بۇگىن استانا قالاسىنداعى ورتالىق كوممۋنيكاتسيالار قىزمەتىندە «قۋاتتى ءوڭىر – قۋاتتى قازاقستان» اتتى ەلوردامىز – استانادا وڭتۇستىك قازاقستان وبلىسى كۇندەرىنىڭ وتۋىنە وراي وبلىس اكىمىنىڭ ورىنباسارى ۇلاسبەك سادىبەكوۆ بريفينگ بەردى.

بيفينگتە وبلىس اكىمىنىڭ ورىنباسارى تاۋەلسىزدىك جىلدارىندا ءوڭىردىڭ جەتكەن جەتىستىكتەرى مەن وڭتۇستىك قازاقستاننىڭ استاناداعى كۇندەرىنىڭ باعدارلاماسى بويىنشا باياندادى.

ونىڭ ايتۋىنشا، بۇل كۇندەرى وبلىس دەلەگاتسياسى استانا حالقىنا ءوڭىردىڭ تاريحى، مادەنيەتى مەن نەگىزگى جەتىستىكتەرىن تانىستىرىپ، وتاندىق تاۋار وندىرۋشىلەردىڭ ءونىمىن ۇسىنادى. وسى كۇندەرى 300-گە جۋىق وبلىستىڭ ونەر مايتالماندارى تەاتر قويىلىمدارى مەن كونتسەرتتىك باعدارلامالار جانە فوتوكورمەسىن، بالالارعا بازارلىق رەتىندە وبلىستا تۇسىرىلگەن قىسقا مەتراجدى فيلمدەر توپتاماسىن ۇسىنادى. سونداي-اق، «قازاقستاندا جاسالعان» اكتسياسىنىڭ شەڭبەرىندە وبلىستىق ونەركاسىپ وندىرۋشىلەردىڭ كورمەسى مەن اۋىل شارۋاشىلىعى ونىمدەرىنىڭ جارمەڭكەسى ۇيىمداستىرىلىپ، وندا 300 توننادان استام اۋىل شارۋاشىلىعى ونىمدەرى نارىقتاعى باعادان 15-20 پايىزعا ارزان ساۋدالانادى.

سونىمەن قاتار، ول ەكى كۇن بويى وتەتىن جارمەڭكەدە وڭتۇستىك ولكەسىنىڭ تۇرعىندارى قازاقتىڭ ۇلتتىق باۋىرساق، قىمىز، شۇبات، قۇرت سياقتى تاعامدارىن دا ۇسىناتىنىن جەتكىزدى.

تاۋەلسىزدىك جىلدارى وڭتۇستىكقازاقستاندىق شارۋالار اۋىل شارۋشىلىعىندادا تولاعاي تابىستارعا قول جەتكىزگەنىن اتاپ ءوتتى. 

«بيىل وبلىس شارۋالارىمەن 470 مىڭ تن. (2015ج. 246 مىڭ تن.) استىق جينالىپ، تۇسىمدىلىگى ورتاشا ەسەپپەن 22 تس/گا. قۇرادى. بۇل  قازاقستاننىڭ تاۋەلسىزدىك  كەزەڭىندەگى ەڭ ۇلكەن رەكوردتىق كورسەتكىش بولىپ تابىلادى. ال جەمىس-جيدەك داقىلدارى مەن ءجۇزىمنىڭ كوپجىلدىق ەكپەلەرىنىڭ كولەمى  جىلدان - جىلعا ۇلعايۋ ۇستىندە.  ناقتىراق ايتساق، 2008-2016  جىلدار ارالىعىندا  جەمىس-جيدەك داقىلدارى مەن ءجۇزىمنىڭ  كوپجىلدىق ەكپەلەرىنىڭ ەگىس كولەمى 17,7 مىڭ گا. بولسا، بيىل بۇل 30 مىڭ گا  جەتكىزىلدى»،-دەدى ءوز بايانداماسىندا ۇ.سادىبەكوۆ.

Abai.kz