قاراسۋ اۋدانىنىڭ جەكە كاسىپكەرى اتانىپ ۇلگەرگەن جولدىباي وسۋپوۆ – ون بەس جىلدىق ەڭبەك ءوتىلى بار اياق كيىم تىگۋ شەبەرى.  

ول بيزنەسمەن دەگەن مارتەبەگە ەندى عانا بوي ۇيرەتۋدە، ويتكەنى اياق كيىم جوندەۋگە ارنالعان جەكە شەبەرحاناسىن ءبىر اي بۇرىن عانا اشقان-دى. بۇعان دەيىن سەرۆيس جاعى ءبىرشاما اقساپ تۇردى. جولدىبايعا اۋىلداستارى تەلەفون شالۋ ارقىلى تاپسىرىس بەرەتىن، سودان كەيىن ول قوڭىراۋ كەلىپ تۇسكەن ۇيلەردى ارالاي ءجۇرىپ، بۇلىنگەن اياق كيىمدەردى ۇيىنە جيناپ الىپ كەلەدى. ول اياق كيىمدەردى جوندەۋگە بارىن سالادى: جامايدى، تىگەدى، جەلىمدەيدى، ءبىر سوزبەن ايتقاندا، ءوز بەتىمەن ۇيرەنىپ العان، ءارى جىلدار بويى شىڭدالعان ادىستەردىڭ ءبارىن قولدانادى. ءۇي جاعدايىندا جۇمىس ىستەپ كەلگەن شەبەردىڭ كليەنتتەرى جەتەرلىك بولدى. اسىرەسە، كوكتەم مەن كۇزدە.

ونىڭ بۇل تالانتى اۋداندىق اكىمدىككە دە، كاسىپكەرلەر پالاتاسىنا دا جەتتى. ءسويتىپ، قاراسۋدا كەڭەس ۇكىمەتى تاراعاننان بەرى اياق كيىم جوندەيتىن ءبىر دە ءبىر شەبەرحانا بولماعاندىقتان، جولدىبايعا وسى ولقىلىقتىڭ ورنىن تولتىرۋعا ۇسىنىس جاسالدى.

ول «بيزنەستىڭ جول كارتاسى – 2020» باعدارلاماسى بويىنشا گرانتقا ءوتىنىش ءبىلدىرىپ، 660 مىڭ تەڭگەدەي قاراجاتقا يە بولدى. بۇل قاراجاتتى ول تىگىن ماشيناسى جانە باسقا دا قاجەتتى قۇرال-جابدىقتار ساتىپ الۋعا جۇمسادى.

«قازىر دۇكەن عيماراتىنان ءبىر بولمەنى جالعا الىپ وتىرمىن.  ادام كوپ جۇرەدى، ال تولەم 10 مىڭ تەڭگە. ارتىقشىلىقتارى كوپ. ەندى كليەنتتەرگە ءوزىم بارمايمىن، ولار ماعان كەلەدى.  بۇدان ەل اياعى ازايعان جوق، ەلدەر جاڭا شەبەرحانا بارىن ءبىلىپ العان، كۇنىنە 5-6 ادامنان كەلەدى.  بۇل تابىسى جىل ون ەكى اي بويى ءتۇسىپ تۇراتىن ماماندىق»، – دەيدى جولدىباي وسۋپوۆ.

بيزنەسىن جاڭا باستاۋشى جولدىباي مامانداردىڭ كومەگىنسىز جاڭا ءىستى دوڭگەلەتۋ مۇمكىن ەمەس ەكەنىن مويىندايدى.  بۋحگالتەرلىك جانە سالىقتىق ەسەپ-قيساپتى كاسىپكەرلىكتى قولداۋ ورتالىعىنىڭ ماماندارى جاساپ بەرەدى.  ولار كاسىپكەردىڭ كەز كەلگەن سۇراقتارىنا جاۋاپ بەرىپ، پروتسەستى جەڭىلدەتە تۇسەدى.

 «مەن قاعاز جۇمىستارعا باسىمدى قاتىرمايمىن، ءوز جۇمىسىمدى اتقارامىن.  ۋاقىت وتە كەلە، ارينە، بارلىق قىر-سىرىن مەڭگەرىپ الام»، – دەيدى كاسىپكەر.

كاسىپكەرلەر پالاتاسىنىڭ فيليالىندا وسى جىلدىڭ باسىنان باستاپ قاراسۋ اۋدانىنىڭ تۇرعىندارىنا 300-دەن استام تەگىن بيزنەس-كەڭەستەر بەرىلگەن.  ال وبلىس بويىنشا بارلىعى 6 مىڭداي ادام كەڭەس العان. سونىڭ ناتيجەسىندە  220 ادام جەكە ءىسىن اشىپ نەمەسە بۇرىننان بار بيزنەسىن كەڭەيتىپ ۇلگەردى.

Abai.kz