حان تاڭىرىگە جول اشىق
1 شىلدەدەن باستاپ تۋريستەر حان ءتاڭىرى شىڭىنا قازاقستان جاعىنان شىعا الادى. بۇعان ۇلتتىق كاسىپكەرلەر پالاتاسىنىڭ بەلسەندى جۇمىسىنىڭ ارقاسىندا قول جەتتى
2010 جىلى قىرعىزستاندا بولعان جاعدايعا بايلانىستى شەكارا بويىنداعى قارقارا وزەنى ارقىلى چار قۇدىق شاتقالىنا وتەتىن كوپىر جابىلىپ قالعان ەدى. سونىڭ سالدارىنان ورتالىق تيان-شان تاۋلارى مەن ونىڭ حان ءتاڭىرى شىڭىنا قازاقستان جاعىنان شەتەلدىك جانە وتاندىق الپينيستەرگە جول جابىلدى. ورتالىق تيان-شان تاۋلارىنا باراتىن تۋريستەردى قىرعىزستان جاعىنان قابىلداۋ ارقىلى بۇل جاعدايدى قىرعىزستاننىڭ تۋروپەراتورلارى وڭتايلى پايدالانىپ، كوشپەلى ءتۋريزمدى دامىتۋدا.
اتالعان ماسەلەنى جۇيەلى شەشۋ ءۇشىن قر ۇكپ قر ينۆيستيتسيالار جانە دامۋ مينيسترلىگىمەن بىرىگىپ، قازاقستان رەسپۋبليكاسى مەن قىرعىز رەسپۋبليكاسى اراسىندا «تۋريستىك توپتاردىڭ ترانسشەكارالىق باعىتتا جانە شەكارادا ورتاق قولدانىستاعى جولداردى پايدالانا وتىرىپ، مەملەكەتتىك شەكارانى كەسىپ ءوتۋدى رەتتەۋ ءتارتىبى تۋرالى» ۇكىمەتارالىق كەلىسىم ازىرلەگەن ەدى. ونىڭ ماقساتى 1 شىلدەدەن باستاپ 1 قازانعا دەيىنگى ارالىقتا 5 جەردەن (قارقارا وزەنى ارقىلى چار قۇدىق شاتقالىنا اپاراتىن كوپىر، كوكجار جانە چوڭ-جالاڭاش وزەنىنىڭ قۇيىلىسى، اشۋتور اسۋى، سارىبۇلاق اسۋى، وزەرنىي اسۋى) بەكىتىلگەن تاۋ باعدارى بويىنشا ۇيىمداسقان تۋريستىك توپتارعا ارنالعان جىل سايىنعى ماۋسىمدىق وتكىزۋ ورىندارىن اشۋ.
قازىرگى تاڭدا كەلىسىمدى قىرعىز تاراپى قاراستىرۋدا.
اتالعان ۇكىمەتارالىق كەلىسىمنىڭ كۇشىنە ەنۋىنە دەيىن قازاقستانداعى تۋريستىك تاۋ ماۋسىمىن ۇزبەۋ ءۇشىن 2013-2016 جىلدار ارالىعىندا ۇلتتىق كاسىپكەرلەر پالاتاسى قر ۇقك شەكارا قىزمەتىمەن بىرلەسە وتىرىپ، شەتەلدىك تاۋ تۋريستەرىنىڭ ۇيىمداسقان توپتارىنا ارناپ ورتالىق تيان-شاندا ماۋسىمدىق وتكىزۋ ورىندارىن اشۋعا قاتىستى كوپ جۇمىس اتقاردى.
2016 جىلدىڭ 1 شىلدەسىنەن 1 قىركۇيەگىنە دەيىن تۋريستەردە قازاقستاندىق جاقتان حان ءتاڭىرى شىڭىن باعىندىرۋعا مۇمكىندىك بار. وسىعان بايلانىستى «حان ءتاڭىرى» حالىقارالىق الپينيستىك لاگەرىنىڭ ديرەكتورى، الپينيزم جانە شىڭعا ورمەلەۋشىلەر فەدەراتسياسىنىڭ پرەزيدەنتى قازىبەك ۋاليەۆ ۇكپ-نىڭ اتىنا ورتالىق تيان-شان تاۋلارىندا حالىقارالىق ەكولوگيالىق ءتۋريزمدى دامىتۋعا اتسالىسقاندارى ءۇشىن العىس حات جىبەردى.
اباي-اقپارات
