ەل تاۋەلسىزدىگىنىڭ 25 جىلدىعىنا وراي كەنتاۋ ترانسفورماتور زاۋىتى تۇڭعىش رەت 80 مۆت-تىق ترانسفورماتوردى قۇراستىرىپ شىعاردى. بۇل قۇرىلعىنىڭ ءبىر داناسىنىڭ ءوزى كەنتاۋ سەكىلدى 10 اۋداندى ەلەكتر قۋاتىمەن قامتۋعا قاۋقارلى. قۋاتتى ترانسفورماتور استانا قالاسىنداعى ەحرو-2017 كورمەسى وتەتىن ەڭ ماڭىزدى ايماقتى جارىقپەن قامتاماسىز ەتەدى دەپ كۇتىلۋدە.

ايتا كەتۋ كەرەك، الپاۋىت ترانسفورماتورعا قازىرگى تاڭدا 4 تاپسىرىس تۇسكەن. جەمىستى ەڭبەك تەك زاۋىتتا عانا ەمەس، رەسپۋبليكادا ورىن الىپ وتىرعان تاريحي جاڭالىق دەۋگە بولادى. سەبەبى، بۇعان دەيىن ەل كولەمىندە قۇراستىرىلاتىن ترانسفورماتوردىڭ ەڭ قۋاتتىسى 63 مۆت قانا بولعان.

“اتامەكەن” ۇلتتىق كاسىپكەرلەر پالاتاسى ۇيىمداستىرعان “Industrial Synergy-2016” اتتى حالىقارالىق عىلىمي تەحنيكالىق كونفەرەنتسيا اياسىندا 80 مۆت-تىق ترانسفورماتوردىڭ پرەزەنتاتسياسى ءوتتى. وندا «اlageum group» كومپانياسى باقىلاۋ كەڭەسىنىڭ توراعاسى سەيدۋللا قوجاباەۆ كوپشىلىك الدىندا زاۋىت ۇجىمىنىڭ جۇمىسىن جوعارى باعالاپ، العىس ايتتى. مىنبەردە ءسوز سويلەگەن الىس جاقىننان كەلگەن قوناقتاردا كەنتاۋ ترانسفورماتور زاۋىتىنىڭ جۇمىسىن جوعارى باعالادى.

كونفەرەنتسيا ش.قالداياقوۆ اتىنداعى مادەنيەت سارايىندا جالعاسىن تاپتى. وعان قازاقستان، رەسەي، وزبەكستان، قىرعىزستان، تاجىكستان ەلدەرىنەن 200-دەن اسا عالىمدار، 500-گە جاقىن دەلەگاتتار قاتىسىپ، "قازاقستانداعى عىلىمنىڭ وندىرىسپەن بىرگە دامۋى، ءارى عىلىمعا نەگىزدەلگەن وندىرىستەردىڭ يننوۆاتسياسى" تاقىرىبىن كەڭىنەن تالقىلادى.

- كونفەرەنتسيانىڭ باستى ماقساتى - ەكونوميكامىزدىڭ تۇراقتى دامۋى. ءبىزدىڭ ەكونوميكامىزداعى ۇلكەن پروبلەمانىڭ ءبىرى شيكىزاتقا تاۋەلدىلىك. بۇل ءوز قاتەلىكتەرىن كورسەتتى. مۇناي باعاسى تومەن تۇسكەن سايىن ءبىزدىڭ ماسەلەلەرىمىزدە كوبەيە ءتۇستى. بىزدە باسەكەلەستىككە قابىلەتتى تاۋالاردى شىعارۋ، شەت ەلگە ەكسپورتتاۋ وتە از. وسى ارقىلى ءبىز ءبىراز پروبلەمالاردى سەزىندىك. ەندى بۇل جاعدايلاردى قالاي ورنىنا كەلتىرەمىز. ول ءۇشىن جاقسى ءوندىرىستى ىسكە اسىرىپ، ونىمدىلىكتى جوعارىلاتىپ، يننوۆاتسيالىق جۇمىستاردى قولعا الۋ كەرەك. عىلىمي ىزدەنىستەر ارقىلى جاڭا تاۋارلاردى، جاڭا ونىمدەردى شىعارىپ، جاڭا قىزمەتتەر كورسەتە الۋىمىز قاجەت. كونفەرەنتسيا جۇمىسى بارىسىندا اشىق اڭگىمەلەر ايتىلدى. كوپشىلىك ءۇشىن وتە ءتيىمدى ۇسىنىستار ءسوز بولدى، - دەدى "اتامەكەن" قر ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى مۇرات ابەنوۆ.

قازاقستان ماشينا جاساۋشىلاردىڭ وداعى توراعاسىنىڭ ورىنباسارى تيمۋرلان التاەۆ، ترانسفەر جانە تەحنولوگيانى كوممەرتسيالاۋ ورتالىعىنىڭ ديرەكتورى يسمايل توقبەرگەنوۆ، «الماتى ۆەنتيلياتور زاۋىتى» اق پرەزيدەنتى مارات باققۇلوۆ، «كازەكسپورتگارانت» اق ماركەتينگ جانە ساتۋ دەپارتامەنتىنىڭ جەتەكشىسى قۋانىش ماحاجانوۆ، وبلىستىق كاسىپكەرلەر پالاتاسىنىڭ باسشىسى اسقار ابۋباكيروۆ «اlageum» كومپانياسىنىڭ قولعا العان جۇمىستارى جونىندە جاقسى پىكىرلەرىن ءبىلدىردى. ال، كاسىپورىن قالانىڭ ماقتانىشى ەكەندىگىن اتاپ وتكەن قالا اكىمى ابدىباقىت ماقۇلباەۆ قالادان يندۋستريالدى ايماق اشىلعانىن ايتىپ، كاسىپكەرلەردى كاسىپ اشۋعا شاقىردى.

كونفەرەنتسيا بارىسىندا «عىلىمي ءوندىرىستى دامىتۋ جانە وعان قولداۋ كورسەتۋ»، «قازاقستان رەسپۋبليكاسىنداعى وندىرىسكە جاڭا سەرپىن» تاقىرىبىندا ەكى پانەلدىك سەسسيا ءوتتى. "كايدزەن ارسەنال" جشس-نىڭ جەتەكشى ترەنەر-كەڭەسشىسى، رەسەيلىك "ارسەنال ۋسپەحا" ووو ديرەكتورى اناتولي فەسكوۆ جاس ماماندارعا ارناپ شەبەرلىك ساعاتىن وتكىزدى

Abai.kz