تۇركيالىق «زامان» گازەتى ەلدەگى ەردوعان بيلىگىنە قارسى اسكەري توڭكەرىسكە قاتىستى تىڭ دەرەكتەردى جاريالادى.  ۇلىبريتانيانىڭ ىشكى بارلاۋ ۇيىمىنىڭ مالىمەتىنە سۇيەنگەن باسىلىم ەردوعان مەن ونىڭ بيلىگىنە قارسى توڭكەرىستى «جاساندى» دەپ باعالادى. بۇل تۋرالى «parstoday.com» سايتى جازادى.

«زامان» گازەتى ءوز حابارىندا ۇلىبريتانيانىڭ ىشكى بارلاۋ ۇيىمى مالىمەتتەرىندەگى انكاراداعى ءبىرسىپىرا جوعارعى لاۋازىمدى شەنەۋنىكتەردىڭ تەلەفون سۇحباتتارى مەن كىلت ءسوز قويىلعان ەلەكتروندى حاتتارىنا قول جەتكىزگەن. وندا تۇركيا ۇكىمەتىنىڭ جوعارعى لاۋازىمدى شەنەۋنىكتەرى مەملەكەتتىك جانە جەكەمەنشىك ورگانداردى قارسىلاستاردان تازارتۋ ءۇشىن جوسپار قۇرىپ، اسكەري توڭكەرىس ۇيىمداستىرعاندىعى ايتىلادى.

ەستەرىڭىزگە سال كەتەيىك، وسىعان دەيىن تۇركيادا پرەزيدەنت رەجەپ تايىپ ەردوعان مەن ونىڭ ۇكىمەتىنە قارسى اسكەري توڭكەرىس بولعان.

ال تۇركيا پرەزيدەنتى توڭكەرىستى – اقش-تا تۇرىپ جاتقان تۇرىك ديسسيدەنتى، ءدىني اعارتۋشى فەتحۋللاح گۇلەن مەن ونىڭ جاقتاستارى ۇيىمداستىردى دەپ مالىمدەگەن. ءتىپتى، ەردوعان رەسمي تۇردە اقش بيلىگىنە شاعىمدانىپ، فەتحۋللاح گۇلەندى تۇركياعا ەكستراديتسيالاۋدى سۇراعان.

ءتىپتى رەسەيلىك ەۋرازيا ارناسى ماتەريالىندا رەسەيلىك سۋ-24 ۇشاعىن گۇلەننىڭ جاقتاستارى اتىپ تۇسىرگەندىگى دە ايىلدى.

ال باتىستىق تەلەارنالارعا سۇحبات بەرگەن فەتحۋللاح گۇلەن پرەزيدەنت ەردوعاننىڭ ءسوزىن تەرىسكە شىعارعان.

«مەن 15 جىلدان بەرى وسىندا، اقش-تا تۇرىپ كەلەمىن. ونداعى بيلىكتەگى كوپ ادامداردى تانىمايمىن دا. مەن تۇركيادا بولعان كەزدە تانيتىن ادامدار قازىر بيلىكتەن كەتكەن. سوندىقتان تۇركياداعى تەراكتىنى مەن ۇيىمداستىردى دەۋ قيسىنسىز. ال مەنى ەكستراديتسيالاۋعا كەلەتىن بولساق، بۇل تالاپ وسىعان دەيىن بىرنەشە مارتە قويىلعان. قۇرمەتتى وباما مىرزا ەگەر مەنى تۇركياعا جىبەرەمىن، دەسە مەن بارامىن. وندا تۇرعان ەشتەڭە جوق»،-دەپ جاۋاپ قاتقان-تىن.

وسىدان كەيىن، تۇركيا پرەزيدەنتىنىڭ قالاۋىمەن انكارا قىرعىزستاننان ەلدەگى تۇرىك ليتسەيلەرىن جابۋدى سۇراعان.

بۇعان قىرعىزستان رەسپۋبليكاسى ءسىم رەسمي مالىمدەمە جاساپ، «قايسىبىر ەلدىڭ سىرتقى ىستەر ءمينيسترىنىڭ، ۋلتيماتۋم جانە بوپسالاۋ تىلىمەن، وزگە ءبىر مەملەكەتكە نە ىستەۋ كەرەكتىگىن نۇسقاۋ – دورەكىلىك»،-دەپ جاۋاپ قايتارعان.

تۇرىك ليتسەيلەرىن جابۋ ماسەلەسى قازاق قوعامىندا دا بىرنەشە مارتە كوتەرىلگەنىمەن ەردوعان تالابى ازىرگە قاناعاتتاندىرىلعان جوق.

سونىمەن ەردوعاننىڭ گۇلەنمەن اراداعى ايقاسى ءالى جالعاسىپ كەلەدى. ءبىر كەزدەرى اينىماس دوس، اعا مەن ءىنى، ۇستاز بەن شاكىرت بولعان ەكەۋدىڭ ەرەگەسى ەندى حالىقارالىق سيپات الىپ بارادى. جوعارىداعى اقپاراتتاردىڭ اۋانىنا  سەنسەك، تۇركياداعى توڭكەرىستى ەردوعان ءوزى ۇيىمداستىرعان بولۋى مۇمكىن.  

نۇرگەلدى ابدىعانيۇلى