شىمكەنت قالاسىندا قازاقستان تاۋەلسىزدىگىنىڭ 25 جىلدىعىنا جانە كسرو سپورت شەبەرى ۆلاديمير پوچيۆالوۆتى ەسكە الۋعا ارنالعان ستەند جانە وق اتۋدان ححV حالىقارالىق تۋرنير ءوتتى.

وبلىستا اتۋ سپورتىنىڭ دامۋ تاريحىندا بۇل تۋرنير 25-ءشى رەت وتكىزىلىپ، ەلىمىزدىڭ تاۋەلسىزدىگىمەن قاتار قادام باسىپ كەلەدى. بيىلعى جارىسقا رەسەي فەدەراتسياسى، وزبەكستان رەسپۋبليكاسى، كىرعىز رەسپۋبليكاسى، قازاقستان رەسپۋبليكاسىنان (استانا، الماتى قالالارىمەن قاتار الماتى، اتىراۋ، قاراعاندى، قىزىلوردا، قوستاناي، ماڭعىستاۋ، پاۆلودار، وڭتۇستىك قازاقستان وبلىستارىنىڭ كوماندالارى) 280 شاقتى سپورتشى قاتىستى.

تراپتان (ترانشەيادەن نىسانا كوزدەۋ) ەرلەر اراسىندا قىزىلوردالىق ماكسيم كولوموەتس، جاستار اراسىندا الماتىلىق ارتەم چيكۋلاەۆ، قىزدار اراسىندا قىزىلوردالىق ايجان دوسماعامبەتوۆا ءبىرىنشى ورىندى يەمدەندى. ال سكيتتەن (دوڭگەلەك نىسانا كوزدەۋ) ەرلەر اراسىندا وڭتۇستىكقازاقستاندىق ۆلاديسلاۆ مۋحامەديەۆ، جاستار اراسىندا الماتىلىق يۋنۋس ماچجون، قىزدار اراسىندا قىزىلوردالىق انەليا شالتاقباەۆانىڭ جۇلدىزى جاندى. كومپاكت - سپورتينگتەن ەرلەر اراسىندا ەلوردالىق دميتري كاچانوۆ، جاستار اراسىندا الماتىلىق ەدۋارد ەششەنكو، قىزدار اراسىندا وقو سپورتشىسى ولگا حايلوۆا ەرلەدى. دۋبل-تراپتان ەرلەر اراسىندا رەسەيلىك ۆيتالي فوكەەۆ، جاستار اراسىندا الماتىلىق رۋسلان بەردوۆ، قىزدار اراسىندا قىزىلوردالىق ارۋ ايجان دوسماعامبەتوۆا جەڭىمپاز اتاندى.

Abai.kz