بىرىڭعاي مەكتەپ فورماسى بيىل دا بولمايدى. وقۋشىلاردىڭ قانداي فورما كيەتىنىن ءار مەكتەپ ۇجىمى مەن اتا-انالار تاڭدايدى. وسىلايشا، تاجىربيە الاڭىنا اينالعان ءبىلىم سالاسى تاعى ءبىر تاڭداۋدىڭ الدىندا تۇر.

قوعامنىڭ قاتتى قارسىلىعىنا قاراماستان، ۇشتىلدىلىك ەنگىزۋگە قۇشتار مينيستر بىرىڭعاي مەكتەپ فورماسىنا كەلگەندە «دەموكرات» بولىپ، فورما تاڭداۋدى مەكتەپ ۇجىمى مەن اتا-انالاردىڭ شەشكەنى دۇرىس دەپتى.

ءبىلىم جانە عىلىم ءمينيسترى استانادا وتكەن وتاندىق مەكتەپ فورماسىن وندىرۋشىلەر كورمەسى فورۋمىندا: «مەكتەپ فورماسىنىڭ قانداي بولۋى كەرەكتىگىن تاڭداۋ تەك ءبىلىم بەرەتىن ۇيىمنىڭ عانا ەمەس، سونىمەن قاتار اتا-انالاردىڭ دا قۇزىرىندا بولعانى دۇرىس. مۇنى دۇرىس دەپ ەسەپتەيمىن. ءار مەكتەپ وزىنشە جەكە بولا تۇرسا دا جالپى ورتاق ىسكەرلىك ستيلگە سايكەس كەلۋى ءتيىس» دەپتى.

ال، بىلتىر ءماجىلىس ۇكىمەتكە بىرىڭعاي مەكتەپ فورماسىن ەنگىزۋ تۋرالى ۇسىنىس ايتىپ، ەكس-مينيستر اسلان ءسارىنجىپوۆتىڭ كومانداسى ءبىر ىڭعاي مەكتەپ فورماسى تۋرالى زاڭ جوباسىن دايىنداپ، ونى پارلامەنتتىڭ قاراۋىنا بەرگەن. بۇل بىرىڭعاي فورما بيىل دا ەنگىزىلمەيتىن بولدى. بىلتىر بىرىڭعاي مەكتەپ فورماسىن ەنگىزۋ ماسەلەسى تالقىلانعاندا سول تۇستاعى ءبىلىم جانە عىلىم ءمينيسترىنىڭ ءباسپاسوز حاتشىسى الىبەك شوقپاروۆ: «... بارىنەن بۇرىن بۇل الەۋمەتتىك، ماتەريالدىق تەڭسىزدىكتى بولدىرماۋ جانە دىنىنە قاراپ بولىنۋگە جول بەرمەۋ» دەگەن ەدى. ءجون-اق ءسوز. بىراق، ەندىگى جەردە مەكتەپ فورماسىنا قاتىستى اتا-انالار قىرىق پىشاق بولىپ داۋلاسىپ، اركىم بارىن كورسەتكىسى كەلىپ، باسەكەگە تۇسەدى. تويدان باسەكەگە ءتۇسىپ جۇرگەن جۇرتقا بۇل تاڭسىق ەمەس. ءسويتىپ، بالالار الەۋمەتتىك تەڭسىزدىككە، كەمسىتۋشىلىككە ۇشىرايدى. ويتكەنى، ءبىزدىڭ قوعام ءۇشىن باستى قۇندىلىق ادام ەمەس، اقشا جانە بايلىق. اتا-انالار اقشا مەن بايلىق كورسەتۋدەن بايگەگە تۇسەدى. زاردابىن بالا تارتادى. ال، مينيستر ساعاديەۆكە ءبارىبىر سياقتى. مەكتەپ فورماسىن مەكتەپ ۇجىمى مەن اتا-انالار تاڭداۋىنا بەرۋ – ءبىرىڭ ءولىپ ءبىرىڭ قال دەۋدىڭ كەرى ءارى ورتا ءبىلىم سالاسىندا جاڭا باسەكەگە، جاڭا داۋعا جول اشۋ.

مىنە، وسىلايشا، ءبىلىم جانە عىلىم مينيسترلىگى تۇتاس حالىقتىڭ بولاشاعىمەن ويىنىن جالعاستىرىپ جاتىر.

نۇرا ماتاي

Abai.kz