ءماجىلىس توراعاسى نۇرلان نىعماتۋلين فينلياندياعا رەسمي ساپارى بارىسىندا وندىرىسشىلەر كونفەدەراتسياسى، فيندىك ەكسپورتقا ىقپالداستىق، تەحنولوگيا مەن يننوۆاتسيانى قارجىلاندىرۋ جونىندەگى وكىلدەرمەن كەزدەستى. 

جۇزدەسۋ بارىسىندا ەكى مەملەكەتتىڭ ەكونوميكالىق ءوزارا ءىس-قيمىلىن كەڭەيتۋ ماسەلەلەرى تالقىعا سالىندى.

ن. نىعماتۋلين ءوز سوزىندە  قازاقستان پرەزيدەنتى نۇرسۇلتان نازارباەۆ ۇسىنعان «قازاقستاندىق دامۋ جولىنىڭ» ەرەكشەلىكتەرى تۋراسىندا باياندادى.  

ءماجىلىس توراعاسى اتاپ وتكەندەي،  قازاقستاندا تاۋەلسىزدىك العان جىلدار ىشىندە ءىجو دوللارمەن ەسەپتەگەندە 20 ەسە، ورتاشا جالاقى – 17 ەسە ارتىپ، 2 ملن جۇمىس ورنى اشىلدى.  

ن.نىعماتۋلين فيندىك كومپانيالاردى 2015-2019 جىلدارعا ارنالعان يندۋستريالىق-يننوۆاتسيالىق دامۋ باعدارلاماسىن بىرلەسە جۇزەگە اسىرۋعا جانە  اگروونەركاسىپتىك  كەشەندى جاڭعىرتۋ سالاسىنداعى مۇمكىندىكتەردى باسا اتاپ ءوتتى.

-قازاقستاندا باسىم باعىتتاردا جۇمىس ىستەيتىن ينۆەستورلار ءۇشىن ۇجىمدىق تابىس سالىعىنان، 10 جىل مەرزىمگە جەر سالىعىنان، 8 جىلعا مۇلىكتىك سالىقتاردان بوساتۋ سىندى ارتىقشىلىقتار قاراستىرىلعان. سونىمەن بىرگە، نىساندار پايدالانۋعا بەرىلگەننەن كەيىن ينۆەستورلارعا كۇردەلى شىعىنداردىڭ 30 پايىزى قايتارىلادى. سونداي-اق، وتكەن جىلى الەمنىڭ 35 ەلى بويىنشا ينۆەستورلار ءۇشىن ۆيزاسىز رەجيمنىڭ ءتىزىمى كەڭەيتىلدى. كەلەر جىلعا دەيىن ول ءتىزىمنىڭ كولەمى 54 ەلگە دەيىن جەتۋگە ءتيىس. ولاردىڭ قاتارىندا فينليانديانىڭ دا بار ەكەنى ءوز-وزىنەن تۇسىنىكتى،-دەپ اتاپ ءوتتى ن. نىعماتۋلين.   

ءماجىلىس توراعاسىنىڭ ايتۋىنشا، قازاقستان «ەكسپو-2017» حالىقارالىق كورمەسىنە فيندىك ارىپتەستەرىنىڭ قاتىسۋىن اسىعا كۇتەدى.  سەبەبى، فينليانديا – سولتۇستىك ەۋروپا ەلدەرىنىڭ قاتارىندا قازاقستاننىڭ نەگىزگى ساۋدا-ەكونوميكالىق ارىپتەستەرىنىڭ ءبىرى. بۇل مەملەكەت ينۆەستيتسيا كولەمى بويىنشا سولتۇستىكەۋروپالىق ەلدەر اراسىندا ەكىنشى ورىنعا يە.

قازاقستاندا ەنەرگەتيكا، تەلەكوممۋنيكاتسيا، كولىك، كەن ورنى، اۋىلشارۋاشىلىعى، ساۋدا سىندى باسقا دا سالالار بويىنشا 70-كە تاياۋ فينليانديالىق كومپانيالار جۇمىس ىستەيدى.

ايتا كەتەيىك، قازاقستان فينليانديانىڭ ورتالىق ازياداعى ەڭ ءىرى ساۋدا جانە ەكونوميكالىق ارىپتەسى.

Abai.kz