«ارتىق ىستەگەن ۋاقىت ءۇشىن اقشا قوسا ما؟». "قايدان؟! باستىقتار بىزگە "دو شەستي چاسوۆ تى رابوتال دليا سەبيا، ا پوسلە شەستي تى دولجەن رابوتات دليا پراۆيتەلستۆا" دەپ ۇيرەتەدى» دەيدى اتىن جاريا ەتۋدى قالامايتىن قىزمەتكەرلەر. كەشكى التىدان كەيىن بايعۇستاردىڭ ءجىپسىز بايلانىپ وتىرعانى. ۇيلەنگەندەرى بالاسىن بالاباقشادان الۋدى ءبىر-بىرىنە تاپسىرىپ جاتقانى. قاپتاعان تۇرمىسقا شىقپاعان قىزدار، ۇيلەنبەگەن جىگىتتەر. ء«وي، اينالايىندار، ءومىر ءوتىپ بارادى، ۇيلەنبەيسىڭدەر مە؟» دەيمىز. «وي، اعاي، جۇمىستان تۇنگى توعىز، وندا شىعامىز. تانىسۋعا، قىدىرۋعا ۋاقىت قايدا؟ تاڭەرتەڭ 08.50-دە جۇمىستا بولۋ كەرەك. ەلەكتروندىق كارتىشكەمەن كىرگىزەدى. كەشىكسەڭ جازا تارتاسىڭ، جالاقىڭ ازايىپ قالۋى كادىك. سوندىقتان جەكە ومىرىمىزگە ۋاقىت قالمايدى!» دەپ اعىنان جارىلادى كەيبىر ءىنى-قارىنداستارىمىز.

ءىس جۇزىندە ولار 11-12 ساعات جۇمىس ىستەيدى. ارتىق ىستەگەن ساعاتتارىن وتەپ جاتقان ەشكىم جوق. ءتىپتى سەنبى، جەكسەنبى كۇندەرى امالسىز جۇمىسقا شىعاتىندارى بار.

سوندا «ەڭبەك كودەسى» كىم ءۇشىن جازىلعان؟ ەگەر ۇكىمەت ورىنداماسا، مينيسترلىكتەر، اكىمشىلىكتەر ورىنداماسا ول كودەستىڭ كىمگە كەرەگى بار؟ سەگىز ساعات جۇمىس مىندەتتى. قىزمەتكەرلەردى قاناۋعا نەگە جول بەرىلەدى؟ ءجىپسىز بايلانعان جەردە ءجوندى ناتيجە بولا ما؟ ەگەر شەنەۋنىكتەردىڭ تاڭ اتقاننان ءتۇن جارىمعا دەيىن ىستەگەنىنەن ەكونوميكا گۇلدەنىپ كەتەر بولسا وندا قازاقستان وتىزدىق تۇگىلى العاشقى وندىققا كىرمەس پە ەدى؟ الايدا ستاتدەرەكتەر ەكونوميكانىڭ كەرى كەتىپ بارا جاتقانىن ايدان انىق كورسەتىپ تۇر عوي. ەگەر ۇكىمەت ءوز جۇمىسىن ءتيىمدى ۇيىمداستىرا السا شارۋانى التىعا دەيىن دە تىندىرۋعا بولادى.

سوندىقتان كەشكى ساعات التىدان كەيىن قىزمەتكەرلەر ەشكىمنىڭ رۇقساتىنسىز ۇيلەرىنە قايتا بەرۋى كەرەك. شەنەۋنىكتەر حالىقتان زاڭعا باعىنۋدى تالاپ ەتەردەن بۇرىن تارتىپكە وزدەرى باعىنۋى كەرەك دەپ ويلايمىن!

مارات توقاشباەۆتىڭ Facebook-تەگى پاراقشاسىنان الىندى

Abai.kz