مەمتەرمينكومنىڭ نازارىنا!

قازاق زاڭ تەرمينولوگياسى قالىپتاسىپ كەلە جاتىر دەپ ايتىلىپ تا جازىلىپ تا ءجۇر. دەگەنمەن، كەيبىر تەرميندەر ورىسشادان تىكەلەي اۋدارىلىپ، قولدانىلىپ ءجۇر، وعان مىسال رەتىندە «پوتەنتسيالنىە پوستاۆششيكي» تىركەسىن ايتۋعا بولادى.

مەمتەرمينكومنىڭ نازارىنا!

قازاق زاڭ تەرمينولوگياسى قالىپتاسىپ كەلە جاتىر دەپ ايتىلىپ تا جازىلىپ تا ءجۇر. دەگەنمەن، كەيبىر تەرميندەر ورىسشادان تىكەلەي اۋدارىلىپ، قولدانىلىپ ءجۇر، وعان مىسال رەتىندە «پوتەنتسيالنىە پوستاۆششيكي» تىركەسىن ايتۋعا بولادى.

زاڭدار مەن نورماتيۆتىك قۇقىقتىق اكتىلەردە «پوتەنتسيالنىە» ءسوزىن ءبىر ماعىنادا عانا قولدانعان جايتتاردى كورۋگە بولادى. «پوتەنتسيال - الەۋەت»، الايدا «پوتەنتسيالنىە» دەگەن ءسوز ورىس تىلىندە ىقتيمال، بولۋى مۇمكىن دەگەن ماعىنانى دا بەرەتىنىن ۇمىتپاعان ءجون. مىسالى، مەملەكەتتىك ساتىپ الۋ تۋرالى زاڭىندا  («مەملەكەتتىك ساتىپ الۋ تۋرالى» قازاقستان رەسپۋبليكاسىنىڭ 2007 جىلعى 21 شىلدەدەگى N 303 زاڭى) «پوتەنتسيالنىە پوستاۆششيكي» تىركەسى «الەۋەتتى ءونىم بەرۋشىلەر» دەپ اۋدارىلعان. بۇل جەردەگى ناقتى ماعىنا تولىق اشىلمايدى. مۇنداعى «پوتەنتسيالنىە» الەۋەتتى ماعىناسىن ەمەس، ىقتيمال، بولۋى مۇمكىن ماعىناسىن بەرەدى، ال «پوستاۆششيك» ءسوزى دە دۇرىس اۋدارىلماعان، مۇندا ول جاي عانا «ءونىم بەرۋشى» ەمەس، جۇمىستى، ءونىمدى، قىزمەتتى جابدىقتاۋشى، جەتكىزۋشى رەتىندە ايتىلىپ وتىر (قالدىباي بەكتاەۆتىڭ قازاقشا-ورىسشا سوزدىگىندە (167-بەت) جابدىقتاۋشىنى پوستاۆششيك جانە سنابجەنەتس دەپ بەرگەن), سوندىقتان «پوتەنتسيالنىە» ءسوزىنىڭ ءبىر ماعىناسىن عانا ەمەس، مۇمكىن دەگەن ماعىناسىن دا قولدانعان ءجون دەپ ەسەپتەيمىن. ال «ءونىم بەرۋشى» تىركەسىن تىكەلەي اۋدارساق «دايۋششيە پرودۋكتسيۋ» بولادى. سوندىقتان، ءتىل جاناشىرلارىن وسى تىركەستى تالقىلاپ، مەمتەرمينكوم الدىندا «پوتەنتسيالنىە پوستاۆششيكي» ءسوز تىركەسىن «ىقتيمال جابدىقتاۋشىلار» دەپ وزگەرتۋدى ۇسىنامىن.

p/s: دالەلدى ءۋاجدارىڭىز بولسا تالقىلاۋعا ءازىرمىز... جانە دە وسىنداي ولقىلىقتار مەن سايكەسسىزدىكتەر قازاقشا زاڭدار مەن نورماتيۆتىك قۇقىقتىق اكتىلەردە ءورىپ ءجۇر، سولاردىڭ بارلىعىن بىرتە-بىرتە بولسا دا ءبىر ىزگە، جونگە كەلتىرۋگە ات سالىسايىق.

بولات رايىس، «قر زاڭ شىعارۋ ينستيتۋتىنىڭ» اۋدارما بويىنشا باس ساراپشىسى