قازاقستان مەن رەسەي ىنتىماقتاستىعىنىڭ ءحىىى وڭىرارالىق فورۋمىندا بەردىبەك ساپارباەۆ ەكى مەملەكەت باسشىلارىنىڭ الدىندا جەدەل شەشۋدى تالاپ ەتەتىن بىرقاتار ماسەلەلەر تۋرالى ايتتى، - دەپ جازادى "اقتوبە" گازەتى.

— ەكى ەلدىڭ ساۋدا-ەكونوميكالىق قاتىناستارى دەڭگەيىن كوتەرۋ جانە «باتىس ەۋروپا — باتىس قىتاي» حالىقارالىق ءدالىزىن تولىق قۋاتىندا پايدالانۋ ماقساتىندا ءبىز رەسەي فەدەراتسياسى باسشىلىعىنان اتالعان اۆتوجول قۇرىلىسىنىڭ  ورىنبور وبلىسى تاراپىنداعى بولىگىن اياقتاۋدى  تەزدەتۋدى سۇرايمىز. بۇل — ءبىرىنشى ماسەلە.

ەكىنشىدەن، اقتوبە مەن ورىنبور وبلىستارى اراسىنداعى ساعارشىن وتكىزۋ بەكەتىن كەڭەيتۋ كەرەك. بۇگىنگى تاڭدا بۇل بەكەتتەن تاۋلىگىنە 2 مىڭ كولىك وتەدى. قۇجات باقىلاۋىن جۇرگىزەتىن ءبىر عانا تەرەزە جۇمىس ىستەپ تۇر. بۇل شەكارا بويىندا اۆتوكولىكتەردىڭ كەپتەلىسىن تۋعىزادى. ال  «جايساڭ» باقىلاۋ-وتكىزۋ پۋنكتىنىڭ وتكىزۋ قابىلەتى بيىل 2 مىڭنان 8 مىڭ اۆتوكولىككە دەيىن ۇلعايدى، 3 جولاقتى جول  6 جولاققا كەڭەيتىلدى، — دەپ اتاپ كورسەتتى وبلىس باسشىسى.

وبلىس اكىمى كوتەرگەن ء  ۇشىنشى  ماسەلە — مالدارىگەرلىك جانە فيتو-سانيتارلىق باقىلاۋعا بايلانىستى. قازاقستان مەن رەسەي شەكاراسىندا «روسسەلحوزنادزور» مەكەمەسىنىڭ كارانتينگە جاتقىزىلۋى مۇمكىن  ونىمدەر تۋرالى   الدىن الا حابارلايتىن   پۋنكتتەرى جۇمىس ىستەيدى. الايدا، بەردىبەك ساپارباەۆتىڭ ايتۋىنشا، ولاردىڭ قۇزىرەتتىلىك اياسى رەسمي قۇقىقتىق قۇجاتتارمەن ناقتىلانباعان جانە رەتتەلمەگەن. ناقتى ايتقاندا، پۋنكتتەردە جۇكتەردى تەكسەرۋدىڭ الدىن الا ەسكەرتۋىن جۇرگىزۋ مەرزىمى ءتارتىبى، تالاپ ەتىلەتىن ىلەسپە قۇجاتتار ءتىزىمى، مۇمكىن بولاتىن كىدىرىستەر مەن تىيىمداردىڭ سەبەپتەرى مەن مەرزىمى بەلگىلەنبەگەن. بۇل قازاقستاندىق كاسىپكەرلەر ءۇشىن قوسىمشا پروبلەمالار تۋدىرادى.

بەردىبەك ساپارباەۆ مەملەكەت باسشىسى مەن ۇكىمەت تاراپىنان قۋاتتى قولداۋ بولسا كوپسالالى ترانزيتتىك جولداردى ودان ءارى دامىتۋ مۇمكىندىگى بار ەكەندىگىن دە اتاپ كورسەتتى. اسىرەسە «نۇرلى جول» اۋقىمدى مەملەكەتتىك باعدارلاماسى اياسىندا جۇزەگە اسىرىلاتىن «اقتوبە – اتىراۋ – استراحان رف شەكاراسى»، قىتاي حالىق رەسپۋبليكاسى ەكسيم بانكى نەسيەسىن تارتۋ ارقىلى «قازاۆتوجول» ۇك» اق-مەن بىرلەسىپ قولعا الىنعان «اقتوبە – ورسك»، استانانى ەلىمىزدىڭ باتىس ايماقتارىمەن قوساتىن «ورتالىق – باتىس» جولدارى ەكونوميكامىزعا وراسان زور پايدا اكەلەر ەدى.

بەردىبەك ساپارباەۆ سونداي-اق اقتوبە وبلىسىنىڭ ۇستىمەن وتەتىن «جەزقازعان – بەينەۋ» تەمىرجول جەلىسىنىڭ ەۋروپا، ازيا جانە پارسى شىعاناعى نارىقتارىنا وڭتايلى شىعۋعا مۇمكىندىك بەرەتىنىن، جىلدىڭ سوڭىنا دەيىن «قىتاي – ەۋروپا – قىتاي» باعىتتارى بويىنشا 100 مىڭ كونتەينەر تاسىمالدانۋى جوسپارلانىپ وتىرعانىن دا ايتىپ ءوتتى. بۇل — 2011 جىلعى دەڭگەيمەن سالىستىرعاندا 100 ەسە كوپ.

ەلباسى جۇك تاسىمالى كولەمىن، ونىڭ ىشىندە ءبىرىنشى كەزەكتە ء ترانزيتتى جۇك تاسىمالى كولەمىن بارىنشا  ۇلعايتۋ ءۇشىن بارلىق جاعدايدى  جاساۋعا تاپسىرما بەردى.

— ەكى جاقتان دا كەدەرگى كەلتىرەتىن اكىمشىلىك پروتسەدۋرالاردى قاراپ، شەشۋگە ۇمتىلۋىمىز كەرەك. بۇل تۋرالى بۇگىن اقتوبە وبلىسىنىڭ اكىمى بەردىبەك ساپارباەۆ ايتتى. بىرىڭعاي ەكونوميكالىق وداقتا ورنالاسقان ءبىز ءۇشىن ءوزارا ساۋدا بارىسىندا پروتسەدۋرالاردىڭ اشىقتىعى، راسىمدەۋدىڭ وڭتايلىلىعى قاجەت. كەدەندىك شەكارالارىمىز دا ورتاق بولا تۇرا، شەنەۋنىكتىك تالاپتاردان تۋاتىن كەدەرگىلەرگە جول بەرۋىمىز ءتىپتى ۇيات. ءبىز بۇل ماسەلەنى شەشەمىز دەپ ويلايمىن. سونداي-اق ءبىر-ءبىرىمىزدىڭ كولىكتىك ينفراقۇرىلىمدارىمىزعا قولجەتىمدىلىگىمىز ماسەلەسى دە كوتەرىلدى. بۇل دا رەتتەۋگە بولاتىن ماسەلە، ءبىزدىڭ تاراپىمىزعا قاتىستىلارىن قازاقستان ۇكىمەتى جەدەل قاراپ، ارىپتەستەرمەن بىرگە شەشىمىن تابۋى ءتيىس، — دەدى قازاقستان پرەزيدەنتى.

ال رەسەي فەدەراتسياسىنىڭ پرەزيدەنتى ۆلاديمير پۋتين:

— رەسەي مەن قازاقستان ەۋروپا مەن ازيانىڭ ساۋدا تورابىندا ورنالاسقان. ءبىزدىڭ كەدەندىك شەكارامىز ورتاق. اۆتوكولىك پەن تارماقتالعان تەمىرجول جۇيەسى بار. الايدا بۇل زور الەۋەتتى تيىسىنشە پايدالانىپ وتىرعان جوقپىز. قازاقستان تاراپىنان جول سالىنعان، وكىنىشكە قاراي، ءبىزدىڭ جاقتان ءالى سالىنباعان. وتكىزۋ بەكەتى دە تار. ول ءبىزدىڭ تولىققاندى جۇمىس ىستەۋىمىزگە مۇمكىندىك بەرمەي وتىر.  بۇل ماسەلەنى ءسوز جۇزىندە قالدىرماي، تىزە قوسىپ جۇمىس ىستەۋ كەرەك.  جۇك تاسىمالى ەرەجەسى مەن لوگيستيكالىق قىزمەتتى بىرىڭعايلاندىرۋ قاجەت، — دەپ ورتاق ماسەلەگە وڭ كوزقاراسىن ءبىلدىردى.

Abai.kz