«ەۋرازيا» تەلەارناسى مەملەكەت باسشىسى نۇرسۇلتان نازارباەۆقا قاتىستى سيۋجەتتەردە «قر پرەزيدەنتى» دەپ جازبايدى. ءاۋ باستا رەداكتورلار «قر پرەزيدەنتى» دەگەن جازۋدى بايقاۋسىزدا ۇمىتىپ كەتكەن شىعار دەپ ويلاعانبىز. ويتكەنى، جاڭالىقتار كەزىندەگى قاربالاستا مۇنداي قاتەلىكتىڭ كەتىپ قالۋى ابدەن مۇمكىن جاعداي عوي. الايدا «ەۋرازيا» ارناسى پرەزيدەنتكە http://www.1tv.kz/kk/news/video22082016/janalyktar_basty/3 قاتىستى بارلىق جاڭالىقتارىندا «قر پرەزيدەنتى» دەپ جازۋدى قاجەت دەپ سانامايدى ەكەن.

جۋىردا ەلىمىزگە رەسەي فەدەراتسياسىنىڭ پرەزيدەنتى ۆ.پۋتين كەلدى. اتالعان ساپار تۋرالى تۇسىرگەن سيۋجەتتە ەڭ ءبىرىنشى بولىپ كورشى ەلدىڭ پرەزيدەنتى ۆ.پۋتين سويلەيدى. ءبىزدىڭ ويىمىزشا مەملەكەتتىڭ باسشىسى رەتىندە ەڭ ءبىرىنشى بولىپ ن.نازارباەۆ سويلەۋى (http://www.1tv.kz/kk/news/video04102016/janalyktar_basty/19) كەرەك سياقتى. الايدا تەلەارنا باسشىلارى ەلباسىن ەكىنشى «پلانعا» ىسىرىپ، كورشى ەلدىڭ باسشىسىن الدىعا شىعارىپ جىبەرىپتى. ءتىپتى بۇل از دەسەڭىز، ن.نازارباەۆ سويلەگەن كەزدە قىزمەتى تۇرماق ونىڭ اتى-ءجونىن جازۋدى دا تەلەارنا قاجەت دەپ ساناماعان. وسىعان قاراپ «ەۋرازيا» تەلەارناسى «ەلباسىن قازاق ەلىنىڭ پرەزيدەنتى رەتىندە مويىنداماي ما؟» دەگەن زاڭدى سۇراق تۋىندايدى.

ءيا، ءبىر رەت «ۇمىتىپ»، ءتىپتى ەكىنشى رەت «ەستەن» شىعارىپ الۋ ابدەن مۇمكىن جاعداي دەلىك. ايتسە دە ءبىر ەمەس، بىرنەشە رەت مۇنداي «قاتەلىكتەردىڭ» قايتالانۋى نەنى بىلدىرەدى؟ بەلگىلى جۋرناليست سەرىك ابىكەنۇلىنىڭ ايتۋىنشا «مۇنىڭ استارىندا «ەۋرازيا» تەلەارناسىنىڭ ارام پيعىلعى جاتىر. سوندىقتان دا ول ء«تيىستى ورگان ورەسكەل قاتەلىك جىبەرگەن ادامداردى جازالاۋ كەرەك» دەپ وتىر. 

– ارينە پرەزيدەنتتىڭ قىزمەتىن ءبىر رەت قاتەلەسىپ جازباي قويسا، وندا تۇرعان ەشتەڭە جوق شىعار. الايدا ءبىر ەمەس، بىرنەشە رەت وسىنداي قاتەلىكتەردىڭ قايتالانۋى اقىلعا سىيمايتىن جاعداي عوي. مەنىڭ ويىمشا اتالعان تەلەارنانىڭ پيعىلى تازا بولماي تۇرعان سياقتى. ءبىر قىزىعى، «ەۋرازيا» تەلەارناسى ۇكىمەتتەن اقشا الىپ وتىرىپ سول ەلدىڭ پرەزيدەنتى مەن حالقىن مويىندامايتىنىن كورسەتىپ وتىر. مىسالى، ءبىر ادامنان سۇحبات الساڭ ونىڭ اتى-ءجونىنىڭ استىنا ەتىكشى بولسا ەتىكشى، مۇعالىم بولسا مۇعالىم دەپ جازۋ كەرەك قوي. ال بىلدەي ءبىر ەلدىڭ مەملەكەت باسشىسىنىڭ قىزمەتىن جازباي قويۋ دەگەن ءسوز جاقسىلىقتىڭ بەلگىسى ەمەس, – دەيدى سەرىك ابىكەنۇلى.

ءجۋرناليستتىڭ ايتۋىنشا  «ەۋرازيا» تەلەارناسىن «قازاقستان» ۇلتتىق تەلەارناسى قارجىلاندىرادى. الايدا «قازاقستان» مەن «ەۋرازيا» تەلەارناسى ءبىر بىرىنە قاراما-قايشى يدەلوگيا جۇرگىزىپ وتىر. بۇل ارينە الاڭداتارلىق جاعداي. سوندىقتان دا جۋرناليست «نۇر وتان» پارتياسى مەن قر پرەزيدەنت اكىمشىلىگى بۇل ماسەلەگە جاۋاپتى باسشىلاردى جازالاۋى كەرەك دەپ ەسەپتەيدى.

جالپى «ەۋرازيا» تەلەارناسىنىڭ الاڭداتارلىق جاعداي جاساپ، بۇيرەكتەن سيراق شىعارىپ وتىرۋى ءبىرىنشى رەت ەمەس. بۇعان دەيىن تەلەارنا جەر ماسەلەسى بويىنشا ميتينگكە شىققان حالىقتى امەريكانىڭ اقشاسىن الدى دەپ ايىپتاعان بولاتىن. ءتىپتى «ەۋرازيا» وزدەرىنىڭ ايتقاندارىن دالەلدەۋگە تىرسىپ كۇماندى ۆيدەو جاريالاعانى كوپشىلىككە بەلگىلى. ال تەلەارنانىڭ مەملەكەت باسشىسى نۇرسۇلتان نازارباەۆتىڭ قىزمەتىن جازباي، ەسەسىنە ۆلاديمير ءپۋتيننىڭ «رف پرەزيدەنتى» ەكەنىن جازۋى تەگىن ەمەس. وسى ارقىلى «ەۋرازيا» تەلەارناسى ەلباسىن قازاقستان رەسپۋبليكاسىنىڭ پرەزيدەنتى رەتىندە مويىندامايتىنىن بايقاتىپ وتىر.

سەرعازى اسلانبەك

Abai.kz