ەلباسىنىڭ «100 ناقتى قادام» ۇلت جوسپارىنداعى اۋىل شارۋاشىلىعى سالاسىندا وتاندىق ونىمدەردىڭ قاتارىن ارتتىرۋ باعىتىندا ۇكىمەت قابىلداعان تاپسىرمالاردى جۇزەگە اسىرۋعا تۇركىستاندىق كاسىپكەرلەر بىلەك سىبانا كىرىسكەن. 156 ۇساق قوجالىقتىڭ باسىن بىرىكتىرگەن «تۇران» شارۋا قوجالىعىنىڭ قۇرىلعانىنا بيىل 25 جىل. كاسىپكەر بيىل تۇركىستان قالاسىنىڭ ىرگەسىندەگى مىڭنان استام گەكتار القابىنا ماقتا ەككەن. جاقىندا تەرىم باستالىپ، ماقتاشىلار اق التىندى قولمەن جيناۋعا كىرىستى. اۋا رايى قاراسىپ تۇرعاندا ءونىمدى شىعىنسىز تەرىپ الۋدى كوزدەپ وتىر. ماقتانىڭ كەلىسى — 156 تەڭگە، بۇل ءتيىمدى باعا دەيدى شارۋالار.

شارۋا قوجالىعى وزىنە تيەسىلى ەگىستىكتەن بولەك وسىنداعى 4 اۋىلدىڭ دا ماقتاسىن جينايدى. جانە شارۋالاردى ساپالى تۇقىممەن قامتۋدى ءوز موينىنا العان. بۇگىندە ماقتا تالشىعىنا سۇرانىس جوعارى. كاسىپكەر ءونىمنىڭ 90-95 پايىزىن بەلارۋس جانە رەسەيدەگى توقىما وندىرىسىنە ەكسپورتتايدى. قالعانىن شارۋاشىلىقتا وڭدەپ، كورپە، جاستىق جاسايدى.

شارۋاشىلىقتى دامىتۋ ءۇشىن قوجالىق يەسى «ماكيسمۋم» ايماقتىق ينۆەستيتسيالىق ورتالىقتان 6 پايىزدىق مولشەرلەمەمەن 5 جىلعا 60 ملن تەڭگە نەسيە الىپ، بۇگىندە قارجىنى ۋاقتىلى قايتارۋدا. ماقتانىڭ ونىمدىلىگى مەن ساپاسىن ارتتىرۋ ءۇشىن تۇراندىقتار سارىاعاشتىق عالىمدارمەن جۇيەلى جۇمىس جاساپ، ماقتانىڭ جاڭا سۇرىپىن شىعارىپتى.

تۇركىستان ماقتاسىنىڭ تالشىعى 4-ۇلگىگە جاتادى. ماقتانىڭ بۇل ءتۇرى توقىما ونەركاسىبىندە كەڭىنەن پايدالانىلادى. ەندى تۇركىستاندىق كاسىپكەرلەر وڭتۇستىكتەگى توقىما كاسىپورىندارىن جەرگىلىكتى شيكىزاتپەن قامتۋ بويىنشا ەڭبەك ەتپەك. «تۇران» شارۋا قوجالىعىنىڭ باستاماسى وتاندىق ونىمدەردىڭ نارىققا شىعۋىنا تولىق مۇمكىندىك بەرىپ وتىر.

Abai.kz