اۋىل شارۋاشىلىعىندا كووپەراتيۆتەر قۇرۋ تۋرالى تاپسىرمانى پرەزيدەنت ن.نازارباەۆ ءوزىنىڭ «قازاقستاندىق جول – 2050» اتتى جولداۋىندا بەرگەن ەدى. ونىڭ قۇقىقتىق نەگىزى بولاتىن زاڭ دا قابىلدانعان.

ەندى سول زاڭدى اۋىلشارۋاشىلىعى تۇرعىندارىنا، شارۋالارعا ءتۇسىندىرۋ كەرەك قوي. وسى جۇمىستار قالاي جۇرگىزىلىپ جاتىر دەپ ءماجىلىس دەپۋتاتتارى اۋىل شارۋاشىلىعى ۆيتسە-مينيسترىمەن ارنايى كەزدەسۋ وتكىزدى. مينيسترلىك پەن ۇلتتىق كاسىپكەرلەر پالاتاسى بىرلەسىپ، زاڭدى ءتۇسىندىرۋ بويىنشا جۇمىس توبىن قۇرعان. الايدا دەپۋتاتتار اۋىلدى جەرلەرگە كەزدەسۋلەرگە بارعاندا شارۋالار ولاردىڭ جۇمىسىنان مۇلدە بەيحابار ەكەنىن ءبىلىپ قايتقان. سوندا جۇمىس توبى كىمدەرگە، نە تۇسىندىرگەن؟ الدە... الدە اكىمدەردەن ءبىر-ءبىر قويدىڭ باسىن جەپ، جىلى ساۋنالارعا ءتۇسىپ، جۋرناليستەردىڭ قارماعىنا ءتۇسىپ قالماي امان-ەسەن قايتقان با؟  

ارينە، دەپۋتاتتار ۆيتسە-مينيسترگە مۇنى اشىپ ايتقان جوق، بىراق سولاي ەكەنىن ەمەۋرىنمەن اڭعارتىپ، ونى ءۇنسىز شىعارىپ سالدى. ال بەلسەندى دەپۋتات ايقىن قوڭىروۆ پرەمەر-مينيستر ك.ءماسىموۆتىڭ اتىنا دەپۋتاتتىق ساۋال جولداپ، وندا زاڭدى حالىققا ءتۇسىندىرۋ باعىتىندا قانداي ماسەلەلەرگە قاتتى نازار اۋدارۋ كەرەكتىگىن ايتتى.

وكىنىشتىسى سول، پرەمەر-مينيسترگە زاڭ جوباسىن ءتۇسىندىرۋ بويىنشا ارنايى قۇرىلعان جۇمىس توبىنىڭ مۇلدە ناتيجەسىز جۇمىس ىستەگەنى (نەمەسە ىستەمەگەنى) تۋرالى ءبىر اۋىز ءسوز ايتىلمادى. ولاردىڭ ءىسساپار مەن تاماعىنا كەتكەن اقشالارىنىڭ عانا جىلاپ كەتكەنى سەزىلىپ تۇر...

سەرىك ەلەۋ، ساراپشى

Abai.kz