قازاقستاننىڭ سىرتقى ىستەر ءمينيسترى ەرلان ىدىرىسوۆ اتامباەۆتىڭ ارتىندا تىرناعىن كەمىرىپ وتىرعان قازاقستاندىق «ساياساتكەر» ءۇشىن كەشىرىم سۇرادى،-دەپ جازادى «diapazon.kz» سايتى.

وسىنىڭ الدىندا قىرزعىزستاندىق باق قازاقستاندىق ساياساتكەردىڭ اتامباەۆتى «مازاق» قىلعىندىعىن جازعان بولاتىن.

(شىڭعىس قاراگۋجينوۆ)

كەيىن قىرعىز پرەزيدەنتىنىڭ ارتىندا وتىرىپ بەيادەپ ارەكەت جاساعان ساياساتكەردىڭ كىم ەكەندىگى انىقتالعان. الەۋمەتتىك جەلى قولدانۋشىلارىنىڭ ايتۋىنشا وقيعا تومەندەگىدەي وربىگەن. تاشكەنتتە وتكەن شانحاي ىنتىماقتاستىق ۇيىمىنىڭ كەزەكتى سامميتىندە قىرعىزستان پرەزيدەنتى بايانداما جاساعان. ءنوپىر ىشىنەن ورىن تابىلماعان قازاقستاندىق جاس ساياساتكەر شىڭعىس قاراگۋجينوۆ قىرعىزستان پرەزيدەنتى المازبەك اتامباەۆتىڭ تاپ ارتىنداعى بوس ورىندىققا جايعاسقان-مىس. كورشى ەل باسشىسىنىڭ بايانداماسى جالىقتىرىپ جىبەرگەن «ساياساتكەر» بىرەسە تىرناعىن كەمىرىپ، بىرەسە ەسىنەپ، ءالسىن-ءالسىن الدەكىممەن سويلەسىپ وتىرعان. بۇل قىرعىزستاندىقتاردىڭ نارازىلىعىن تۋدىرىپتى.

ء«بىز ءبارىمىز ادامبىز عوي. كەز كەلگەن ادام ەسىنەيدى. بۇل كادىمگى ادامي رەاكتسيا. قايتالاپ ايتامىن، ءبىز ادام بولعان سوڭ مۇنداي ارەكەتتەر قالىپتى. ديپلومات – بۇل ەرەكشە ماماندىق. ءاردايىم اباي بولۋى كەرەك. ونىڭ ۇستىنە بۇل حالىقارالىق جيىن. زالدا بارلىق كامەرالار قوسىلىپ تۇرعانىن دا ەسكەرۋ كەرەك. وكىنىشكە وراي ول كامەراعا ءتۇسىپ قالدى. نەمەسە كامەرالى زالدا وتىرعانىن ءوزى ۇمىتىپ قالعان بولۋى كەرەك. ەگەر مەنىڭ كەشىرىم سۇراۋىم، ديپلوماتتىڭ ارەكەتىنە نارازى ادامداردى تىنىشتاندىراتىن بولسا، كەشىرىڭىزدەر. مەن ول جىگىتتى جاقسى تانيمىن. شىڭعىس ۆاشينگتوندا جۇرگەندە ونىڭ جۇمىسىن ءوز كوزىممەن كورگەنمىن. ول ءبىزدىڭ ستۋدەنتىمىز ەدى. ساباق ۇلگەرىمى دە وتە جوعارى بولدى. مەنىڭشە ول «بولاشاق» باعدارلاماسىمەن وقىعان بولۋى كەرەك. سوندىقتان ونىڭ كاسىبيلىگىنە داۋ جوق. مەن سول بالانىڭ كامەرالى زالدى بولىپ قالعانى ءۇشىن وكىنىشتىمىن. ەندى ەسكەرەتىن جايت ەكەن. وزگە ديپلوماتتار ونداي ماڭىزدى جيىنداردا ەسىنەپ وتىرماۋى كەرەك»،-دەيدى ەرلان ىدىرىسوۆ مىرزا.

قازاقستاندىق ساياساتكەرلەر اراسىندا قىرعىزستان مەن ونىڭ ساياساتكەرلەرىن، باسشىلارىن كۇلكىگە اينالدىرۋ قالىپتى جاعدايعا اينالىپ كەتكەندەي. وسىنىڭ الدىندا قر مادەنيەت ءمينيسترى ارىستانبەك مۇحاماديۇلى «قىرعىز گاستاربايتەرلەرى» تۋرالى ورىنسىز ءسوز ايتىپ، كوپشىلىكتىڭ اشۋىنا تيگەن-ءتىن. ارىستانبەك مىرزانىڭ ارتىنان ىلە-شالا ءبىرىنشى ۆيتسە-پرەمەر باقىتجان ساعىنتاەۆ تا قىرعىزداردى كەكەتىپ وتكەن. ۇكىمەت جيىنىندا پرەمەر-مينيستر كارىم ءماسىموۆ ساعىنتاەۆقا ەسكەرتۋ جاساپ، «قىرعىزدارعا كۇلۋگە» بولمايتىنىن ايتىپ، ءوزى كۇلگەن ەدى.

وسىدان كەيىن قىرعىزستان پرەزيدەنتى المازبەك اتامباەۆتىڭ ءوزى باق-قا سۇحبات بەرىپ، قازاقستاندىق ساياساتكەرلەردىڭ كەلەمەجىنە جاۋاپ بەرگەن.

ەندى  شانحاي ىنتىماقتاستىق ۇيىمىنىڭ كەزەكتى سامميتىندە تاعى ءبىر ساياساتكەر شىڭعىس قاراگۋجينوۆ وزگەلەرىنەن اسىپ ءتۇسىپتى. بۇل دا قازاقستاندىق ساياساتكەرلەردىڭ ساياسي مادەنيەتىن جالپاق جۇرتقا ايگىلەپ بەرگەنى وكىنىشتى بولسا دا شىندىق.

نۇرزات توعجان

Abai.kz