استانا قالاسىندا «Astana-Leisure» قازاقستاندىق حالىقارالىق تۋريستىك كورمەسى ءوز جۇمىسىن باستاعانى بەلگىلى. جىل سايىن ءداستۇرلى تۇردە وتەتىن بۇل كورمە ۆەنگريا، ۆەتنام، گەرمانيا، گرۋزيا، ينديا، قىتاي، كورەيا، مالديۆى سىندى الىس جانە جاقىن شەت ەلدەرىنىڭ 114 تۋريستىك بيزنەس ۇيىمدارىنىڭ وكىلدەرىنىڭ باسىن بىرىكتىردى.

ال وڭتۇستىكتەن كاسىپكەرلىك، يندۋستريالدى-يننوۆاتسيالىق دامۋ باسقارماسىنىڭ جەتەكشىلىگىمەن تۋريستىك جانە قوناق ءۇي يندۋسترياسىنىڭ 15 وكىلى قاتىستى، - دەپ حابارلايدى وبلىس اكىمىنىڭ ءباسپاسوز قىزمەتى.

سوڭعى جىلدارى تۋريزم سالاسىنا ايرىقشا نازار اۋدارىلىپ جاتقان وڭتۇستىكتىڭ اسەم تابيعاتى مەن تاريحي ورىندارى بۇل سالانىڭ دامۋىنا بارىنشا مۇمكىندىك بەرەدى. سول سەبەپتى دە بولسا كەرەك، كورمەگە قاتىسۋشىلار وڭتۇستىك قازاقستان وبلىسىنا وراسان زور قىزىعۋشىلىق تانىتىپ، ءبىر كورمەنىڭ وزىندە 20-دان استام ارىپتەستىك ىنتىماقتاستىققا قول جەتكىزىلدى.

ەندىگى جەردە بۇل كەلىسىمدەردىڭ ارقاسىندا تۋريزم سالاسى حالىقارالىق دەڭگەيگە دەيىن كوتەرىلىپ جاتسا، بۇل وبلىس ەكونوميكاسىنا ايتارلىقتاي ۇلەس قوساتىنى ءسوزسىز. جالپى، تۋريزم - الەم بويىنشا ەڭ تابىستى جانە ەكولوگيالىق تۇرعىدان تازا كاسىپ ءتۇرى ەسەپتەلەدى. تۋريزم دامىسا، بىرىنشىدەن، جۇمىسسىزدىق سانى تومەندەسە، ەكىنشىدەن، جەرگىلىكتى تۇرعىندار ءۇشىن ءوزىن ءوزى جۇمىسپەن قامتۋشىلار مەن ولاردىڭ تابىس كوزىنىڭ ارتۋىنا سەبەپ بولادى.

Abai.kz