وڭتۇستىك قازاقستان وبلىسى شاردارا اۋدانىندا ءبىراز جىلدان بەرى جۇمىسى توقتاپ تۇرعان بالىق ءوسىرۋ تالىمباعى بيىلدان باستاپ قايتا ىسكە قوسىلدى.ء ساۋىر ايىنان باستاپ اۋداندا بالىق شارۋاشىلىعىن دامىتۋ ماقساتىندا اشىلعان «شاردارا بالىق پيتومنيگى» جشس-ىندە شاباقتار جىبەرىلە باستادى. بۇگىندە جالپى اۋماعى 68,2 گەكتاردى قۇرايتىن توعان ىسكە قوسىلىپ، 15,7 ميلليونن دانا بالىق بالاڭقۇرتتارى (ليچينكا) وسىرىلۋدە. 

بۇدان بولەك، اۋدانداعى «تۇران» شارۋا قوجالىعى ارنايى بالىق وسىرەتىن ورىننىڭ قۇرىلىسىن دايىنداۋ ۇستىندە. قازىرگى تاڭدا وندا ورىنداردى قازۋ، قۇرال-جابدىقتاردى ورناتۋ جۇمىستارى جۇرگىزىلۋدە.
سونداي-اق، جەرگىلىكتى جەكە كاسىپكەرلەردىڭ ۇيىمداستىرۋىمەن پيلوتتىق جوبا رەتىندە شاردارا سۋ قويماسى اۋماعىنان بالىقتى تورلى شارباقتا ءوسىرۋ شارۋاشىلىعىن (سادكوۆوە ۆىراششيۆانيە) قولعا الۋ جۇمىستارى دا جۇرگىزىلىپ جاتىر. 2014 جىلى وسىناۋ تورلى شارباقتا سىناق رەتىندە 15 توننا بالىق وسىرىلسە، بىلتىرعى جىلى 300 توننا شاباق ءوسىرىلدى. سۋ قويماسىنداعى تورلى شارباقتا كەلەشەكتە 3000-4000 توننا كولەمىندە بالىق ءوندىرۋ جوسپارلانىپ وتىر. 

ايتا كەتۋ كەرەك، بۇگىنگى تاڭدا شاردارا اۋدانىندا ەكى بالىق وڭدەۋ زاۋىتى جۇمىس ىستەپ كەلەدى. سونىڭ ءبىرى – جىلىنا 2500 توننا بالىق وڭدەۋمەن اينالىساتىن «حاميت» ستك بالىق وڭدەۋ زاۋىتى. اتالمىش كاسىپورىن بازاسىندا فيلە، كەپتىرىلگەن، تۇزدالعان بالىقتى وڭدەۋ جانە دايىنداۋ، قالدىقسىز ءوندىرىستى قولعا الۋ ماقساتىندا بالىق سۇيەگىنەن ۇنتاقتالعان جەم دايىنداۋ تسەحتارى جۇمىس جاساۋدا. 
جىلىنا 1000 توننا مۇزداتىلعان جانە ىستالعان بالىق، فيلە ونىمدەرىن شىعاراتىن «شاردارا – بالىق-1» بالىق وڭدەۋ زاۋىتىندا 70 ادام جۇمىس جاسايدى.

سونىمەن قاتار، جىل سوڭىنا دەيىن شاردارادا تاعى دا جاڭادان ەكى بالىق زاۋىتى ىسكە قوسىلماق.  «ۇدەمەلى يندۋستريالدى-يننوۆاتسيالىق دامۋ باعدارلاماسى» اياسىندا سالىنىپ جاتقان زاۋىتتا جەكە كاسىپكەر «جالعاسباەۆ ت» جانە «ساودات» جشس-ءى جىلىنا ارقايسىسى 600 توننا بالىق ونىمدەرىن ءوندىرۋدى جوسپارلاپ وتىر.

سامال جايلاۋبەك

Abai.kz