وسىنىڭ الدىندا اتىسقا قاتىسى بار دەگەن تاعى ءبىر ازاماتتىڭ ىزدەستىرىلىپ جاتقانىن ايتقانىمەن، ولاردىڭ قازىرگى پىكىرىنە سۇيەنسەك، اتىستى تەك ءبىر عانا ادام جاساعان.

الماتىدا بولعان شەتىن وقيعا اقتوبەدەگى تەراكتىدەن تۇپ-تۋرا 1 اي وتكەندە قايتالاندى. مۇنايعا باي قازاقستاندا سوڭعى كەزدەرى جەر رەفورماسىنا قارسى حالىق اراسىندا ءالسىن-ءالسىن نارازىلىقتار مەن زورلىق-زومبىلىق اكتىلەرى ورىن الۋدا.

THEGUARDIAN.COM: «قازاقستاندا سودىرلاردىڭ سويقانى كۇشەيىپ كەلەدى»

الماتى قالاسىندا كۇدىكتى يسلامشىل سودىرلار ءتورت پوليتسيا قىزمەتكەرى مەن ءبىر تۇرعىندى ولتىرگەن. سوڭعى ەكى اي ىشىندە قازاقستاننىڭ قارۋلى كۇشتەرى مەن قۇقىق قورعاۋ ورگاندارىنا جاسالىپ وتىرعان ەكىنشى شابۋىل. 18 ميلليونعا جۋىق حالقى بار مۇنايلى قازاقستاندا سوڭعى كەزدەرى يسلاميستىك شابۋىلدار ءجيى قايتالانۋدا. وسىدان ءبىر اي بۇرىن يشيم سودىرلارى اقتوبە قالاسىندا اسكەري نىسانعا شابۋىل جاساپ، 7 ادام قازا تاپقان.

قازىرگە بەلگىلى بولعانداي، مىڭداعان ادام ورتالىق ازيادان سيريا مەن يراكتاعى يشيم سودىرلارى قاتارىندا ءجۇر. يشيم جەتەكشىلەرى سودىرلارعا «جيھادتى» ءوز ەلدەرىندە جاساۋعا بۇيرىق بەرگەن.

قازاقستان - پوستكەڭەستىك ەلدەر ىشىندە ەڭ جوعارعى دەڭگەيدە دامۋشى مەملەكەت. الايدا الەمدىك نارىقتاعى مۇناي باعاسىنىڭ قۇلدىراۋى قازاقستاننىڭ ەكونوميكاسىنا اۋىر سوققى بولىپ تيگەن. قازاقستاندا ءساۋىر ايىنان باستاپ حالىقتىق نارازىلىقتار مەن ميتينگتەر ءوتىپ كەلەدى. حالىقتىڭ نارازىلىعىن تۋعىزعان ەكى فاكتوردىڭ ءبىرى – ەكونوميكالىق داعدارىس بولسا، ەكىنشىسى مەملەكەتتىڭ جەر رەفورماسىن وزگەرتۋ تۋرالى باستاماسى.

REUTERS.COM: «الماتىداعى شابۋىلدى جالعىز عانا «بانديت» جاساعان»

سالافيلىك اعىمعا جاقىندىعى بار «بانديت»، ۋلترا-كونسەرۆاتيۆتىك يسلام مەكتەبىنىڭ جولىن ۇستانۋشى ادام الماتىدا اتىس جاساپ، ءۇش پوليتسيا قىزمەتكەرىن ءولتىردى. بۇل تۋرالى قازاقستانىڭ ۇقك وكىلى ۆلاديمير جۇماقانوۆ مالىمدەدى.

ال قازاقستاننىڭ ءىىم قالمۇحامبەت قاسىموۆ قىلمىستى ەكى ادامنىڭ جاساعانىن جانە كۇدىكتىنىڭ ىزدەستىرىلىپ جاتقانىن حابارلادى.

ALJAZEERA.COM: «راديكالدى توپ وكىلى الماتىدا اتىس جاسادى»

ءۇش پوليتسيا قىزمەتكەرى مەن بەيبىت تۇرعىن الماتى قالاسىنداعى اتىس كەزىندە قازا تاپتى. قازاقستاننىڭ قۇزىرلى ورگاندارى ەلدە انتيتەرروريستىك وپەراتسيالاردىڭ باستالعانىن حابارلاعان ەدى. راديكالدى توپ وكىلى قالا ىشىندە پوليتسيا وكىلدەرىنە قارسى وق اتقان. شابۋىل قالانىڭ بىرنەشە نۇكتەسىندە قايتالانعان. قازىرگى تاڭدا ءبىر ادام قولعا تۇسكەن. جانە بىرنەشە پوليتسەي اۋىر جاراقاتتانىپ، اۋرۋحاناعا جەتكىزىلگەن.

اعىلشىن تىلىنەن اۋدارعان – نۇرگەلدى ابدىعانيۇلى

Abai.kz