كۇنى كەشە جۇرت امانتاي قاجى توقال الدى دەپ شۋلاعان-دى. دەسە دە، جاس بويجەتكەن قاجىنىڭ كوڭىلىنەن شىقپاعان سىڭايلى. سەبەبى، ول ءالى دە توقال ىزدەپ ءجۇر. بۇل تۋرالى مۇحيت ساپارباەۆتىڭ “باستى قاھارمان” باعدارلاماسىندا ايتىلدى دەپ جازادى stan.kz.

امانتاي قاجى ءوزىن قابانباي باتىردىڭ تىكەلەي ۇرپاعىمىن دەپ سانايدى. ينجەنەر-مەحانيك ماماندىعى بويىنشا ءبىلىم العان امانتاي قاجى ءبىر كەزدەرى الماتى قالاسىندا ۆاز كولىك ورتالىعىن باسقارعان. الايدا وسىدان 20 جىل بۇرىن مەككەگە بارىپ كەلگەن سوڭ، قاجىنىڭ ومىرگە دەگەن كوزقاراسى تۇبەگەيلى وزگەرەدى. بۇرىنعى جۇمىسىنان باس تارتىپ، ءتۇرلى قارسىلىق ناۋقاندارىن ۇيىمداستىرادى.

“انام دىنگە بەرىلگەن ادام. ءوزىنىڭ كورىپكەلدىك قاسيەتى دە بار. ول ۇنەمى ماعان “سەن ءوزىمشىل بولىپ كەتپە. ءۇي-كۇيى جوق، باقىتسىز جاندارعا كومەكتەس. سەنى الدا ۇلكەن جەتىستىكتەر كۇتىپ تۇر دەپ ايتاتىن”، – دەيدى امانتاي قاجى.

بيىل امانتاي قاجى 75 جاسقا تولىپ وتىر. ول اناسىنىڭ كورىپكەلدىك قاسيەتىنىڭ وزىنە دە جۇققاندىعىن ايتادى. مەككەگە 10 رەت بارعان. بۇگىندە 5 ۋاقىت نامازىن قالدىرماي وقيدى. 1990 جىلدان باستاپ ناۋرىزباي باتىر مەن شەۆچەنكو كوشەلەرىنىڭ اراسىندا ءتۇرلى اكتسيالار ۇيىمداستىرۋدا. مۇنىمەن قاتار، 1999 جىلدان باستاپ ءوزىن پرەزيدەنتتىككە ۇسىنىپ كەلەدى.

قاجى كوشە بويىنا “اتتان” سوزدەرىن جازۋمەن قاتار، اعاش باسىنا شىققاندى ۇناتادى. دەسە دە، بۇل تريۋكتى ول سوڭعى 3 جىلدا جاساماعان ەكەن. مۇحيت ساپارباەۆتىڭ باعدارلاماسىنا ارناپ 30 مەترلىك اعاشتىڭ ەڭ بيىك شىڭىنا شىقتى. مۇنىمەن قاتار، اتالعان باعدارلامانىڭ ۇيىمداستىرۋشىلارى ونى موليا ەسىمدى جاس قىزبەن تانىستىرعان. قاجىنىڭ ءوزى اللاعا سەنەتىن، پاك قىزدى قالايتىن كورىنەدى.

العاشىندا قاجى بويجەتكەندى كورىپ ساسىپ قالادى. ونى كورە سالىسىمەن جۇزىنە كۇلكى ءۇيىرىلىپ، قاتتى ۇيالادى. “بارلىعى بىردەن بولىپ كەتپەيدى. مۇنىڭ قالاي؟! ءالى كورۋ كەرەك. بۇل قىزدان جاراتقان شاپاعاتىن اياماسىن. بالكىم مەن دە وعان لايىق ەمەس شىعارمىن. بۇل جەردە مەنىڭ عانا قالاۋىم جەتكىلىكسىز. ارادا ماحاببات پەن ەكى عاشىقتىڭ اراسىنداعى ەرەكشە بايلانىس بولۋى ءتيىس”، – دەيدى امانتاي قاجى.

وسى ۋاقىتقا دەيىن قاجىنىڭ 4 ايەلى بار ەكەن دەگەن قاۋەسەت تارالعان-دى. دەسە دە، ول وسى كۇنگە دەيىن ءبىر عانا ايەلمەن كوڭىل جاراستىرعاندىعىن ايتۋدا. موليا مەن امانتاي قاجى تۇسىرىلىمنەن كەيىن ارباتتا تاعى ءبىر مارتە جولىعادى. وسى كەزدە ول جاس بويجەتكەنگە سىيلىق بەرەدى. دەسە دە، بۇل بويجەتكەن كوڭىلىنەن شىقپاسا كەرەك. سەبەبى، ول ءالى دە توقال ىزدەيتىندىگىن ايتقان.

Abai.kz