اقتوبەدە ىزدەۋ سالىنعان كۇدىكتى لاڭكەستەردىڭ ءبىرى دميتري تاڭاتاروۆ بۇگىن اۋرۋحاناعا جەتكىزىلدى، - دەپ حابارلايدى Qamshy.kz.

ول قالادا تاڭەرتەڭ بولعان ارنايى وپەراتسيا كەزىندە جاراقات الىپتى. وبلىستىق دەنساۋلىق ساقتاۋ باسقارماسىنداعىلار ونىڭ جاعدايى اۋىر ەكەنىن، قازىر وپەراتسيا جاسالىپ جاتقانىن ايتقان.

كەشە وسى د. تاڭاتاروۆتىڭ اعاسى ۆلاديمير تاڭاتاروۆ باۋىرىنا ۆيدەوۇندەۋ جولداعان ەدى. وندا ۆ. تاراكانوۆ ىنىسىنە قارۋدى تاستاپ، پوليتسياعا بەرىلۋگە كەڭەس بەرەدى.

كۇدىكتىلەر قالاداعى تاۋلىك بويىنشا جالعا بەرىلەتىن پاتەرلەردىڭ بىرىنە جاسىرىنعان كورىنەدى. لاڭكەستەر پوليتسيانىڭ قارۋدى تاستاپ، بەرىلۋ تۋرالى تالابىنا قۇلاق اسپاي، وق جاۋدىرعان. ارنايى جاساق پاتەردى شابۋىلداۋ بارىسىندا قاراقشىلاردىڭ تورتەۋىن ولتىرگەن. بۇگىن قالانىڭ باسقا اۋدانىندا تاعى ءبىر كۇدىكتىنىڭ پوليتسيا كولىگىن اتقىلاعانى، پوليتسيا جاۋاپ رەتىندە اتقان وقتان قازا تاپقانى بەلگىلى بولدى. قاراقشىنىڭ وعى ەكى پوليتسيا قىزمەتكەرىن جارالاعان.

ەستەرىڭىزگە سالساق، 5 ماۋسىمدا اقتوبەدە بولعان لاڭكەستىك شابۋىلدان 7 ادام قازا بولىپ، 38 ادام جاراقات الدى. سودان بەرى پوليتسيا 18 قىلمىسكەردىڭ كوزىن جويعان. 9 قىلمىسكەر ۇستالعان. ءالى ەكەۋى بوي تاسالاپ ءجۇر. ولار تۋرالى مالىمەت ۇسىنعان ادامعا 5 ملن تەڭگە كولەمىندە سىياقى تاعايىندالىپ وتىر.

اباي-اقپارات