وتكەن جۇمادا ەلباسى «استانا ەكسپو-2017» ۇلتتىق كومپانياسى» اق باسقارماسىنىڭ توراعاسى احمەتجان ەسىموۆتى قابىلدادى, - دەپ حابارلايدى اقوردانىڭ رەسمي سايتى.

ەندىگى جىلى ەلوردادا ءوتۋى ءتيىس حالىقارالىق كورمەنىڭ قۇرىلىسىن ۇيىمداستىرۋ جۇمىستارى جونىندە تاپتىشتەپ تۇرىپ ايتىپ بەرگەن احمەتجان ەسىموۆ مىرزا قۇرىلىس جۇمىستارىن بيىل اياقتاۋعا ۋادە بەردى.

ءسويتىپ بيىلعى جىلدىڭ اياعىنا دەيىن قۇرىلىسى تاپ تۇيناقتاي بولاتىن كورمەنىڭ پاۆيلوندارى قازان ايىندا قولدانىسقا ۇسىنىلماق. جوسپار بويىنشا، پاۆيلوندار – حالىقارالىق قاتىسۋشىلارعا، ال تۇرعىن-ۇيلەر دەلەگاتسيا مۇشەلەرىنە بەرىلەدى ەكەن.

دەلەگاتسيا دەمەكشى، بەلگىلى، بەلگىسىز سەبەپتەرمەن ءوتۋى-وتپەۋى ەكىتالاي بولعان كورمەگە 103 ەل مەن 17 حالىقارالىق ۇيىم قاتىسۋعا ءوتىنىش بىلدىرگەن. ولاردىڭ 82-ءسى كەلىسىمشارتقا قول قويىپ، ناقتى قاتىساتىنىن راستاعان.

ايتپاقشى، استانادا وتەتىن حالىقارالىق ەكسپو-2017 كورمەسى كەزىندە تاعى 61 مەملەكەت وزدەرىنىڭ ۇلتتىق كۇندەرىن اتاپ وتكىزۋ ءۇشىن كۇندەردى بەلگىلىپ، ءتىپتى ءوزارا ءبولىسىپ تە ۇلگەرىپتى.

ءسويتىپ، ءبىر كەزدەرى بيۋدجەتى تالان-تاراجعا تۇسكەن «استانا ەكسپو-2017» كورمەسىنىڭ تىزگىنىن ۇستاعان ەكس-اكىم احمەتجان ەسىموۆ وسىلاي دەدى.

ەسىموۆكە دەيىنگى ءتورت جىلدا جۇمىسى ءبىر ىلگەرى باسپاعان ەكسپو-نىڭ قۇرىلىسى بيىل-اق بىتۋگە جاقىن ەكەندىگى ءمالىم بولدى. سونىمەن قاتار، حالىقارالىق كورمەنىڭ قۇرىلىس جۇمىستارىنا ەلىمىزدىڭ 296 كومپانياسى اتسالىسقان ەكەن. استانادا جانە باسقا دا ايماقتاردا قۇرىلىسقا تىكەلەي نەمەسە جاناما تۇردە 46 مىڭ ادام جۇمىسپەن قامتىلعانى دا راس. ەسەپ بەرگەن ەسىموۆتىڭ سوزدەرىنە سۇيەنسەك، ۇپتەپ كەتكەن قارجىدان قالعانىنا قاتىرىپ سالعان قالاشىق قازان ايىندا قاتىسۋشىلارعا بەرىلە باستايدى. ايتپاقشى، وسى جولى قۇرىلىستان 131 ميلليارد تەڭگە تاعى ۇنەمدەپ قالعان. بۇل بۇل ما، الداعى ۋاقىتتا ۇنەمدەلگەن قارجى كولەمى تاعى ءوسۋى مۇمكىن ەكەن.

راس، ەرمەگياەۆ ىسىنەن كەيىن ەلوردادا وتەتىن كورمەنىڭ كەلەشەگى بۇلىڭعىر تارتقان ەدى. «بۇل كورمە ەل بيۋدجەتى ءۇشىن قىپ-قىزىل شىعىن اكەلەدى» دەپ بولجاعان ساراپشىلاردى دا، كادرلارىنىڭ قىمقىرىپ-جىمقىرىپ كەتكەنىنە قىنجىلعان ەلباسىن دا سەندىرە بىلگەن ەسىموۆتىڭ ەسەبى وسى بولدى. سونىمەن ەسىموۆ ەلباسىنىڭ الدىندا «قاھارمان» وبرازىن ويناپ، ەڭسەسى تىك شىقتى.

ەندى تالداپ كورەيىكشى، ەگەر ەسىموۆ ايتقانداي قۇرىلىس جۇمىستارىنان ۇنەمدەلگەن 131 ميلليارد (بۇل ۋاقىتشا عانا ەسەپ) تەڭگە بيۋدجەتكە قايتارىلعانى راس بولسا، «استانا ەكسپو-2017» اق باسقارماسى ەسكى ۇكىمەتتەن جالىنىپ-جالپايىپ، قازاقستاندىقتاردىڭ زەينەتاقى قورىنان 15 ميلليارد تەڭگەنى نە ءۇشىن سۇراپ وتىر؟ قوردان بولىنەتىن قارجىنىڭ ناقتى قانداي ماقساتقا جۇمسالاتىنى دا ايتىلعان ەدى؟! ەكسپو-2017 اۋماعىندا قۇرىلىس نىساندارىنا، ناقتىلاپ ايتساق، كورمە تەرريتورياسىندا سالىنىپ جاتقان «مەگا» ساۋدا ورتالىعىنىڭ قۇرىلىسىنا... ەگەر ەكسپو قارجىعا مۇقتاج بولماسا، سماعۇلوۆتىڭ ساۋدا ورتالىعىن سالۋ ءۇشىن قازاقستاندىقتاردىڭ زەينەتاقى قورىنان 15 ميلليارد تەڭگەنى نەگە بولگىزدى؟ كىم؟ ەسىموۆ ەلباسىنا وتىرىك ەسەپ بەرگەن بە دەگەن كۇدىكتى ويدىڭ تۋاتىنى دا راس.

قالاي بولعاندا دا «افەرا» جاسالدى. ازىرگە تۇسىنىكسىز جايتتار كوپ-اق. 

نۇرگەلدى ابدىعانيۇلى

Abai.kz