قازاقستاننىڭ مەملەكەتتىك قارىزى 2016 جىلدىڭ 1 قاڭتارىندا ءجىو 21,6 پايىزىن قۇرادى,-دەپ حابارلايدى  «قازاقپارات» پورتالى.

كەشە حالىققا ەسەپ بەرگەن قر قارجى ءمينيسترى باقىت سۇلتانوۆ وسىلاي دەپ مالىمدەگەن.

ءمينيستردىڭ ايتۋىنشا، بورىشتاردى باسقارۋ ەل بيۋدجەتىنىڭ ماڭىزدى ورنىقتى پارامەترلەرىنىڭ ءبىرى بولىپ تابىلادى. «وسى باعىتتا  حالىقارالىق تاجىريبە بويىنشا قارىزدىڭ قاۋىپسىزدىگىن بىلدىرەتىن شەكتى ءمان بەلگىلەنگەن. وسىعان سايكەس مەملەكەتتىك قارىز ءجىو 60 پايىزىنان اسپاۋى كەرەك، ال ونى تولەۋ مەن پايىزدارىن جابۋ باعىتىنداعى اتقارىلاتىن قىزمەت بيۋدجەت كىرىسىنىڭ 15 پايىزىنان اسپاۋعا ءتيىس. قازاقستاننىڭ مەملەكەتتىك قارىزى 2016 جىلدىڭ 1 قاڭتارىندا ءجىو 21,6 پايىزىنا تەڭ بولدى، ال وعان قىزمەت كورسەتۋ 9,8 پايىز. وزدەرىڭىز كورىپ وتىرعانداي بۇل شەكتى ماننەن الدەقايدا الىس»، – دەدى مينيستر.

مينيستر مىرزانىڭ ايتۋىنا قاراعاندا، «مەملەكەتتىك قارىز» رەيتينگىندە قازاقستان 134 ەلدىڭ اراسىندا 12 ورىندا تۇر. «ارينە، بورىشتىق باسقارۋ ماسەلەسى ۇدايى باقىلاۋدا جانە اعىمداعى بيۋدجەتتىك تۇجىرىمداماعا سايكەس الداعى ۋاقىتتا تاپشىلىقتى قىسقارتۋعا باعىتتالعان جۇمىستار اتقارىلاتىن بولادى»، – دەدى ب. سۇلتانوۆ.

وتكەندە ەكس-سپيكەر باقتىقوجا ىزمۇحامبەتوۆتىڭ توراعالىق ەتۋىمەن وتكەن پارلامەنت پالاتالارىنىڭ بىرلەسكەن وتىرىسىندا دەپۋتاتتار قارىز ماسەلەسىنە قاتىستى كارىم ءماسىموۆ مىرزانىڭ كومانداسىن سۇراقتىڭ استىنا الىپ، بەرەشەگى كوپ قازاقستاننىڭ كەلەشەگىنە الاڭداۋشىلىق بىلدىرگەن-ءتىن.

رەسمي دەركتەرگە سۇيەنسەك، ەلىمىزدىڭ سىرتقى قارىزى 145 ملرد.  دوللار بولسا، ونىڭ 40 ميللاردتتان استامى مەملەكەتتىڭ بەرەشەگى ەكەن. بۇل — ۇلكەن سوما. سونداي-اق، قارجى ءمينيسترى سۇلتانوۆتىڭ سوزدەرىنە سەنسەك، ناقتى ماقساتتارعا بولىنگەن قازىنا قارجىسىنىڭ 7,8 ملرد. تەڭگەسى تاعى يگەرىلمەي قالىپتى. دەمەك بۇل سومانىڭ دا دىتتەگەن ماقساتىنا جەتپەي، ورتا جولدان ويراندالعانى ما؟ مۇنى ازسىنساڭىز، بىلتىر 1,6 ترلن. تەڭگەنىڭ زاڭ بۇزۋشىلىقتارىنا جول بەرىلگەن كورىنەدى. مۇنىڭ كولەڭكەسىندە جالعان كاسىپكەرلىك تۇرۋى دا ابدەن مۇمكىن ەكەنىن سول كەزدە دەپۋتاتتاردىڭ وزدەرى ايتقان ەدى. ماسەلەن، بىلتىر 300 ملرد. تەڭگە زاڭسىز قولما-قول اقشاعا اينالدىرىلىپتى. ال بىلتىر مەملەەتىمىز بيۋدجەت تاپشىلىعىن جابۋ ءۇشىن شەتەلدەن تاعى دا 1,1 ترلن. تەڭگەگە جۋىق قاراجات قارىزعا الىپتى. ميللياردتاعان سوماعا حالىق قاراجاتى ءتيىمسىز، تالان-تاراج بولسا، وندا لاۋازىمدى ادامدار تەك تارتىپتىك، ءارى كەتسە اكىمشىلىك جاۋاپكەرشىلىككە تارتىلادى. وسى دۇرىس پا؟
ءبىزدىڭ شەنەۋنىكتەردىڭ «جالى كۇجىرەيىپ» جۇرەتىندىكتەن، ولارعا «ارىق اتقا قامشى اۋىر» دەپ ايتۋ قيسىنعا كەلمەس. دەگەنمەن ء«بارى كەرەمەت» دەگەن سوزگە سەمىرىپ، بوساڭسىپ كەتكەندەرىن جونگە سالاتىن كەز كەلدى ەمەس پە؟ قازاقستان – «قارىزستانعا» اينالىپ كەتپەي تۇرعاندا،  بيۋدجەتتىڭ جىرتىعىن جاماۋ ءۇشىن سىرتتان قارىز العاندى دوعارۋ كەرەك. 11 جىلدى وڭدىرىپ جۇمىس جاساماعان كارىم ءماسىموۆ كومانداسىنا سەنىمسىزدىك ءبىلدىرۋ كەرەك!

نۇرزات توعجان

Abai.kz