وزىنە قاۋىپ تونگەندە تۇيەقۇس باسىن قۇمعا تىعا قويادى ەكەن. الىپ دەنەسى سىرتتا قالعانىندا شارۋاسى جوق، ء«وزىن تىعىلىپ تۇرمىن» دەپ ويلايتىن بولسا كەرەك. ءبىزدىڭ بۇگىنگى تاڭدا ەلدىڭ بەرەكەسىن الىپ، تالاي ازاماتىمىزدى اجال قۇشتىرعان سالافيزم اعىمىمەن كۇرەسىمىز ءدال سول تۇيەقۇستىڭ قىلىعىنداي كورىنەدى.

بىرىنشىدەن، سالافيزممەن كۇرەس ساقال قيىپ، بالاق ۇزارتۋمەن جۇرمەيدى. كوشەدەن ولاردى ۇستاپ الىپ، قاماعان سايىن، ىزا تۋعىزىپ كەكتەنە بەرەتىنىن ەسكەرسەك، ءبىزدىڭ شەندىلەر وتە قاۋىپتى جولدى تاڭداعانىن كورەسىز.

ەكىنشىدەن، قازىر سيرياعا جيھاد جاساۋعا كەتىپ، ورالىپ جاتقانداردىڭ ءبارىن تۇرمەگە توعىتىپ جاتىرمىز. ولار سول اباقتىداعى ازاماتتاردى ۋلاپ جاتۋى ابدەن مۇمكىن جاعداي.

ۇشىنشىدەن، كەشە اقتوبەدە جات اعىمنىڭ جەتەگىندە كەتكەن ون جىگىت اسكەر قاتارىنا الىنباعانى حابارلاندى. ارنايى كوميسسيا ولاردىڭ ءدىني كوزقاراستارىنان قورقىپ ىرىكتەۋدەن وتكىزبەگەن كورىنەدى. راديكالداردىڭ قورعانىس سالاسىنا كىرىپ، ىرىتكى سالۋىنان قورىققان قۇزىرلى ورگاندار كۇزگى شاقىرىلىمعا كەلگەندەردى ءجىتى سۇزگىلەۋدە ەكەن. وتان الدىنداعى بورىشىن وتەۋگە مىندەتتى جاستاردى مەديتسينالىق تەكسەرۋگە شاقىرماستان بۇرىن جەكە ىستەرىن تەكسەرىلىپتى. ەگەر ۇلتتىق قاۋىپسىزدىك كوميتەتى مەن ىشكى ىستەر دەپارتامەنتىنىڭ تىزىمىنە ىلىككەندەر بولسا اسكەرگە جولاتپايدى. بيىلدىققا ون جىگىت ەكسترەميستىك ۇستانىمدارى ءۇشىن، تاعى ءبىرى باپتيستەردىڭ ۋاعىزشىسى بولعاندىقتان اسكەردەن شەتتەتىلگەن. 

سوندا ءبىزدىڭ قۇزىرەتتى ورگاندار ون جىگىتتى اسكەردەن شەتتەتۋ ارقىلى سالافيزممەن كۇرەسپەك پە؟

سالافيزممەن كۇرەس بۇلاي جۇرمەۋى كەرەك؟ بىرىنشىدەن، ءسالافيزمدى استىرتىن قولدايتىن رەسەي، تۇركيا، ءباا سەكىلدى ەلدەردەن كەلەتىن قاۋىپتى سۇزگىدەن وتكىزگەن دۇرىس. «ولارمەن ساياسي قارىم-قاتىناس قالاي بولعانى ءجون، ءسالافيزمدى تەجەۋ ءۇشىن قانداي قادامدار جاساۋ كەرەك؟» دەگەن سەكىلدى سۇراقتارعا عىلىمي تۇرعىدا  جاۋاپ بەرىلۋى قاجەت.

ەكىنشىدەن، تۇرمەدەگى ءدىني فاناتتاردى وقشاۋلاپ ۇستاۋ ماسەلەسى قولعا الىنىپ، ولاردىڭ بەتىن بەرى قاراتۋدىڭ كەشەندى جۇمىسى جۇرگىزىلگەنى ءجون.

ۇشىنشىدەن، ەلىمىزدەگى وسى اعىمدى قارجىلاندىراتىن ورتالىقتار انىقتالىپ، سالافيتتەردىڭ سەركەلەرى زاڭ الدىندا جاۋاپ بەرۋى كەرەك.

تورتىنشىدەن، ءدىن ىستەرى مينيسترلىگى مەن ءدىني باسقارما سالافيتتىك باعىتتاعى ۋاعىز جۇرگىزۋشىلەردى تىزىمگە الىپ، ولاردىڭ ۋاعىزى الەۋمەتتىك جەلىلەردە تارالماۋىن قاداعالاۋ قاجەت.

بەسىنشىدەن، مەملەكەتتىك قىزمەت پەن اقپارات قۇرالدارىندا ەڭبەك ەتىپ جۇرگەن بارلىق ازاماتتاردىڭ سەنىمى تەكسەرۋدەن ءوتىپ، قاۋىپتى جولدى تاڭداعاندار قىزمەتتەن الاستاتىلۋى قاجەت.

التىنشىدان، سالافيزممەن كۇرەس اقتوبەدە عانا جۇرمەۋى ءتيىس. قازاقستاننىڭ بۇكىل اۋماعىندا ءسالافيزمنىڭ قاتەرى جايلى ءتۇرلى جيىندار ۇيىمداستىرىلىپ، قاجەت بولعان جاعدايدا كوشەلەرگە ۇنپاراقتار ءىلىنۋى كەرەك.

وسى اتالعان كۇرەس جولىن تاڭداي الماساق، ءبىز سالافيزم اعىمىن قولدايتىن ەل بولعانىمىز. شىندىعىن ايتايىق، قازىرگى جات اعىممەن كۇرەسىمىز تۇيەكۇستىڭ قىلىعىنداي كۇلكىنى كەلتىرەدى. ۇلكەن قالالاردا ءبىزدى قورعايدى دەگەن ىشكى ىستەر دەپارتامەنتتەرىنىڭ عيماراتتارى تاس قورعانمەن قورشالىپ جاتىر. بۇل تۇيەقۇستىق ەمەي نەمەنە؟

ءشارىپحان قايسار

Abai.kz