وڭتۇستىك قازاقستان وبلىسى اكىمدىگىنىڭ ءباسپاسوز ورتالىعىندا كاسىپكەرلەرگە قىزمەت كورسەتۋ ورتالىعىنىڭ كاسىپكەرلىك مەكتەبى «فەرمەر جولسەرىگى» اتتى اۋىل شارۋاشىلىعى سالاسىنداعى تەحنولوگيالار جيناعى كىتابىنىڭ رەسمي پرەزەنتاتسياسىن وتكىزدى.

وقو كاسىپكەرلىك مەكتەبىنىڭ باستى ماقساتى - كاسىپكەرلەردىڭ بيزنەس ساۋاتتىلىعىن ارتتىرىپ، شارۋالاردىڭ كاسىبىنە قولداۋ كورسەتۋ. اتالعان كىتاپتى كەڭىنەن تاراتۋ ارقىلى، وبلىس تۇرعىندارىن، اسىرەسە، اۋىلدىق ايماقتارداعى تۇرعىنداردى، شارۋالاردى كاسىپكەرلىككە باۋلۋ مەن وعان ۇيرەتۋ بولىپ تابىلادى.

قازاقستاننىڭ وڭتۇستىك ايماعىندا اۋىل شارۋاشىلىعى سالاسىندا زاماناۋي تەحنولوگيالاردى ەنگىزۋ ارقىلى ونىمدىلىكتى جانە اۋىل شارۋاشىلىعى تاۋار وندىرۋشىلەرىنىڭ باسەكەگە قابىلەتتىلىگىن جاقسارتۋ ماقساتىندا، اتالمىش كىتاپ وڭتۇستىك-باتىس مال شارۋاشىلىعى مەن وسىمدىك شارۋاشىلىعى عىلىمي-زەرتتەۋ ينستيتۋتىمەن بىرلەسىپ شىعارىلعان.

«ۇسىنىلىپ وتىرعان وقۋ قۇرالى فەرمەرلەردىڭ، اسىرەسە، شارۋالاردىڭ كاسىبي ءبىلىمىن جانە بىلىكتىلىگىن ارتتىرىپ، وزىق تەحنولوگيالاردى مەڭگەرۋىنە جانە تەحنولوگيالىق كارتا نەگىزىندە بەرىلگەن ۇسىنىلىمداردى شارۋاشىلىعىندا تاجىريبە جۇزىندە پايدالانۋىنا سەپتىگىن تيگىزەرىنە تولىق نەگىز بار. بۇل كىتاپتا اۋىل شارۋاشىلىعىنداعى اتقارىلاتىن بارلىق جۇمىستار مەن ءونىمنىڭ ساپاسىن جاقسارتۋدىڭ تاسىلدەرى عىلىمي جانە وندىرىستىك تۇرعىدا وڭتۇستىك قازاقستان وبلىسىنىڭ كليماتتىق جاعدايىنا بەيىمدەلىپ، سونىمەن قاتار اۋىل شارۋاشىلىعى سالاسىنداعى كاسىپ تۇرلەرىنە بيزنەس-جوسپارلار ەسەبىمەن جانە ۇلگىلەرىمەن بىرگە قامتىلعان» - دەپ مالىمدەدى وقو كاسىپكەرلىك مەكتەبىنىڭ ديرەكتورى بەرەكە دۋيسەبەكوۆ.

اتالعان ءىس-شاراعا ارەكەتتەگى كاسىپكەرلەر، شارۋالار مەن اۋىل شارۋاشىلىعى سالالارىنىڭ ماماندارى، وڭتۇستىك – باتىس مال شارۋاشىلىعى مەن وسىمدىك شارۋاشىلىعى عىلىمي-زەرتتەۋ ينسيتۋتىنىڭ عالىمدارى، جانە ت.ب. ءتۇرلى ۇيىمدار قاتىستى.

Abai.kz