وبلىس اكىمى جانسەيىت تۇيمەباەۆتىڭ توراعالىعىمەن اۋدان، قالا اكىمدەرىمەن جانە وبلىستىق باسقارمالار باسشىلارىنىڭ قاتىسۋىمەن سەلەكتورلىق ءماجىلىس ءوتتى. كۇن تارتىبىندە وبلىستىڭ 2016 جىلدىڭ 9 ايىنداعى الەۋمەتتىك-ەكونوميكالىق دامۋ قورىتىندىسى، «نۇرلى جول» جانە «جۇمىسپەن قامتۋ 2020» باعدارلامالارىنىڭ ورىندالۋ بارىسى قارالدى. 

ءبىرىنشى ماسەلە بويىنشا ءسوز العان وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ر.مۋلكەمانوۆ ەسەپتى مەرزىم ىشىندە ونەركاسىپ ءونىمىنىڭ كولەمى 574,2 ملرد. تەڭگەنى قۇراپ، اۋىل شارۋاشىلىعىنىڭ جالپى ءونىمى 319,6 ملرد. تەڭگەگە، قۇرىلىس جۇمىستارىنىڭ كولەمى 125,3 ملرد. تەڭگەگە جەتكەنىن باياندادى. دەسە دە، باسقارما باسشىسىنىڭ ايتۋىنشا، وڭىرگە ينۆەستيتسيا تارتۋدا ناتيجە تومەن. ياعني، 9 ايدا نەگىزگى قورعا 240,8 ملرد. تەڭگە ينۆەستيتسيا باعىتتالىپ، 2015 جىلدىڭ ءتيىستى كەزەڭىنە 82,4% قۇرادى. 

كۇن تارتىبىندەگى ەكىنشى ماسەلە اياسىندا وبلىستىق قۇرىلىس باسقارماسىنىڭ باسشىسى س.پولاتوۆ بيىلعى جىلعا جوسپارلانعان 14 نىساننىڭ 7-ندە قۇرىلىس جۇمىستارى وندىرىستىك كەستەگە ساي ءجۇرىپ جاتقانىن جەتكىزسە، «نۇرلى جول» مەملەكەتتىك باعدارلاماسى بويىنشا 9 جوبانى ىسكە اسىرۋ جوسپارلانعانىن ايتقان وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى م.مارايىم بولىنگەن قارجىنىڭ 96 پايىزعا يگەرىلىپ، جۇمىستار جىل سوڭىنا دەيىن تولىق ورىندالاتىنىن باياندادى. 

سەلەكتورلىق وتىرىستا «جۇمىسپەن قامتۋ 2020» باعدارلاماسىنىڭ ورىندالۋ بارىسى بويىنشا بايانداما جاساعان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ءا.تەمىرباەۆا جىل باسىنان بەرى 54570 ادامعا باعدارلاما قاتىسۋشىسى رەتىندە قولداۋ كورسەتىلگەنىن حابارلادى. ونىڭ ىشىندە، 19965 ادام وزدىگىنشە جۇمىسپەن قامتىلىپ، جىلدىق جوسپاردىڭ 113 پايىزىن قۇراعان. 

بايانداماشىلاردى مۇقيات تىڭداعان ايماق باسشىسى كۇن تارتىبىندە قارالعان ءاربىر ماسەلە بويىنشا سالا جەتەكشىلەرىنە تاپسىرمالار جۇكتەدى. اسىرەسە، جانسەيىت قانسەيىتۇلى ەكونوميكالىق ينديكاتورلار بويىنشا جۇمىستاردىڭ ءتيىستى دەڭگەيدە ورىندالىپ، وبلىسقا قارجى تارتۋدا ينۆەستورلارعا جاعداي جاسالۋ قاجەتتىگىن اتاپ ءوتتى. قۇرىلىس نىساندارىن سالىپ، كوممۋنالدىق جۇيەلەردى رەتتەۋدە مەرزىمىنەن كەشىككەن مەردىگەرلەردى انىقتاپ، جالپى تىزىمنەن شىعارۋدى ايتسا، جۇمىسپەن قامتۋ ماسەلەسىندە بەرىلگەن تاپسىرمالار ورىندالماي جاتقان اۋدان، قالالاردىڭ ءتىزىمىن جاساپ، اكىمدىكتىڭ اپپاراتىنا بەرۋدى تاپسىردى.

Abai.kz