«سارى» دەڭگەي اقتوبە جانە الماتىداعى وقيعالاردان كەيىن ەنگىزىلگەن ەدى. ءبىزدىڭ بيلىك ول شابۋىلداردى "تەراكت" دەپ اتادى.

5 ماۋسىمدا بەلگىسىز توپ اقتوبەدەگى ۇلتتىق ۇلاننىڭ اسكەري بولىمىنە قارۋمەن شابۋىلدادى. شابۋىلداۋشىلاردى بيلىك "راديكالدىق ءدىني اعىم" وكىلدەرىنە جاتقىزدى. شابۋىل كەزىندە ءتورت تۇرعىن جانە ءۇش اسكەر قىزمەتكەرى قازا تاپتى.

18 شىلدەدە الماتىدا ءبىر ادام پوليتسيا قىزمەتكەرلەرىنە شابۋىل جاساپ، بەس ادامدى ءولتىردى.

ەندى، وسى "سارى" دەڭگەي 2017 جىلدىڭ 15 قاڭتارىنا دەيىن سوزىلىپ وتىر. وسى ورايدا "سارى" دەڭگەيدىڭ ۋاقىتى نەگە 15 قاڭتارعا دەيىن تاڭدالىنىپ الىندى؟" دەگەن زاڭدى سۇراق تۋىندايدى. 

بىرىنشىدەن، كولەڭكەسىنەن ۇركەتىن شەندىلەرىمىز تاۋەلسىزدىكتىڭ 25 جىلدىعى مەن جەلتوقسان كوتەرىلىسىنىڭ 30 جىلدىعىن تويلاۋعا ۇرەيلەنىپ وتىر. ولار وسى ايتۋلى مەرەكەلەردە "سارى دەڭگەيدى" جەلەۋ ەتىپ، حالىقتىڭ كوپ جينالماۋى ءۇشىن بار كۇشىن سالماقشى. 

ەكىنشىدەن، جەر كوميسسياسى وڭ شەشىم قابىلداپ، ءموراتوريدى بەس جىلعا سوزۋدى ۇسىندى. بۇل ارادا ەلباسى شەشىمى قالاي بولاتىنى ءالى بەلگىلى ەمەس. سوندىقتان دا، ەلدى ۇرەيدە ۇستاپ، "سارى دەڭگەيدى" ساقتاپ تۇرعان ءتيىمدى. 

ۇشىنشىدەن، جاڭا جىلدىڭ الدىندا ازىق-تۇلىك قىمباتتاپ، حالىق تۇتىناتىن تاۋارلاردىڭ باعاسى شارىقتاۋى مۇمكىن. مۇنداي كەزدە حالىق مىنەز كورسەتىپ جاتسا، "سارى دەڭگەي" دەگەن تاپتىرمايتىن سىلتاۋ. 

ءتۇيىن

قوش! ءبىز اقتوبەدەگى ءھام الماتىداعى جاعدايلاردان كەيىن ەلىمىزدە تەراكت بولۋ قاۋپى جوق دەي المايمىز. دەسەك تە، ازات ەل بولعانىمىزدىڭ 25 جىلدىعىن حالىق ۇرەيمەن ەمەس، قۋانىشپەن قارسى الۋى ءتيىس. ول ءۇشىن ەلباسىمىز "قازاق جەرى شەتەلدىكتەرگە ماڭگىلىككە ساتىلمايدى ءھام جالعا بەرىلمەيدى، جەر داۋىنا قاتىستى ءىستى بولعان ازاماتتار بوساتىلسىن" دەپ ءسۇيىنشى حابار تاراتسا، بىزگە "سارى دەڭگەيدىڭ" تۇككە قاجەتى بولماي قالار ەدى. 

ءسىز نە دەيسىز؟

ءشارىپحان قايسار

Abai.kz