بۇگىن اقش-تا كەزەكتى پرەزيدەنت سايلاۋى اياقتالىپ، داۋىستار ەسەپتەلدى. دەموكراتتار ەلى وزدەرىنىڭ 45-پرەزيدەنتىن سايلادى. سونىمەن دەموكراتياشىلدار مەن رەسپۋبليكاشىلار اراسىنداعى تارتىستىڭ قورىتىندىسى بويىنشا دونالد ترامپ اقش-تاعى پرەزيدەنت سايلاۋىنىڭ جەڭىمپازى اتاندى.

اقش-تىڭ جاپ-جاڭا پرەزيدەنتى ءىرى كورپوراتسيالاردىڭ، كاپيتالداردىڭ يەسى ەكەنى بەلگىلى. رەسەيلىك ميللياردەرلەرمەن ىم-جىمى ءبىر دونالد ترامپتىڭ قازاقستاندىق ىعاي-سىعايلارمەن دە اۋىز جالاسقانى ءمالىم بولدى. سولاردىڭ ءبىرسىپاراسىن بۇقارالىق اقپارات قۇرالدارى جازعان دا بولاتىن.

شىققان تەگى وزبەك بولعانىمەن قازاقستانداعى ەڭ اۋقاتتى كاسىپكەر اليدجان يبراگيموۆتىڭ ەسىمى دونالد ترامپتىڭ كورپوراتسياسىمەن تىكەلەي بايلانىستى، - دەپ جازادى «Forbes» باسىلىمى (ۆسيا پرەزيدەنتسكايا رات. كتو ستويت زا دونالدوم ترامپوم؟). دالىرەك ايتساق،  الەكساندر ماشكەەۆيچ، پاتوح شوديەۆ جانە اليدجان يبراگيموۆ ۇشتىگى ترامپتىڭ دەۆەلوپەرلىك «Bayrock» كومپانياسىن ۇزاق جىلداردان بەرى قارجىلاندىرىپ كەلەدى ەكەن. اڭگىمە «Bayrock» كومپانياسىنىڭ نيۋ-يورك قالاسىندا سالىنعان «Trump SoHo» قوناق ءۇيى تۋرالى بولىپ وتىر. ال «Forbes» دەرەگىنە سۇيەنسەك، يبراگيموۆتىڭ قورجىنىندا قازىر 1,9 ميلليارد دوللار قارجىسى بار كورىنەدى.

(تەۆفيك اريف پەن دونالد ترامپ)

نيۋ-يوركتەگى دەۆەلوپەر تەۆفيك اريف «Bayrock» كومپانياسىنىڭ نەگىزىن قالاۋشى، قازسسر-دا تۋعان. 46 قاباتتى «Trump SoHo» قوناق ءۇيى دونالد ترامپتىڭ جىلجىمايتىن مۇلىك بازاسىنداعى ەڭ ءىرى جاۋھارى سانالادى.

قازاقستانداعى ءۇش وليگارحتىڭ ءبىرى – پاتوح شوديەۆ ءدال وسى تەۆفيك ءاريفتىڭ «Bayrock» كومپانياسىنا ينۆەستيتسيا سالعان.  شوديەۆتىڭ جيىپ-تەرگەنى 1,8 ميلليارد دوللاردان اسىپ تۇسەدى. 

ودان كەيىن، «The Wall Street Journal» باسىلىمى دونالد ترامپتىڭ قازاقستاندىق مۋلتيميللياردەر ماشكەۆيچپەن بايلانىسى بار ەكەنىن انىقتاعان.

جاڭاعى «Bayrock» كومپانياسىنىڭ باسشىسى تەۆفيك اريف مىرزاعا قازاقستان مەتاللۋرگياسىنىڭ ماگناتى ماشكەەۆيچ دەمەۋشىلىك كورسەتكەن (Mr. Arif’s firm, Bayrock, counted Alexander Mashkevich, a billionaire in the metals industry whose business is based in Kazakhstan, as a key funding backer, according to a document reviewed by The Wall Street Journal. Mr. Mashkevich, through a spokeswoman, declined to comment.) «The Wall Street Journal» باسىلىمىنىڭ جازۋىنشا، رەسمي قۇجاتتاردا ماشكەەۆيچتىڭ اتى اتالماعان. سوندىقتان ول باسىلىم تىلشىلەرىنە حاتشىسى ارقىلى قانداي دا ءبىر اقپارات بەرۋدەن باس تارتىپتى.

سونداي-اق، «Financial Times» باسىلىمى دونالد ترامپتىڭ  الماتىنىڭ ەكس-اكىمى، بۇگىندە حالىقارالىق ىزدەۋدە جۇرگەن ۆيكتور حراپۋنوۆپەن  بايلانىسىن اشكەرەلەگەن ماتەريال جاريالادى. «ارام اقشا: ترامپ جانە قازاق بايلانىستارى» (Dirty money: Trump and the Kazakh connection) اتتى ماقالانى «Abai.kz» پورتالى قازاق تىلىنە اۋداردى. «قازاقستاندىق بيزنەسمەننىڭ وتباسى جۇزدەگەن ميلليون دوللارعا (ۇرلانعان قاراجاتتار) مانحەتتاننان دونالد ترامپقا تيەسىلى ءزاۋلىم عيماراتتى ساتىپ العان جانە ءىرى كوممەرتسيالىق كەلىسىمدەرگە وتىرىپ، قارجى ماگناتىنىڭ سەرىكتەستەرىنىڭ بىرىنە اينالعان» (Title deeds, bank records and correspondence show that a Kazakh family accused of laundering hundreds of millions of stolen dollars bought luxury apartments in a Manhattan tower part-owned by Mr Trump and embarked on major business ventures with one of the tycoon’s partners), - دەپ جازادى Financial Times.

نۇرگەلدى ابدىعانيۇلىنىڭ شولۋى

Abai.kz