قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي، «قازاقستان رەسپۋبليكاسى پرەزيدەنتىنىڭ كۋبوگى ءۇشىن» جاسوسپىرىمدەر اراسىنداعى فۋتبولدان وتكەن حالىقارالىق تۋرنير مارەسىنە جەتتى. حالىقارالىق باسەكەدە قازاقستاندىق قۇرامانىڭ باعى مەن بابى قاتار شاۋىپ، ەلباسىنىڭ جۇلدەسىنە يە بولدى. جارىس جەڭىمپازدارىن ماراپاتتاعان ءوڭىر باسشىسى ب.اتامقۇلوۆ فۋتبولشىلارعا العىسىن ءبىلدىردى. بۇل تۋرالى وقو اكىمىنىڭ ءباسپاسوز قىزمەتى حابارلايدى.

ويىنعا توقتالساق. فۋتبولدان جاسوسپىرىمدەر اراسىندا قازاقستان رەسپۋبليكاسى پرەزيدەنتىنىڭ كۋبوگىنىڭ فينالىندا قازاقستان مەن تاجىكستان قۇرامالارى كەزدەستى.

شىمكەنت قالاسىنىنىڭ قاجىمۇقان اتىنداعى ورتالىق ستاديوندا وتكەن ويىن ەسەپتى قازاقستان جاسوسپىرىمدەر قۇراماسىنىڭ شابۋىلشىسى ەركەبۇلان سەيداحمەت اشتى. ول ءبىرىنشى تايمنىڭ اياقتالۋىنا بەس مينۋت قالعاندا مەرگەندىك تانىتتى. سونىمەن قاتار، ءبىرىنشى تايمنىڭ ورتاسىندا دەنيس كراسنوپەروۆ تەپكەن دوپ قاقپا تورىنان تابىلعان ەدى. الايدا، تورەشىلەر قازاقستاندىق شابۋىلشىنىڭ ويىننان تىس قالعانىن بىردەن اڭعاردى.

ەكىنشى تايمدا ەسە قايتارۋعا تىرىسقان تاجىكستان قۇراماسىنىڭ باس باپكەرى زاينيددين راحيموۆ بىرنەشە فۋتبولشى الماستىردى. ناتيجەسىندە ۆاحدات حانونوۆتىڭ الىستان باعىتتاعان سوققىسى قاقپا تورىنان تابىلدى. 

الايدا، ويىننىڭ تەڭ اياقتالۋىنا كەلىسپەگەن جاسۇلان قايىركەنوۆ كەزدەسۋدىڭ اياقتالۋىنا ءۇش مينۋت قالعاندا قازاقستان قۇراماسىن العا شىعاردى. قورىتىندى ەسەپ - 2:1.

وسىلايشا، اپتاعا جۋىق ۋاقىتقا سوزىلعان تارتىستى باسەكەدە ەكىنشى ورىندى تاجىكستاننىڭ اياقدوپشىلارى السا، جۇلدەلى ءۇشىنشى ورىن يراندىق فۋتبولشىلاردىڭ ەنشىسىنە بۇيىردى. 

حالىقارالىق ءتۋرنيردىڭ جۇلدە قورى 15 مىڭ اقش دوللارى بولاتىن. جەڭىمپاز كوماندالاردى ماراپاتتاۋ كەزىندە 3-ورىن العان كومانداعا 3 مىڭ اقش دوللارى بەرىلسە، 2-ورىن يەگەرلەرىنە 5 مىڭ اقش دوللارى، ال تۋرنير جەڭىمپازى – قازاقستاندىق قۇراماعا 7 مىڭ اقش دوللارىنىڭ سەرتيفيكاتى تابىس ەتىلدى. 

ەلباسى كۋبوگىن ساراپقا سالعان باسەكەدە ايرىقشا كوزگە تۇسكەن ويىنشىلار دا سىي-قۇرمەتتەن شەت قالمادى. «ۇزدىك ويىنشى» اتالىمىن قازاقستان قۇراماسىنىڭ كاپيتانى د.كاشكەن السا، «ۇزدىك شابۋىلشى» اتاعى ازەربايجاندىق حاگاني سادىقوۆقا بۇيىردى. «ۇزدىك شابۋىلشى» نوميناتسياسى وتاندىق فۋتبولشى ەركەبۇلان سەيداحمەتكە بەرىلسە، «ۇزدىك جارتىلاي قورعاۋشى» اتالىمى تاجىكستان كومانداسىنىڭ اياقدوپشىسى شاحروم ساميەۆكە تيەسىلى بولدى. «ۇزدىك قورعاۋشى» ەسىمى يراندىق توحا شارياتيگە بۇيىرىپ، الباندىق يليا سيناني ءتۋرنيردىڭ «ۇزدىك قاقپاشىسى» اتاندى.

اباي اقپارات