كەشە وبلىس اكىمى جانسەيىت تۇيمەباەۆ تولەبي اۋدانىنداعى الەۋمەتتىك نىسانداردا بولىپ، جۇمىسىمەن تانىستى.

جۇمىسشى توپ، ەڭ الدىمەن، كيەلىتاس اۋىلدىق وكرۋگىندەگى «گازپرومنەفت-بيتۋم كازاحستان» زاۋىتىن كورىپ، جۇمىسشىلارىمەن سويلەستى. اۆتوكولىك جولدارىنا ارنالعان بيتۋم شىعارۋ ءوندىرىس ورنىنان وندىرىلەتىن ءونىم ەلىمىزدىڭ ءۇش وبلىسى – الماتى، جامبىل جانە وڭتۇستىك قازاقستاننىڭ تاسجولدارىنا قولدانىلادى. 2011 جىلى «ۇدەمەلى يندۋستريالدى-يننوۆاتسيالىق دامۋ باعدارلاماسى» اياسىندا ىسكە قوسىلعان بيتۋم زاۋىتىندا بيىل 170 مىڭ توننا بيتۋم وندىرۋگە قول جەتكىزىلدى. وسى جىلدان باستاپ تاجىكستان مەن وزبەكستانعا دايىن ءونىم ەسپورتتاي باستاعان ونەركاسىپ ورنىندا جەرگىلىكتى 80 ادام جۇمىسپەن قامتىلعان.

زاۋىتتىڭ بۇگىنگى تىنىس-تىرشىلىگىنە قانىق بولعان ج.تۇيمەباەۆ جۇمىسقا جەرگىلىكتى حالىقتى كوپتەپ تارتۋ ىسىنە ءمان بەرۋ كەرەكتىگىنە نازار اۋدارىپ، زاۋىتتى كەڭەيتۋ جولدارىن قاراستىرۋ كەرەكتىگىن ايتتى.  

مۇنان سوڭ، اكىم اتالعان ەلدى مەكەنگە قاراستى اسىل تۇقىمدى قۇس شارۋاشىلىعى «قىزىلجار» جشس-ن ارالادى. 8 گا جەرگە ورنالاسقان قۇس فەرماسىندا 28 مىڭعا جۋىق حايتەكس براۋن تاۋىقتارى تاۋلىگىنە 28 مىڭ دانا جۇمىرتقا بەرەدى. جەرگىلىكتى 30 ادامدى جۇمىسپەن قامتىعان سەرىكتەستىك جىلىنا 2 مىڭ توننا ەت وندىرەتىن قۇس فابريكاسىن سالماقشى. بۇل رەتتە ايماق باسشىسى اۋدان اكىمى ب.پارمانوۆقا قۇس شارۋاشىلىعىنا قوسىمشا جەر بەرۋدە جەرگىلىكتى اكىمشىلىك تاراپىنان قاجەتتى قولداۋلاردىڭ جاسالۋ كەرەكتىگىن جۇكتەدى.

كەمەقالعان اۋىلدىق وكرۋگىندەگى «الما-تاۋ» دەمالىس ايماعى دا جۇمىسشى توپتىڭ نازارىنان تىس قالعان جوق. وبلىس تۇرعىندارى مەن قوناقتارى ءۇشىن بارلىق جاعدايى جاسالعان ايماقتا جەرگىلىكتى 120 ادام ەكى اۋىسىمدا جۇمىس ىستەپ، كەلۋشىلەرگە قىزمەت ەتەدى. ەكى جىلدان بەرى نارىقتا جۇمىس ىستەپ كەلە جاتقان كاسىپكەرلەرگە وبلىس اكىمى قولداعى بار جاعدايدى قارجى كوزىنە ءتيىمدى اينالدىرىپ، شەتەلدىك جانە جەرگىلىكتى كومپانيالارمەن، وقۋ ورىندارى، زاۋىت، فابريكالار سىندى قۇرىلىمدارمەن كەلىسىم-شارت جاساپ، وتاندىق ءتۋريزمدى دامىتىپ، بيزنەستى وركەندەتۋ كەرەكتىگىن ۇسىندى.

مۇنان سوڭ، ءوڭىر باسشىسى اۋدان ورتالىعى – لەنگەردەگى كاسىپكەرلەرگە قىزمەت كورسەتۋ ورتالىعىندا بولىپ، كەڭەس الۋشى بولاشاق كاسىپكەرلەرمەن تىلدەستى. جاۋاپتى ماماندارعا جەدەل ءارى ءتيىمدى قىزمەت كورسەتۋدى تاپسىرعان جانسەيىت قانسەيىتۇلى بيزنەستى باستاۋشى ازاماتتاردىڭ جۇمىسىنا ساتتىلىك تىلەدى.

سوڭعى نىسان – شاھارداعى پ.تاجىباەۆا اتىنداعى 800 ورىندىق مەكتەبى بولدى. كۇردەلى جوندەۋ جۇمىستارىنا قاتىستى مەملەكەتتىك ساتىپ الۋ ىسىندە كەشەۋىلدەۋگە تاپ بولىپ، مەرزىمىنەن كەش باستالعان جوندەۋ جۇمىستارى 25 جەلتوقسانعا دەيىن اياقتالادى دەپ كۇتىلۋدە. بۇگىنگى تاڭدا مەكتەپ وقۋىشىلارى 22 اۆتوبۋسپەن 2 مەكتەپكە تاسىمالدانىپ، وقىتىلۋدا. بار ماسەلەگە قانىققان وبلىس اكىمى مەردىگەر مەكەمەگە جۇمىستاردى ساپالى ءارى مەرزىمىندە تاپسىرۋدى جۇكتەدى.

تولەبي اۋدانىنا جۇمىس ساپارى سوڭىندا ج.تۇيمەباەۆ اۋداننىڭ اكتيۆىمەن كەزدەستى. تولەبيدىڭ اكىمى بۇحارباي پارمانوۆ جىل باسىنان بەرى اتقارىلعان اۋداننىڭ الەۋمەتتىك-ەكونوميكالىق كورسەتكىشتەرىن باياندادى.

قورىتىندى ءسوزدى العان ايماق باسشىسى تولەبيدەگى بىرقاتار سالالار بويىنشا سىن، ەسكەرتپەلەر جاسادى. تاۋلى ايماقتاعى تۋريزم سالاسىن ودان ءارى دامىتىپ، بيۋدجەتكە تۇسەتىن سالىق كولەمىن ارتتىرۋدى تاپسىرعان ءبىرىنشى باسشى بۇل رەتتە، جەردى ءتيىمدى پايدالانىپ، ودان ەكولوگيالىق تازا، تابيعي ءونىمدى الۋ كەرەكتىگىنە نازار اۋداردى. سونىمەن بىرگە، ءاربىر مەملەكەتتىك قىزمەتكەر ءوز مىندەتىنە جاۋاپكەرشىلىكپەن قاراپ، ءوڭىرىمىزدىڭ ءوسىپ، وركەندەۋىندە پاتريوت بولۋعا شاقىردى.

Abai.kz