مەملەكەت باسشىسىنىڭ تاپسىرماسىمەن قر پرەمەر-ءمينيسترىنىڭ ءبىرىنشى ورىنباسارى اسقار مامين باستاعان ۇكىمەت دەلەگاتسياسى تاشكەنت قالاسىنا جۇمىس ساپارىمەن باردى دەپ حابارلايدى "تۇركىستان" گازەتى pm.kz سايتىنا سىلتەمە جاساپ.

ساپار بارىسىندا وزبەكستان رەسپۋبليكاسى پرەزيدەنتىنىڭ مىندەتىن ۋاقىتشا اتقارۋشى شاۆكات ميرزيەەۆپەن، پرەمەر-ءمينيسترىنىڭ ءبىرىنشى ورىنباسارى رۋستام ازيموۆپەن، پرەمەر-ءمينيسترىنىڭ ورىنباسارى ۋلۋگبەك روزۋكۋلوۆپەن جانە سىرتقى ەكونوميكالىق بايلانىستار جانە ساۋدا ءمينيسترى ەلدور گانيەۆپەن كەلىسسوزدەر جۇرگىزىلدى.

ش. ميرزيەەۆ وزبەكستان حالقىنىڭ جانە جەكە ءوزىنىڭ اتىنان قازاقستان پرەزيدەنتى نۇرسۇلتان نازارباەۆقا شىنايى العىسىن ءبىلدىردى.

«قيىن كۇندەرى نۇرسۇلتان ءابىشۇلى ءبىزدىڭ، وزبەك حالقىنىڭ جانىنان تابىلا ءبىلدى. ءبىز بۇل ءۇشىن وعان وتە ريزامىز. قازاق حالقى – ءبىزدىڭ سەنىمدى، شىنايى ءارى جاقىن دوسىمىز»، — دەپ باسا ايتتى ول.

ش. ميرزيەەۆپەن كەزدەسۋ بارىسىندا ەكىجاقتى ساۋدا-ەكونوميكالىق قارىم-قاتىناستاردىڭ جاي-كۇيى مەن بولاشاعى، ونەركاسىپتىك ارىپتەستىك، كولىك جانە ترانزيت سالاسىنداعى بايلانىستاردى نىعايتۋ ماسەلەسى تالقىلاندى. ساۋدا-ەكونوميكالىق بايلانىستاردى ارتتىرۋ ءۇشىن زور الەۋەت بار ەكەنى اتاپ ءوتىلدى.

«ەكى ەل اراسىنداعى تاۋار اينالىمىنداعى تەرىس ءۇردىستى بىرلەسە وتىرىپ وزگەرتۋىمىز قاجەت. ءبىزدىڭ شىنىمەن دە ىسكە اسىرىلماعان مۇمكىندىكتەرىمىز جەتەرلىك. ورتا مەرزىمدى پەرسپەكتيۆادا بىزگە ءىس جۇزىندە تاۋار اينالىمىن 2 ەسەگە ارتتىرىپ، 5 ملرد اقش دوللارىنا دەيىن جەتكىزۋىمىز قاجەت»، — دەپ اتاپ ءوتتى ش.ميرزيەەۆ.

ا. مامين كەزدەسۋ بارىسىندا مەملەكەت باسشىسى نۇرسۇلتان نازارباەۆ وزبەكستانمەن ىنتىماقتاستىقتى دامىتۋعا زور ءمان بەرەتىنىن باسا ايتتى.

ء«بىز ساۋدا-ەكونوميكالىق ىنتىماقتاستىقتىڭ بارلىق سالاسى بويىنشا ۇلكەن پەرسپەكتيۆالار بايقاپ وتىرمىز. اسىرەسە، ەنەرگەتيكا، اۋىل شارۋاشىلىعى، ماشينا جاساۋ، كولىك جانە لوگيستيكا سالاسىندا جانە ت.ب.»، — دەدى ا. مامين.

وزبەكستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى رۋستام ازيموۆپەن وتكەن كەلىسسوزدەر بارىسىندا ساۋدا-ەكونوميكالىق بايلانىستاردى كەڭەيتۋدىڭ ناقتى شارالارى تالقىلاندى.

تاراپتار كەلىسسوزدەر ناتيجەلەرى بويىنشا قازاقستاننان وزبەكستانعا اۋىل شارۋاشىلىعى ونىمدەرىنىڭ، استىق پەن ۇن ەكسپورتىن ارتتىرۋ، ەكى ەلدىڭ اۋماعى بويىنشا تاسىمالداناتىن جۇك اعىمدارى ءۇشىن قولايلى تاريفتىك جاعداي جاساۋ، تەمىرجول كولىگى قىزمەتىندە ءوزارا جەڭىلدىكتەر قاراستىرۋ، وزبەكستاننان قازاقستانعا جەمىس-كوكونىس ونىمدەرىن ءجيى تاسىمالدايتىن كونتەينەرلىك پويىزداردى جولعا شىعارۋ تۋرالى كەلىسىمدەرگە قول جەتكىزىلگەنى تۋرالى ناقتىلادى.

ر. ازيموۆ «قازاقستاندىق ءونىمنىڭ سەنىمدى تۇتىنۋشىسى» بولىپ تابىلاتىن وزبەكستان رەسپۋبليكاسىنا قازاقستاننان جەتكىزىلەتىن ۇن مەن مۇناي ونىمدەرىنىڭ كولەمىن ۇلعايتۋدىڭ ماڭىزدىلىعىن اتاپ ءوتتى.

سونىمەن قاتار قازاقستان مەن وزبەكستان اراسىنداعى ايماقارالىق ىنتىماقتاستىقتى دامىتۋ تەتىكتەرىن جاساۋ، اۋىل شارۋاشىلىعى، مۇناي-حيميا، فارماتسەۆتيكا، حيميا سالاسىندا ءوزارا تاۋار جەتكىزۋدى قامتاماسىز ەتۋدىڭ، اقپاراتتاندىرۋ سالاسىندا كەدەندىك ءوزارا ىقپالداستىقتى ارتتىرۋدى كۇشەيتۋدىڭ كەپىلى بولىپ تابىلاتىن بىرلەسكەن ساۋدا ۇيلەرىن اشۋ ماسەلەلەرى قارالدى.

«استانا جانە الماتى قالالارىندا باس كەڭسەلەرىن اشۋمەن بىرىككەن كاسىپورىندار تۇرىندەگى ساۋدا ۇيلەرىن قۇرۋ ءبىزدىڭ ءوزارا قاجەتتىلىكتەرىمىزگە سايكەس كەلەدى»، — دەپ اتاپ ءوتتى ر. ازيموۆ.

سونداي-اق ا. مامين ەكونوميكانىڭ ناقتى سەكتورىنىڭ بيزنەس قاۋىمداستىعى مەن كاسىپورىندارى اراسىندا تىعىز ىسكەرلىك بايلانىستار ورناتۋ جانە ءوزارا ينۆەستيتسيالار الماسۋ ءۇشىن ەكى ەل نارىعىن اشۋ قاجەتتىلىگى تۋرالى ايتتى.

تاشكەنت قالاسىنا جۇمىس ساپارىنىڭ قورىتىندىسى بويىنشا ا. مامين مەن ر. ازيموۆ ساۋدا-ەكونوميكالىق ىنتىماقتاستىقتىڭ نەگىزگى باعىتتارىن ۇلعايتۋ تۋرالى حاتتاماعا قول قويدى.

Abai.kz