«استانا ەكسپو-2017» ۇلتتىق كومپانياسىنىڭ باسقارما توراعاسى احمەتجان ەسىموۆ دۇيسەنبى كۇنى حالىقارالىق كورمەگە قاتىسۋشى 5 مەملەكەتكە، اتاپ ايتقاندا قىتاي، فرانتسيا، گەرمانيا، ۆەنگريا جانە تۇركياعا العاشقى پاۆيلونداردى تاپسىردى. بۇل تۋرالى Vلاست سايتى حابارلايدى.

ء«بىز ءۇشىن، ءبىزدىڭ ۇلتتىق كومپانيا ءۇشىن ەرەكشە كۇن بولىپ وتىر. سەبەبى، حالىقارالىق پاۆيلوندار، 1374 ورىنعا ارنالعان ەكسپو-قالاشىق، ەكسپو-كەڭسە، ىشكى ىستەر ءبولىمىنىڭ عيماراتى جانە ەنەرگيانى زەرتتەۋ ورتالىعى سەكىلدى كورمەنىڭ بەس نەگىزگى نىسانىنىڭ قۇرىلىسى اياقتالدى. اتالعان عيماراتتاردىڭ جالپى اۋماعى 482 مىڭ شارشى مەتردى قۇرايدى»، - دەپ مالىمدەدى ەسىموۆ پاۆيلونداردى تاپسىرۋدىڭ سالتاناتتى شاراسى بارىسىندا.

بۇگىنگى كۇن «مازمۇندىق تولىقتىرۋدىڭ  بەلسەندى كەزەڭىنىڭ باستالۋىن» بىلدىرەتىندىگىمەن ماڭىزدى دەپ اتاپ ءوتتى ەسىموۆ.

«كورمەنىڭ اشىلۋىنا 222 كۇن قالعاندا ءبىز پاۆيلوندار مەن تۇرعىن ۇيلەردى تاپسىرۋدى باستادىق. بۇل ۋاقىت پاۆيلوندارىمىزدى ساپالى تۇردە تولتىرۋ ءۇشىن جەتكىلىكتى بولادى دەپ ويلايمىن. ەكىجاقتى بايلانىستى قامتاماسىز ەتۋ ءۇشىن ارنايى تەحنيكالىق بيۋرو اشىلدى، سونىمەن قاتار اككرەديتاتسيالىق ورتالىق جۇمىسىن باستايدى»، - دەپ حابارلادى ۇلتتىق كومپانيا باسشىسى.

«وزدەرىڭىز كورىپ وتىرعانداي، ءبىز سىزدەرگە زاڭ كەڭەستەرىنەن باستاپ وزگەدەي ۇيىمداستىرۋ ماسەلەلەرىنە دەيىن قامتيتىن كورمەگە  قاتىسۋشىلارعا ارنالعان جان-جاقتى كومەك كورسەتۋگە ءازىرمىز»، - دەپ ءسوزىن جالعاستىردى ول.

ەسىموۆ ەكسپو جوباسىنىڭ كۇردەلى داعدارىس ۋاقىتىندا جۇزەگە اسىرىلىپ جاتقانىن ەسكە سالىپ كەتتى. الايدا «مەملەكەت باسشىسىنىڭ تولىققاندى قولداۋىمەن» ول «داعدارىسقا قارسى ەڭ شىنايى باعدارلامالاردىڭ بىرىنە» اينالدى. كورمە قۇرىلىسى مەن دايىندىعىنا قازاقستاننىڭ بارلىق دەرلىك ايماعىنداعى 300-دەن استام وتاندىق كاسىپورىن جۇمىلدىرىلعان.

«وسىلايشا جوبا 50 مىڭداي جۇمىس ورنىن قۇرىپ، ساقتاپ قالۋعا مۇمكىندىك بەردى. تەك وسى قۇرىلىس الاڭىنىڭ وزىندە عانا 14 مىڭ ادام جۇمىسپەن قامتىلعان»، - دەدى ول.

كومپانيا باسشىسىنىڭ سوزىنە قاراعاندا، بۇدان بولەك نىساندار قۇرىلىسى كەزىندە جەرگىلىكتى كومپانيالار 492 ملرد تەڭگەنى قۇرايتىن سوماعا جۇمىس اتقارىپ، قىزمەت كورسەتكەن.

«سفەرا» ۇلتتىق پاۆيلونى، كونگرەسس-حولل جانە قوناق ءۇي سەكىلدى كورمەنىڭ وزگە نىساندارى بويىنشا دا جۇمىس كەستەگە سايكەس جۇرگىزىلىپ وتىر. كەلەسى جىلى قوعامدىق ورىنداردى ازىرلەۋدى، اۋماقتى اباتتاندىرۋدى ۇيىمداستىرۋ جوسپارلانۋدا»، - دەدى كومپانيا توراعاسى.

كومپانيا وكىلدەرىنىڭ ايتۋىنشا، ۆەنگريا پاۆيلونىنىڭ اۋماعى 411,9 شارشى مەتردى قۇرايدى. ۇيىمداستىرۋشىلاردىڭ سوزىنە قاراعاندا، «بولاشاق ەنەرگياسى ءبىزدى بىرىكتىرەدى» دەگەن پاۆيلون تاقىرىبى ەلدەگى ەنەرگيانىڭ قولجەتىمدى كوزدەرىنىڭ گەوگرافيالىق جانە ەكونوميكالىق ەرەكشەلىكتەرىنە نەگىزدەلگەن. پاۆيلون سۋ، كۇن جانە جەل ەلى بولىپ تابىلاتىن ۆەنگريانىڭ سيپاتىن اشا ءتۇسىپ، ەلەكتر جانە قالالىق جوسپارلاۋ سالاسىنداعى ەڭ سوڭعى قۇرىلعىلاردى كورسەتەدى. سونىمەن قاتار 2017 جىلدىڭ 20 تامىزى كورمە اياسىنداعى ۆەنگريانىڭ ۇلتتىق كۇنى بولىپ انىقتالدى.

گەرمانيا پاۆيلونىنىڭ اۋماعى 1249,5 شارشى مەتردى قۇرايدى جانە «ەنەرگياعا باستار جولدا» دەپ اتالادى. فرانتسيا 1069,1 شارشى مەتردەن تۇراتىن پاۆيلونعا يە بولىپ، ونى «جاسىل دامۋعا ارنالعان ەنەرگەتيكالىق بۇرىلىس» دەپ اتادى. جاسىل ەنەرگەتيكا سالاسىنداعى ءوز جۇمىستارىن فرانتسيا بولاشاق قالاسى، جاڭعىرتىلاتىن ەنەرگيا جانە ەكولوگيالىق كولىك تۇرلەرى اتتى ءۇش تاقىرىپ اياسىندا ۇسىنادى. قىتاي 1000 شارشى مەتردى قۇرايتىن پاۆيلوندى الدى. «جاسىل جىبەك جولى» اتتى بۇل نىساننىڭ ەرەكشەلىگى قحر-ءدىڭ جىبەك جولىنىڭ بويىنداعى جانە بۇكىل الەمدەگى مەملەكەتتەرمەن ەنەرگەتيكالىق سەرىكتەستىگىنىڭ جاڭا ويىن اشىپ كورسەتەتىن بولاشاق ەنەرگياسىنىڭ ارمان تەاترى بولماق.

Abai.kz