بۇل حات اباي اقپاراتتىق پورتالىنىڭ ەلەكتروندى پوچتاسىنا كەلىپ ءتۇستى. ەلىمىزدەگى سپورت ماسەلەسى تىكەلەي مادەنيەت جانە سپورت مينيسترلىگىنىڭ قارايتىنى بەلگىلى. بىراق، اۆتورىمىز بۇل حاتتى ءتيىستى مينيسترلىكتىڭ باسشىسى ارىستانبەك مۇحامەديۇلىنىڭ اتىنا ەمەس، قورعانىس ءمينيسترى يمانعالي تاسماعانبەتوۆتىڭ نازارىنا ۇسىنۋدى ءجون ساناپتى. ءبىز اشىق حاتتى وزگەرتپەي، سول قالپىندا جاريالاۋدى ءجون سانادىق. 

اباي اقپاراتتىق پورتالى

قازاقستان رەسپۋبليكاسىنىڭ

قورعانىس ءمينيسترى ي.ن.تاسماعامبەتوۆكە

اشىق حات

قۇرمەتتى يمانعالي نۇرعاليۇلى!

ءوزىڭىزدى قالىڭ قازاق جۇرتى مەملەكەتتىك دەڭگەيدەگى قوعام قايراتكەرى، ۇلتتىق نامىسى مەن رۋحى بيىك حالىقشىل ازامات رەتىندە تانيدى ءام قۇرمەتتەيدى. سوندىقتان وسى اشىق حاتىمدى وزىڭىزگە ۇلكەن ۇمىتپەن جولداپ وتىرمىن. مەنىڭ قىزىم نازىم يششانوۆا كوپ جىلدان بەرى بوكسپەن تۇراقتى اينالىسىپ كەلەدى. 2013 جىلى بولگاريادا وتكەن الەم چەمپيوناتىندا ەلىمىزدىڭ نامىسىن قورعاپ، قولا جۇلدەگەر اتانعان. 2015 جىلى قىتايدىڭ تايپەيىندە وتكەن الەم چەمپيوناتىندا ەكىنشى رەت ەل نامىسىن بەرمەي، قولا جۇلدەنى يەمدەندى. سپورتتى ونىڭ ىشىندە قازاقستان بوكسىن ءجىتى قاداعالايتىن قاۋىم نازىم يششانوۆانىڭ ەسىمىن جاقسى تانيدى. ونىڭ حالىقارالىق جارىستارداعى جەتىستەكتەرىن جاقسى بىلەدى.

بىلتىر قازان ايىندا ەل چەمپيوناتىندا 60 كەلى سالماق دارەجەسىندە قازاقستان چەمپيونى اتاندى. ارادا التى اي ۋاقىت وتكەندە قازاقستان چەمپيوناتى قايتا وتكىزىلدى. نازىم ول جەردە دە چەمپيون بولىپ شىقتى. ءبىر ەمەس، ەكى مارتە چەمپيوندىق اتاعىن قورعاپ قالعان سپورتشى كەلەسى الەم چەمپيوناتىنا جىبەرىلۋى ءتيىس ەدى عوي. بىراق، 2016 جىلدىڭ 19 مامىرىندا استانادا وتەتىن الەم چەمپيوناتىنا نازىم يششانوۆا ەمەس، ەكى رەتتە دە نازىمنان وڭباي ۇتىلعان استانالىق ريمما ۆولوسەنكو قاتىساتىن بولدى.

قازاقستاننىڭ بوكس فەدەراتسياسى مۇنداي شەشىمدى قانداي نەگىزگە سۇيەنىپ قابىلداعانى بىزگە دە، بوكسسۇيەر كورەرمەنگە دە تۇسىنىكسىز بولىپ وتىر.

ريمما ۆولوسەنكونىڭ الەم چەمپيوناتىنا جىبەرىلەتىندەي سپورتتىق جەتىستەكتەرى دە شامالى ەدى. ءارى-بەرىدەن سوڭ، سپورت شەبەرى اتاعى دا جوق.  ءتىپتى، سپورت شەبەرىنە ۇمىتكەر ەمەس ادامدى چەمپيوننىڭ ورنىنا ەل نامىسىن قورعاۋعا جىبەرۋ – ەلدىك نامىسقا كوز جۇمىپ قاراۋ ەمەس پە؟!

بۇل الەم چەمپيوناتى بيىلعى ريو-دە-جانەيرودا وتەتىن وليمپيادا ويىندارىنا جولداما سالىناتىن ماڭىزدى دودا.

ايتسەدە قبف  ادىلەتسىزدىك جاساپ، سىبايلاستىققا جول بەردى. ريمما ۆولوسەنكو استانا قالالىق  سپورت باسقارماسىنىڭ باسشىسى بەرىك بارلىبايۇلى مىرجىقپاەۆتىڭ دايىنداپ جۇرگەن بوكسشىسى ەدى.

قبف ءبىزدىڭ شاعىمىمىزعا «نازىم ءالى جاس قوي، كەيىن شىعادى» دەگەن سىلتاۋ ايتتى. سپورتشى قىزىمىز ءدال بابىندا تۇرعاندا باسەكەگە قوسپاۋ – ادامنىڭ جىگەرىن قۇم قىلىپ، تاۋىن شاقپاي ما؟!

سوندا قبف ءۇشىن ەل نامىسى مەن رۋحىنىڭ بيىكتەپ، ەلىمىزدىڭ كوك بايراعى كوكتەن جەبلىرەگەنى ەمەس، ءوزارا «بارماق باستى، كوز قىستىلىق» قىمبات بولعانى ما؟

نازىمنىڭ جولىن كەسۋ ارقىلى ەلىمىزگە ابىروي اكەلەر جازعى وليمپيادا التىنىن ءوزىمىز كەرى تەۋىپ جاتقان شىعارمىز. ەلىم دەيتىن ەستى ازاماتتار مۇنداي جاعدايدا ويلانۋى ءتيىس!

قۇرمەتتى يمانعالي نۇرعاليۇلى! اتالعان اشىق حاتتى جولداي وتىرىپ، وزىڭىزدەن اراشا، ادىلدىك ءام قولداۋ كۇتەمىز!

بەيبىت يششانوۆ، ايەلدەر اراسىنداعى بوكستان قازاقتان چەمپيونى، سپورت شەبەرى نازىم يششانوۆانىڭ باپكەرى.

http://abai.kz/post/view?id=7902 

 Abai.kz