بۇل تۋرالى جۋرناليستەر مەن بلوگەرلەرگە مكك وتكەن بريفينگتە ۆەدومستۆانىڭ جاڭا رەسمي وكىلى مۇرات جۇمانباي حابارلادى.

وتكەن جىلى «اتامەكەن» ۇكپ-نىڭ قولداۋىمەن مكك رەسپۋبليكا اۋماعىندا «چەكتى تالاپ ەتىپ جۇلدە ۇتىپ ال» اتتى اكتسياسىن وتكىزگەن. ونىڭ اياسىندا 200-دەن اسا جۇلدە، ونىڭ ىشىندە باس جۇلدە – Chevrolet ماركاسىنىڭ اۆتوكولىگى ۇتىسقا سالىنىپ، ءوز يەلەرىن تاپتى.  

ازاماتتار اكتسياعا قاتىسۋى ءۇشىن ساتىپ العان تاۋار، قىزمەت نەمەسە جۇمىس بويىنشا فيسكالدى چەكتاردى مەملەكەتتىك كىرىس ورگاندارىنا بەرۋى كەرەك ەدى.

رەسپۋبليكا بويىنشا اكتسياعا 2 ملن. اسا ادام قاتىسىپ، 10 ملن. اسا چەكتى جىبەردى.

اكتسيانى وتكىزۋ ناتيجەسىندە زاڭنان تىس جۇمىس ىستەپ كەلگەن 9 مىڭنان اسا جەكە كاسىپكەر سالىقتىق تىركەۋگە قويىلدى، 8 مىڭنان استام باقىلاۋ كاسسالىق اپپاراتتار تىركەلدى.

م.جۇمانباي، قازاقستاندىقتار وزدەرىنىڭ بەلسەندى ارەكەتى ارقىلى كولەڭكەلى ەكونوميكا كولەمىنىڭ ازايۋىنا جانە كاسىپكەرلەر اراسىندا ادال باسەكەلەستىكتىڭ دامۋىنا ءوز ۇلەستەرىن قوسقاندىعىن اتاپ ءوتتى.

ول وسى جىلى دا مكك ازاماتتارىمىزعا سالىقتىق زاڭنامانى ساقتاۋ بويىنشا قوعامدىق باقىلاۋعا قاتىسا وتىرىپ، باعالى جۇلدەلەر ۇتىپ الۋعا مۇمكىندىك بەرەتىندىگىن جاريا ەتتى.

ماسەلەن، اعىمداعى جىلعى 1 قازاندا «اتامەكەن» ۇكپ-نىڭ قولداۋىمەن مكك «چەكتى تالاپ ەتىپ جۇلدە ۇتىپ ال» اكتسياسىن باستايدى.

ونىڭ ماقساتى ازاماتتاردىڭ توۆار، جۇمىس جانە قىزمەت تۇتىنۋشىسى رەتىندەگى ءوز مۇددەلەرىن قورعاۋ بويىنشا قۇقىقتىق مادەنيەتىن قالىپتاستىرۋ.

م.جۇمانبايدىڭ ايتۋىنشا وتكەن جىلعى اكتسيا ءاربىر ايماقتا بولەك جانە ءتۇرلى نىسانداردا وتكىزىلگەن.ءبىر جەردە چەكتەر WhatsApp قوسىمشاسى ارقىلى قابىلدانسا، ەندى ءبىر جەردە قاعاز لوتەرەيا بيلەتتەرىنە اۋىستىرىلىپ، جەڭىمپازدار لوتەرەلىق بارابان ارقىلى انىقتالدى.

ونىڭ قورتىندىلارىن جاساعان كەزدە ءبىز اكتسيا بولاشاقتا اۆتوماتتاندىرىلىپ، ورتالىقتانعان سيپاتتا وتەتىنىن ۋادە ەتكەنبىز.

«سوندىقتان وسى جىلعى اكتسيا «اتامەكەن» ۇلتتىق كاسىپكەرلەر پالاتاسىنىڭ قارجىلىق قولداۋىمەن ەلەكتروندىق فورماتتا كولەڭكەلى ەكونوميكاعا قارسى«Wipon» ءموبيلدى قوسىمشاسى ارقىلى وتكىزىلەدى»، - دەپ ەسكە سالدى م.جۇمانباي.

بۇل ءموبيلدى قوسىمشا تازا قازاقستاندىق ءونىم بولىپ تابىلادى. وتاندىق ماماندار دايىنداعان بۇل قوسىمشانى اقىسىز كوشىرىپ الىپ، سمارتفونداردىڭ بارلىق تۇرلەرى مەن باسقا دا گادجەتتەردە پايدالانۋعا بولادى.

اكتسياعا وزدەرى تۇتىنعان تاۋار، جۇمىس نەمەسە قىزمەت ءۇشىن بەرىلگەن فيسكالدى چەكتىڭ فوتوسىن جىبەرگەن قازاقستان رەسپۋبليكاسىنىڭ ازاماتتارى قاتىسا الادى. ەگەر فيسكالدى چەك بەرىلمەگەن جاعدايدا، ازاماتتار بۇل بۇزۋشىلىقتاردى كورسەتىپ شاعىم جىبەرە الادى.

ءىس-شارا اعىمداعى جىلعى 1 قازان مەن 15 جەلتوقسان ارالىعىندا وتكىزىلەدى. وسى كەزەڭدە بارلىق وبلىستار مەن استانا جانە الماتى قالالارىندا اي سايىن جۇلدەلەردىڭ ۇتىسى مەن ولاردى تابىستاۋ وتەدى. 

باس فينال جىلدىڭ اياعىندا مەملەكەتتىك كىرىستەر كوميتەتىندە بولادى. وندا باعالى جۇلدەلەر، ونىڭ ىشىندە باس جۇلدە – اۆتوكولىك ۇتىسقا سالىنادى.

جۇلدەلەر بيزنەس-قاۋىمداستىقپەن ۇسىنىلىپ وتىر.

ۇتىس جەڭىمپازدارى چەكتى كەزدەيسوق تاڭداۋ ادىسىمەن انىقتالاتىن بولادى. قانشالىقتى كوپ چەك جىبەرىلسە، جۇلدەنى ۇتىپ الۋ مۇمكىندىگى دە سونشالىقتى وسە تۇسەدى. 

قايتالانىپ جىبەرلىگەن چەكتەر ۇتىسقا قاتىسپايدى.

«جەڭىمپازداردى انىقتاۋ ءۇردىسىنىڭ اشىقتىعى مەن وبەكتيۆتىلىگىن قامتاماسىز ەتۋ ءۇشىن ءاربىر وبلىس پەن استانا جانە الماتى قالالارىندا، سونداي-اق مەملەكەتتىك كىرىستەر كوميتەتىنىڭ جانىندا قۇرامىنا كاسىپكەرلەر قاۋىمداستىعى، ۇكىمەتتىك ەمەس ۇيىمدار مەن بۇقارالىق اقپارات قۇرالدارىنىڭ وكىلدەرى كىرەتىن كوميسسيالار قۇرىلادى»، - دەپ تۇيىندەدى رەسمي وكىل.

قر قارجى مينيسترلىگىنىڭ

مەملەكەتتىك كىرىستەر كوميتەتىنىڭ

ءباسپاسوز قىزمەتى

اباي-اقپارات