ارداقتى اعايىن، اق نيەتتى الاش جۇرتى!

دۇنيەنى الديلەيتىن دە، ايالايتىن دا، الەمدى الاقانىندا تەربەتەتىن دە جۇمىر باستى پەندەنىڭ ءبىر-بىرىنە دەگەن مەيىرىمى. كوڭىلگە قاناعات بەرىپ، كەۋدەگە راقىم نۇرىن قۇياتىن باۋىرمالدىعى. سول ەكى ۇلى سەزىمنىڭ دە مىناۋ سىن ساعاتتا جۇرەكتەرىڭنەن تابىلىپ جاتقانىنا قاتتى شۇكىرشىلىك ەتۋدەمىن، الاش ازاماتتارى. ويتكەنى جەر تاعدىرى – ەل تاعدىرى. قادىرى قانىندا قالار، قاسيەتى جانىڭدا جۇرەر اتا-بابادان باستاپ ۇل – ۇرپاقتىڭ كىندىك قانى تامعان كيەلى اتاجۇرتتى نارىقتىڭ زاڭدىلىعى دەگەن جەلەۋمەن بيلىكتەگىلەردىڭ ساۋداعا سالۋ تۋرالى قيتۇرقى ارەكەتى بارشامىزدى الاڭداتىپ-اق وتىر. ەل بىرلىگىن دىتتەيتىن ەرلەردىڭ، جەر بۇتىندىگىن تۇپتەيتىن ازاماتتاردىڭ ناقتى ءىس- شارالار اتقارۋعا كىرىسىپ كەتكەنىن دە بىلەمىز. الايدا كوڭىل ءالى دە كۇپتى. ادامنىڭ قولىنان جاسالىپ جاتقان زاڭسىزدىققا ادام بالاسى توتەپ بەرە المايتىن كىساپىر زامانعا دۋشار بولدىق. سول سەبەپتى دە اتا-بابامىزدىڭ قانىمەن تازارىپ، ساۋىلداعان تەرىمەن سۋارىلعان قازاقتىڭ قاسيەتتى دالاسى، كيەلى جەرى ساتىلماسىن ءھام شەتەلدىككە جالعا دا بەرىلمەسىن دەپ ون سەگىز مىڭ عالامنىڭ يەسى – اللا تاعالاعا دۇعا قىلىپ، تىلەك تىلەسەك، ادامشىلىعىمىزعا دا، مۇسىلمانشىلدىعىمىزعا دا، قازاقشىلدىعىمىزعا دا جات بولماس ەدى. قانى ءبىر باۋىرلار،  جانى ءبىر جەرلەستەر، الدا كەلە جاتقان ايلاردىڭ سۇلتانى – رامازان ايىنىڭ قاسيەتتى قادىر ءتۇنىنىڭ الدىندا، دالىرەك ايتقاندا 24 ماۋسىم – قاسيەتتى جۇما كۇنى استانا ۋاقىتى بويىنشا كەشكى ساعات 19. 00-دە الەمنىڭ ءار تۇكپىرىندە جۇرگەن قانى قازاق باۋىرلار ءبىر نيەتپەن، ءبىر جۇرەكپەن الاقانىمىزدى جايىپ، «قۇدىرەتى كۇشتى، اللا تاعالام، ءيا راببىم، قازاقتىڭ كەڭ بايتاق دالاسىن، ۇلان-عايىر جەرىن ۇرپاقتارىمىزدىڭ  ۇرپاعىنىڭ يگىلىگىنە قالدىرا كور! ەلىمىزگە تىنىشتىق پەن بۇتىندىك بەرە كور!» دەپ قۇلشىنا تىلەك تىلەپ، دۇعا قىلايىق. «قۇداي» دەگەن قۇر قالمايدى» - دەپ اتا-بابالارىمىز بەكەر ايتپاعان.

شىن تىلەسە، اللانىڭ راحىمىنان ارتىق ءھام مەيىرىمىنەن كۇشتى ەشتەڭە جوق. جاراتقان حاق تىلەگىمىزدى قابىل ەتسىن! اللا جار بولسىن، اعايىن!

سوفى سماتاەۆ،

الاش اقساقالدارىنىڭ اتىنان

Abai.kz