360 مىڭعا تارتا تۇرعىنى بار ماقتارال اۋدانىن وبلىس ورتالىعىمەن بايلانىستىراتىن ءبىر عانا جول – سىرداريانىڭ ۇستىنەن سالىنعان كوپىر. جەرگىلىكتى حالىق ونى «تاۋەلسىزدىك كوپىرى» دەپ ايتادى. كەڭەس وداعى تاراعان تۇستا ارالدا قالعانداي بولعان اۋدان جۇرتشىلىعى وبلىس ورتالىعىمەن وزبەكستاننىڭ اۋماعى ارقىلى ءوتىپ بارىپ، بايلانىساتىن. قازىر وسى كوپىر – نەگىزگى جول. سونىڭ كومەگىمەن 25 جىلدىڭ ىشىندە ماقتارال اۋدانىنىڭ الەۋمەتتىك-ەكونوميكالىق ءوسىمى ارتتى. سىرداريانىڭ جاعاسىنداعى ازاتتىق اۋلى بۇرىن «پراۆدا» دەپ اتالاتىن. 100-گە جەتپەيتىن ءتۇتىن بار ەدى. ىڭعايلاستىرىپ سالىنعان مەكتەپتە بالالار سىعىلىسىپ وتىرىپ، ساباق وقىدى. قازىر زامانعا ساي ۇلگىدەگى مەكتەبى بار. تۇرمىسى ءتۇزۋ اۋىلدا تۇرعىندار قاتارى مىڭعا جەتىپتى. اينالىساتىن كاسىبى بار. ازاتتىق اۋدانعا كىرە بەرىس قاقپا ىسپەتتى. بۇل تۋرالى khabar.kz پورتالى جازادى.  

ساتتارقۇل تاڭىربەرگەنوۆ، ازاتتىق اۋىلىنىڭ تۇرعىنى -الماتى، استانا مەن شىمكەنت سەكىلدى ۇلكەن قالالارعا وسى ءبىزدىڭ اۋىل ارقىلى وتەدى. بۇرىن ءبىزدىڭ اۋىل شەتتە قالعان اۋىل ەدى. قازىر اللاعا شۇكىر، تاۋەلسىزدىكتىڭ ارقاسىندا ەڭ كۇشتى قاقپا اۋىل اتانىپ وتىر.

ازاتتىقتىڭ اجارلانا تۇسۋىنە تاۋەلسىزدىك كوپىرىنىڭ سالىنعانى سەپ. اۋىلدىڭ ىرگەسىندە لوگيستيكالىق ورتالىق تۇرعىزىلۋدا. اۋداندا وسىرىلگەن 700 مىڭ تونناعا جاقىن كوكونىس پەن قاۋىن-قاربىزدى كۇندىز-ءتۇنى تاسيتىن كولىكتەر وسى جەردە جينالادى. ال 25 جىل بۇرىن كولىكتىڭ كوبى كورشى مەملەكەتتىڭ شەكاراسى ارقىلى كەزەك كۇتىپ، ارەڭ وتەتىن.

جامانتاي بەيسەنباەۆ، ماقتارال اۋدانىنىڭ اكىمى -ول كەزدە كەشكى ساعات6, 8-دە جاۋىپ قوياتىن. ەگەر سول ۋاقىتتان كەشىكسەك ءبىز سارىاعاشتا، كەلەستە، باسقا جەرلەردە جاتاتىنبىز. سونداي ءبىر وتە قاتتى قيىن جاعدايلار بولدى. مىنە وسىنى ەسكەرگەن ەلباسى ەڭ ءبىرىنشى تاۋەلسىزدىك كوپىرىن سالدى.

ماقتارال دامۋ ۇستىندە. جالپى ىشكى ءونىمى 25 جىلدا 644 ميلليوننان 112 ميلليارد تەڭگەگە ءوستى. بىلتىر 220 مىڭ تونناداي ماقتا جينالدى. اۋىل شارۋاشىلىعى القاپتارىن اعىن سۋمەن قامتاماسىز ەتۋ جانە كورشىلەرگە تاۋەلدىلىكتەن ارىلۋ ءۇشىن 14 ميلليارد تەڭگەدەن اساتىن قارجىعا سىرداريادان سورعىمەن سۋ تارتاتىن كەشەن سالىندى. بيىل جەتىسايداعى ءبىر مەكتەپتىڭ 40 وقۋشىسى «التىن بەلگى» يەگەرى بولدى. كولىك كوپ جۇرەتىن جولدىڭ بويىنا الپامىس باتىرعا بيىك ەسكەرتكىش تۇرعىزىلعان.

باۋىرجان وڭعارباەۆ، كاسىپكەر -بۇل ەسكەرتكىش وزىمىزدەن كەيىنگى ۇرپاقتىڭ، ەلدىڭ ازاماتتارىنىڭ رۋحىن كوتەرەدى. رۋحى بيىك ەل ەشقاشەن جامان بولمايدى.

ۇلىلاردى ۇلىقتاماساق، قايدان ۇلى ەل بولامىز. -ءدامى ءتىل ۇيىرەتىن ءمىرزاشولدىڭ قاۋىنى مەن قاربىزى قازىر رەسەي مەن بەلارۋستىڭ نارىعىن جاۋلادى. بۇل – جەر ەمگەن ماقتارالدىق ديقانداردىڭ ماڭداي تەرى.

Abai.kz