رەسپۋبليكا ۇستازدارىنىڭ «اعارتۋشى» قوعامدىق قوزعالىسى قۇرىلدى، - دەپ حابارلايدى اباي-اقپارات. بۇل قوزعالىس قازىرگى كۇنى بار تەپەرىشتى كورىپ، ءوز قۇقىعىن قوعاي الماي جۇرگەن ۇستازدار قاۋىمىنا قورعان بولماقشى.

قازىرگى كەزدە قوردالانىپ وتىرعان ءبىلىم ماسەلەسى كىم-كىمدى بولسا دا بەي-جاي قالدىرعان ەمەس. دەسەك تە ءبىلىم سالاسىنداعى ءتۇرلى رەفورمالار، جەمقورلىق تاعى دا باسقا تولىپ جاتقان پروبلەمالار مۇعالىمدەردىڭ ەڭسەسىن باسا تۇسەتىنى تاعى راس. وزگەنىڭ باقىتىن ايالاپ، ءوزىنىڭ بالاسىنا قاراۋعا مۇرشاسى جوق مۇعالىمنىڭ مارتەبەسىن كوتەرۋ، ولارعا كومەك قولىن سوزۋ ءۇشىن رەسپۋبليكالىق مۇعالىمدەردىڭ «اعارتۋشى» قوعامدىق قوزعالىسى قۇرىلدى.

كەشە قوزعالىستىڭ قۇرىلتايشىلارى بەكىتىلىپ توراعاسى بولىپ مۇعالىمدەردىڭ پروبلەماسىن كوتەرىپ جۇرگەن ءومىر شىنىبەكۇلى سايلاندى. ول كىسى شىمكەنت قالاسىنداعى №41 مەكتەپتىڭ تاريح جانە قۇقىقتانۋ ءپانىنىڭ مۇعالىمى، جوعارى ساناتتى ۇستاز، 1-دەڭگەيلى سەرتيفيكات يەگەرى (كەمبريدج تەحنولوگياسى), ء"بىلىم بەرۋ ءىسىنىڭ ۇزدىگى", قازاقستان جۋرناليستەر وداعىنىڭ مۇشەسى. بۇعان دەيىن مۇعالىمدەر اراسىنداعى بىرنەشە داۋ-دامايدى شەشۋگە اتسالىسقان.

نەگىزى قوزعالىستىڭ باستى ماقساتى - ءبىلىم جۇيەسىندەگى جەمقورلىقپەن كۇرەسۋ. جەمقورلىقپەن، ءبىلىم سالاسىنداعى كەلەڭسىزدىكپەن كۇرەسكەن مۇعالىمدەرگە كومەك كورسەتۋدى، قاداعالاۋدى، ءتيىستى ورىنداردى قۇلاقتاندىرۋدى باستى نازاردا ۇستاپ، باق قۇرالدارى ارقىلى ەلگە جەتكىزۋ. سونداي-اق قوزعالىس مۇعالىمدەر مەن اتا-انالاردىڭ قۇقىقتىق ساۋاتىن اشۋ، قۇقىقتىق كومەك بەرۋ، قولداۋ كورسەتۋ، قۇقىق پەن مىندەتتىڭ قاتار جۇرەتىنىن ۇعىندىرۋ ىسىمەن دە شۇعىلدانادى. ۇستازداردىڭ شىعارماشىلىعىنىڭ جانە بەلسەندىلىگىنىڭ دامۋىنا قاجەتتى جاعدايلار تۋعىزۋ، ولاردىڭ قۇقىقتارىن قورعاۋ قوزعالىستىڭ نەگىزگى ماقساتتارىنىڭ ءبىرى بولماق. بۇل ماقساتتارعا جەتۋ جولىندا قوزعالىس ۇستازدار اراسىنداعى شىعارماشىلىقتى قولداۋ، عىلىمي-زەرتتەۋ جۇمىستارىنا مەملەكەتتەن جانە دەمەۋشىلەردەن قاراجات تاۋىپ بەرۋ، مۇعالىمدەر اراسىندا قوعامدىق پىكىر قالىپتاستىرۋ (بۇقارالىق اقپارات قۇرالدارى ارقىلى دا), ازاماتتىق قوعام جانە قۇقىقتىق مەملەكەتتى دامىتۋ باعىتىندا كەشەندى جۇمىستار جۇرگىزبەك. 

سونىمەن بىرگە  ۇستازداردىڭ الەۋمەتتىك ماسەلەلەرىن شەشۋدى قاراستىرۋ، مەملەكەتتىك اتقارۋشى جانە وكىلدىكتى ورگاندارمەن الەۋمەتتىك ارىپتەستىك ورناتۋ، ۇستازدار، بالالار جانە اتا-انالاردىڭ قۇقىعىنىڭ ورىندالۋىن قاداعالاۋ،  قوعامداعى ءتۇرلى الەۋمەتتىك-ساياسي پروبلەمالاردى، سونداي-اق ۇستازدار ماسەلەلەرىن الەۋمەتتىك زەرتتەۋ تۇرعىسىنداعى جۇمىستارىن ۇيىمداستىرادى. 

مۇعالىم بەدەلىن كوتەرۋ، ۇستازداردىڭ وزىق تاجريبەلەرىن ناسيحاتتاۋ جانە ۇستازداردىڭ قۇقىقتارى مەن بوستاندىقتارىن، زاڭدى مۇددەلەرىن قورعاۋ، ينتەلەكتۋالدى ۇلت قالىپتاستىراتىن ءبىلىم باعدارلامالارىن دايىندايدى.

مۇعالىمنىڭ قوعامداعى بەدەلىن كوتەرۋ باعىتىنداعى ءتۇرلى ارەكەتتەر مەن شارالاردى جۇزەگە اسىرۋ جانە وسى باعىتتا مەملەكەتتىك ورگاندارعا ۇسىنىستار جاساي وتىرىپ  ەكونوميكالىق، الەۋمەتتىك، مادەني جانە وزگە دە سالالاردا مۇعالىمدەر قۇقىقتارىنىڭ بۇزىلۋى وقيعالارىن جويۋعا ارەكەت جاساۋ جانە قاجەتتى جاعدايدا كوپشىلىكتىڭ، مەملەكەتتىك ورگاندار مەن الەمدىك قاۋىمداستىقتىڭ نازارىن اۋدارۋعا كۇش سالادى.

مۇعالىمنىڭ الەۋمەتتىك جاعدايىن جاقسارتۋ باعىتىندا مەملەكەتتىك ورگاندارعا ۇسىنىستار بەرۋ جانە وسى باعىتتاعى زاڭ جوبالارىنىڭ ازىرلەنۋى مەن قابىلدانۋىنا ات سالىسىپ،  جالپى ازاماتتىق رۋحاني يگىلىكتەردىڭ ءورىس الۋىنا قامقورلىق جاسايدى. 

قازىرگى كەزدە بەلەڭ الىپ وتىرعان  مۇعالىمدەر مەن قوعام پروبلەمالارىن زەرتتەۋ،  تۇرعىنداردىڭ ينتەللەكتۋالدىق دامۋى تۋرالى باستامالارىن قولداپ،  قازاقستان رەسپۋبليكاسىنداعى قۇقىقتىق تاربيەلەۋدى ناسيحاتتاۋ جانە قۇقىقتىق نيگيليزمدى جويۋ ءىس-شارالارىن جۇزەگە اسىرادى.
ادام، ونىڭ قۇقىقتارى، بوستاندىقتارى جانە مۇددەلەرى- قۇقىقتىق مەملەكەتتىڭ جوعارعى قازىناسى رەتىندەگى قۇقىقتىڭ قورعالۋىنىڭ مىندەتتىلىگىن ناسيحاتتاپ،  قۇقىق قورعاۋشى قىزمەتىن جۇزەگە اسىرا وتىرىپ، مۇعالىمدەردىڭ  كونستيتۋتسيالىق قۇقىقتارى، بوستاندىقتارى جانە مۇددەلەرىن قورعايدى. 

زاڭمەن بەلگiلەنگەن تاسiلدەردi قولدانا وتىرىپ، جەكە جانە ۇجىمدىق ەڭبەك داۋلارىن شەشۋ قۇقىعىن جۇزەگە اسىرۋعا ات سالىسىپ، بىرلەستىك قۇرۋ ماقساتتارىنا وراي قازاقستان رەسپۋبليكاسى زاڭنامالارى شەڭبەرىندە حالىقارالىق ىنتىماقتاستىقتى جۇزەگە اسىرىپ، نىعايتادى.

قوزعالىس وسى باعىتتاردى نەگىزگە الا وتىرىپ جۇمىس جاسايتىن بولادى.  جۇمىس بارىسىندا ينتەرنەت جۇيەسى مەن الەۋمەتتىك جەلىلەر بەلسەندى پايدالانىپ، قازاقستاننىڭ ءار وبلىسىنان قوزعالىستىڭ جەكە توپتارى دا جۇمىس ىستەيتىن بولادى. ول مۇعالىمدەردىڭ قۇقىعىنىڭ تاپتالۋىنا، جەمقورلىقتىڭ الدىن الۋ، نەمەسە بولعان فاكتورعا بايلانىستى جەكەلەنگەن بەلسەندى مۇعالىمدەردىڭ قۇقىعىنىڭ تاپتالماۋىنا، جۇمىسىنىڭ ساقتالۋىنا قاداعالاۋ جاسايتىن بولادى.

م. تەمىربەكوۆ، «اعارتۋشى» قوعامدىق قوزعالىسىنىڭ مۇشەسى

Abai.kz