بۇگىن وڭتۇستىك قازاقستاندا قر پارلامەنتى ءماجىلىسىنىڭ قارجى جانە بيۋدجەت كوميتەتىنىڭ كوشپەلى وتىرىسى ءوتتى. وندا اتالعان كوميتەتتىڭ ءتورايىمى گۇلجان قاراقۇساۆانىڭ توراعالىعىمەن «بيۋدجەتارالىق رەتتەۋدىڭ نەگىزگى فۋنكتسيالارىنىڭ ءبىرى رەتىندە ءوڭىردىڭ بيۋدجەتتىك قامتاماسىز ەتىلۋىن تەڭەستىرۋ جانە سالىقتىق الەۋەتىنىڭ ءوسۋىن ىنتالاندىرۋ» ماسەلەسى قارالدى.

كوشپەلى جيىنعا قارجى مينيسترلىگىنىڭ مەملەكەتتىك كىرىس كوميتەتىنىڭ توراعاسى د.ەرعوجين مەن قر پارلامەنتى ءماجىلىسىنىڭ 12 دەپۋتاتى جانە وبلىستىق ءماسليحات دەپۋتاتتارى قاتىستى.

وتىرىستى اشىپ بەرگەن وبلىس اكىمى جانسەيىت تۇيمەباەۆ كوشپەلى جيىننىڭ ماڭىزدىلىعىنا توقتالىپ، جۇمىسىنا ساتتىلىك تىلەدى.

«بۇگىنگى وتىرىستا تالقىلاناتىن ماسەلە وتە ماڭىزدى، سەبەبى ءوڭىرىمىزدىڭ بيۋدجەتى رەسپۋبليكا بويىنشا ەڭ ۇلكەن بيۋدجەت. تەك سوڭعى 7 جىلدا وبلىس بيۋدجەتى 2,5 ەسەگە ءوسىپ 559 ملرد. تەڭگەگە جەتتى. وسىعان وراي، ءبىزدىڭ باستى مىندەت بيۋدجەتتەن جۇمسالعان ءار تەڭگەنىڭ وبلىس ەكونوميكاسىنا تيگىزەتىن اسەرىنىڭ ناتيجەلى بولۋىن ۇيىمداستىرۋ. سەبەبى، بيۋدجەت قاراجاتى ەسەبىنەن وبلىس حالقىنىڭ كوپتەگەن الەۋمەتتىك-ەكونوميكالىق ماڭىزدى ماسەلەلەرى شەشىلەدى»، - دەدى ايماق باسشىسى.

جيىندا بايانداما جاساعان كوميتەت مۇشەسى ومارحان وكسىكباەۆ بيۋدجەتارالىق قاتىناستاردى ۇيىمداستىرۋدى جاقسارتۋ، سونداي-اق ولاردى ودان ءارى جەتىلدىرۋ باعىتتارىن دۇرىس تاڭداۋدى قامتاماسىز ەتۋ – ءبىزدىڭ ورتاق جۇمىسى ەكەنىن جەتكىزدى.

«بيۋدجەتارالىق قاتىناستار - ءوڭىردىڭ الەۋمەتتىك-ەكونوميكالىق دامۋىن باسقارۋ قۇرالدارىنىڭ ءبىرى، سوندىقتان ولار ءوڭىردىڭ دامۋ ماقساتتارىمەن جانە مىندەتتەرىمەن ۇيلەسىمدى بولۋعا ءتيىس. بيۋدجەتارالىق قاتىناستاردىڭ قالىپتاسقان جۇيەسىندە ءبىر نارسەنى وزگەرتۋ ءۇشىن سالماقتى دالەلدەر مەن ونى وزگەرتۋ بويىنشا ۇسىنىستار قاجەت»، - دەدى و.وكسىكباەۆ.

سونىمەن قاتار، كۇن تارتىبىندە وبلىس اكىمىنىڭ ورىنباسارى ە.سادىر ءسوز الىپ، وڭىرىمىزدەگى بيۋدجەتتىڭ اتقارىلۋ بارىسى تۋرالى باياندادى. ايتۋىنشا، 2014-2016 جىلدارعا رەسپۋبليكالىق بيۋدجەتتەن جالپى 765,7 ملرد. تەڭگە، ونىڭ ىشىندە 2014 جىلى - 254,7 ملرد. تەڭگە، 2015 جىلى - 255,2 ملرد. تەڭگە، 2016 جىلى - 255,8 ملرد. تەڭگە كولەمىندە سۋبۆەنتسيا بولىنگەن.

ايتا كەتەيىك، بيۋدجەتتى جوسپارلاۋ مەن ورىنداۋ مەحانيزمدەرىن تۇراقتى جەتىلدىرۋ ناتيجەسىندە وبلىسىمىزدا ەگەمەندىك العان جىلداردان بەرى، 1491 مەكتەپكە دەيىنگى ۇيىمدار اشىلىپ، بالالاردى مەكتەپكە دەيىنگى بىلىممەن قامتۋ دەڭگەيى 14%-دان 83,3%-عا جەتتى. سونداي-اق، وسى جىلداردا وبلىسىمىزدا 444 جاڭا مەكتەپتەر سالىنىپ، 117 اپپاتتى مەكتەپتەردىڭ ماسەلەسى شەشىلدى. دەنساۋلىق ساقتاۋ سالاسىندا 347 جاڭا نىساندار پايدالانۋعا بەرىلدى. بۇدان بولەك، وبلىسىمىزدا 8,9 ملن. شارشى مەتر تۇرعىن ءۇي پايدالانۋعا بەرىلىپ، 100 مىڭنان استام وتباسى باسپانالى بولدى. سونىمەن قاتار، ورتالىقتاندىرىلعان سۋمەن قامتۋ 51,9%-دان 71,3%-عا جانە گازبەن قامتۋ – 33,1%-دان 57,2%-عا جەتتى. ەرەكشە كوڭىل ءبولىپ ايتاتىن ماسەلە، ءوڭىرىمىزدىڭ ەكونوميكاسىنا بيۋدجەت ەسەبىنەن كورسەتىلگەن قولداۋ ناتيجەسىندە جۇمىسسىزدىق دەڭگەيى 11,4%-دان 5,2%-عا تومەندەدى. سونىمەن قاتار، مۇعالىمدەردىڭ، دەنساۋلىق ساقتاۋ جانە جالپى العاندا بارلىق بيۋدجەتتەن قارجىلاندىرىلاتىن مەكەمە قىزمەتكەرلەرىنىڭ ەڭبەكاقىسى كوبەيدى.

وقو اكىمىنىڭ ءباسپاسوز قىزمەتى